SHORT STORY, 'RAUTHLA ZUN'

Mizoram khawchhak lama rambuaiin a hrût nat zet Vanlung khaw In sawmriat țha lam hret țhut khua te chuan, an kum bul hnapui nêk nât thawhrimna te chu Vai Sipai leh Mizo tlangval Volunteer te inkara hna la an nih kumtluan avangin a hlawk tur anga an sik chhuah hleih tak loh chu achhapah, chu an kum țam nât zual kum chuan Vai Sipai leh Ramhnuai mi, hmui rawp ngawih ngawih khawpa Mizoram zalenna suala bei țang țang tute lakah chuan, an inhnemna awm chhun an ran vulh ang ang te chu an hauh bet ngam ta lo telh telh a.
mahse, hetia țampuimitthiin a rawn țham țan lai hian an Buh Bal te chu thlo hlawk lo viau mah se, vanneih thlak ang reng deuhin an khaw chuan chung lawka an khaw hmun hluia inkulh India Sipai te ho khawm tu Major hmasa chu, Major fel leh ngilnei zet Jayansuria in a rawn thlaka, chu Major chuan a Post a rawn luah ațanga ni tam a liam hma chuan, Vanlung khua te țam dawm tur atan chuan an quota ațangin nitin chhung tinah ațța per sawm zelin, Zoar pum khat manah nithum chhung zela pek tlak atana thleng theih turin leh, Vawk pum khatin kar hnih chhung zel atan ațța chu thleng theih turin Vanlung khaw mite chu a hriat tir ta a.
.
Chuta chinah chuan, a khawnawt mai chuan an Buh Bal te chu Zem ațangin nithum danah te an bar khawp lek leka ruh chawp atan tia hum khiau hlawmin, Vanlung khaw chhung tin te chuan an Ran neih ang hmanga an ațța thleng țhin te chu Pa ber hoin tap meilum kil pahin an lek larh larh hi a ni nitin ta a. chutia kar an tluan dawn chuan kar laita ah an Zem chu hawngin an Buh khawlsa te chu ren em em leh puar fan delh rual tham nimang lovin an țamdawm ve leh ta chauh țhin a ni.
Buh Balin an mahni dip tu hnim thlawh fai loh an tawrh chu thuhran, Vaimim leh thlai dang te pawhin hlo thlawh mam loh kumtluan karah chuan rah țha puarpui tlak chhuah thei bik suh le!
chuti khawpa rambuaiin a nawk nat avanga hawp khawp thar chhungkua tumah Vanlung khuaah chuan an awm loh avang chuan, sawi tawh angin, Vai Sipai te zar chu a țhen azar an zo hram hram avangin an khua pawh chu an la rauh san lo a ni chauh mai a ni.
.
Thawhțanni a rawn inher chhuaka, Vanlung khua chhungkaw pa engemaw zat te chuan an dan pangngaitein an khaw hlui tlang, Vai Sipai te inkulhna lam chu a țhenin Ar pawmin a țhenin an Vawk te kai chungin an pan leh thliai thliai tawh a.
an hnung lamah chuan a kum aia lang upa chho mek, mah se, chuti khawpa a bawrchhawr chung pawh chuan, a hmaifang pá hrak mai leh a pian inkhaithli zaih si lang chiang zet avanga, Hmeichhiate tana tawrh har tur zeta a hmelțhatna zun ngah zet mai a lan dan țawp hnak mai pawhin a hliah khuh zawh loh khawpa a vanglai mawinain a la chelh mek pa la tlangval em em pakhat hian, a fapa chum leh hmelțha em em mai, biang tai hlar leh a Nu ang maia sambu dum chhah hlap kum khat leh thla thum mi chauh țawng pawh la țawng thiam lo chu a darah a chhuang a, a zak veilamah Arpui chhuang ling zet hi a ar-awt chawpin hruikhauin a âk hnak bawk a.
.
Vanlung khaw paho te chuan an hnung lama Zochhuanawma te pafa rawn indarchhuan hnak hnak mai an han hmuh leh meuh chuan, an chhak mitthi te khaw kawngkharpui Rihdilah chuan lamkal intirha, Mitthi te khaw hotu Pawla hnenah chuan Zochhuanawma te pafa tan chuan Nu ber Remtluangpuii thlarau tal chu ngen haw sak theih tak an nâp leh ta nge nge a.
țampui mitthiin a bawh chhilh khua an nih miau avangin an duh ang takin anni pafa hi an dawm thei bik silo!
an hma kum hnih kalta maia Aizawl ațanga Nula leh Tlangval hmelțha dun zet rawn tlan, an in hmangaihnain an chhungte ve veah inhmel huatna a thlen tawh chung pawha, an nunna peng ang maia inngai ve ve tlat khawpa inhmangaih ngawih ngawih leh, an chen dun ve theihna awm chhun nia an hriat khaw lar lo tak leh biru nia an hriat, tlang leh tlangin a karcheh khung ang reng zet kara Vanlung khua a an thiam ang anga rawn khawsa ve rawih Zochhuana leh Remtluangpuii te pahnih hi an nunzia a mawi em avang leh, an kum phu lova nupa nunze mawi leh zahawm em em rawn lan tir tute an nih avang hian, Vanlung khaw mite pawh hian kar lovah khaw mi leh sa pangngai enin an en vat a.
mahse, fapa duhawm em em an neih ațanga kum khatna ah Remtluangpuii Leipui kal haw chu fur Ruah baw hmasain a rawn nan haw hrep ațangin mumal nei mang lovin chemi tlai ațang chuan khawsikin a man ta tlat mai a.
chu natna a tawrh kar khatna cham thlen niah chiah chuan, peih leh peih lova a pasal Zochhuana chu a thlahlel ngawih ngawih tih hriat zeta kuah ngawih ngawih chungin an fapa nauteah pawh țhan duhawm leh hmelțha em em mai nen chuan a peih loh san ta a.
.
Remtluangpuii a sun ațang chuan Zochhuana chuan mumal a nei thei ta lova, rambuaiin Mizoram a bawh thim chuk mai lai hun a lo nibawk nen, khawtlang lahin an duh ang takin an ni pafa chu ngaihsak reng thei bik hek lo le!
inriak an han țin ațang chuan a lusun mangang chuan kawng dang thlan tur nei lova inhriain, an kawmchhak tleirawl Thansangi te unau kutah a fapa chu a dah hnuah nileng deuh țhak țhaka Veng mawng hmeithai Pi Țhuami ina zu tlana tâp chu a ching chho țan ta a.
mahse, rambuai țamin a rawn bawh nât hnu chuan Pi Țuami pawh chuan zu bilh tur a lawi a hmuh tak mang loh avangin Sipaiah a zatve ațța phek nga, a zatve Sipai zuin an nupa a an ran neih ve te chu Chhuantea chuan a thleng ta țhin a ni.
.
A thil thleng hum țat chunga a fapa darchhuan chunga a haw leh hnak hnak lai te chuan, a nun ruak em em hnawh khat tu tur berin thehmeh ang maia a reh san tak vawng vawng avanga a rilru nâ chu a rawn zual leh em em tawh a.
chutihlai chuan, chu khaw tlai lam Ni êng hnim raih mai chuan an ral chhak tlang lah chu fur fem ruahbing tlâin chawih zeta a fawk khawm chhimbal nupa zamin an kual kul kaih mai bawk nen!
Zochhuana tan chuan a hawina lam apiang chu hnuk fan zet chunga lusun manganga zawi phah hnawkna tham a nita vek mai a ni.
.
An In rahka a han rapa, In țha leh lawi nuam tak ni lo mah se, hmangaihnain a cheimawi tlat avanga In thlakhlelawm tak leh Remtluangpuii damlaia rahka nuam leh tak ni țhin te chu a rawram ta riaua hriaiin, an luhkapui maupum ram te chu a ri bengchheng ta riau ten a hre ta hial a.
kawngkapui a han thlen hnuah zet phei chuan, a chhungril a hnuk rawn luh tu nâ em em chuan a kawngkhar dona melh reng chung chuan din tir leh detin, an kum bul ațanga furpui an luh huna an buai loh nan tia Tluangpuii'n thingai a chheh zing ami thingfak ngeiin an kawngkapui a lo do chu a tan chuan nunhlui țahna ti tam tu a chang leh lo thei ta lo!
kawngkapui nghenga țhingțhit hnawk pah chuan a fapa chu zawi muangin a han la thla a, duat taka pawm zui vawng vawngin "valte, keini pafa tan hi zawng khawvel hi a letling zo ta" tih sap pahin van sang zeta chhum pan zet zet inchhuang fan dir diar te chu zawn nei niawm takin meng dul raih chung chuan a han thlir chho vang vang a.
.
An pafa a Inchhung an han luh hnu chuan a fapa chu chhuatah chuan a han nghata, a bulah chuan a khalh nin theih loh a Nuin puan tumtela a siam sak Ball te chu a han dah a.
chuveleh a fapa chuan nui iar iar chungin a pa ngaihtuahna te chu țawmpui phalo zetin puan tumtel chu a han khal liau liau a, a hma kar hnih lo liam chauhvah a Nuin a kalsan tawh a ni tih te phei chu hnutetui chaka a rilțam hma zawng chuan a hre ngai hauh lo a ni tih te chu a hlim danah chuan a lang chiang leh viau reuh tawh a.
chu achhapah, hnutetui a chak hun apiangah lah a Nu chu zawng ve ruai ruai țhin mah se, khawvelah a Nu duatna leh hmangaihna te chu tawng ve dawn tawh lovin, thihnain an kar a daidanna chu engtikawngmaha sut pawh chi a ni dawn lo tih te chu a tan hriat thiam rual a nih loh piah lamah, a Nu chu eng emaw tiin a awm lo mai a ni ang tia ngaihtuah ve niawm taka an kawmchhak te Kel hnute an han pek hnua a nui veleh iar iar țhin te chuan, a hmu tu Hmeichhiate chu sawi loh Patling ruh chang pui pui tawhte thlengin amah avang chuan an khap per sak sak fo mai a ni.
.
Chhuantea chuan mei a han nun hnu chuan a ațța thleng pernga chu Tapchala an thirbel khai chu chhuan kai pahin a han phelh niap niap a, chumi hnuah per khat te te chuan thirbelah chuan a ur luma a ur zawh chuan thlengkumah a han khupa chumi hnuah tukverh thlang lam zawna țhutthlengsei dawh chawp zet chu a han pan thla hnak hnak a.
a fapa lah chuan chutia a pa vei vel chu a puan tumtel khalh tih lum um pah chuan thei leh thei lova lo ban ve țawk țawkin, ama thiam ang anga riat ve niah niah chung chuan a pa chu chhaih chungin a nui leh ta sen sen a.
chutia a han nuih te chuan a mitmeng mawi zet, a Nu a chhun fuhna em em kara hlimna rawn lang chhuak chu Chhuantea chuan chiang em em maia lo hmu zui leh tawhin, "Puii, hetia min kal san duh khawp tur hian i huat thu ka sawi em ni!?
keini pafa hi min han en la, i tel lova dam chhung chhiar tur atan chuan chakna reng kan neih tawh loh hi.." tia kun nghal hnawp pah chuan, an Inchhunga Remtluangpuii sulhnu zawng zawng te chu thlir kual leh nge nge chung chuan a zuno dawm lai chu kut khur hlak hlak khawpin a han hmer a.
mahse, a auha auh eih rual nitawh lo a Nupui reh vawng vawng mai chu beidawng zet chunga rum halh paha a zuno chu lem leh hramin, Remtluangpuii thih ni ațanga a ei in mumal theilo taksa chau ru zetin a hmeh deuh tlat tawh laia, a zu inin a chhung lam ațanga a rawn ur vaih leh chiai tawhna avanga a mitmeng dul zual zet chu a mittui chuan a rawn bual phe leh ta ruaih a.
.
Kawppui kalsan zun phurh beidawnnain a hmeh chauh hnawp tawh a nihna avanga, kawng awmchhun nia a hriat a zuno dawmlai la vuan ran chunga tukverh biang a la nghen hnak lai chuan, a fapa chhuata a tal liau liau lai chu run zet maiin a rawn țapa hnutetui a chak a ni tih chu Chhuantea tan chuan hai chi rual a nileh ta lo!
a maimitchhing vang vang lai chu thawklehkhatah a rawn men kawk rual chuan, khua a lo thim titih tawh tih chu a han hre nghala chumi rual chuan ruahpui vanawn lo baw hum hum thawm pawh chu a han hre thuai a.
chuveleh khur deuh dar dar chung chuan a fapa chu rang zetin a han bana, thim zingah chuan puakpuan awmna a han dap nghal chuk chuk a, a han dap fuh hnu chuan rang taka thiam mang lo zeta paw thuaiin an kawmchhak te In lam pan chuan a sur a sur chuan an pafa chuan an inpaw chho leh ta hnak hnak a.
mahse, an kawmchhak te In an han thlen dawn chuan an rahka sir bang ngheng chuan an pafa chuan dithlifarfem hliap phak chin leh chin lohvah ding leh detin, vawi tam an Kel hnute an han ban tawh avanga a inthlahrun tawh em avang chuan Chhuantea chuan let leh duhna rilru a pu hnuhnawh ta ut ut a.
mahse, chutia let leh mai tuma an pafa a an inher lai chu sumhmuna Pu Kapluaia Archhiar en fel chuan a rawn hmua, rang taka Inchhunga lut tur chuan rawn auvin a fanu pakhat zawk chu naute lak sak vat tur chuan a han hrilh nghal thuai a.
.
Inthlahrungin hreh em em tawh mah se, zah dawna Pu Kapluaia sawmna chu hnial luiha a fapa lainatawm zet chu rilțama dah chi a ni lo tih a hre reng si, ți deuh taka Pu Kapluaia te Inchhungah chuan huh pafa kiang chung chuan lutin Pu Kapluaia fanu te'n mittui hru ru fap fap chunga Nu ber hoa a fapa an rawn lak sak lai te chuan, Chhuantea chu a thawmhnaw huh inthlahrunpui zet chung chuan sumhmun lamah chuan a han tawlh chhuak leh deuh dat a.
chutihlai chuan a fapa rilțam vawt ti chuan a pa chu rawn melh țawk țawk chung chuan țap hliam hliam chunga rawn ban lehin, Pu Kapluaia fanu te'n an thlem viau pawh chuan a pa chu a la beisei tih hriat zetin a la ban ve dar dar mai a.
mahse, chutia sumhmun lam awn deuh tlat chunga a la ding reng lai chu Pu Kapluaia te chhungkua chuan, mei lumah chuan inhem vat tur leh inthlahrung lo tura an rawn hrilh liam liam reng bawk avang chuan tim deuh taka mei lam chu panin, a fapa pawh chu an han tih lum hnua Kel hnute an han tulh hnu chuan a rawn nui leh ta iarh iarh a.
.
Zan rei dawn thlenga an pafa an han awm hnu chuan Pu Kapluai pawhin Chhuantea chu lungngai lo tur leh Naute tan chuan an Kel hnute chu an dah reng thu te, an mamawh apiang chu an hnenah chuan lama ei in pawh an neih ang ang inban tlang tura a duh thu te a hrilh hnuah an pafa chuan an inpaw haw veleh ta a.
mahse, an In khawhar thlak zet an han luta ei in zai pawh rel zui leh tawh lova an pafa a mut an han tintuah lai chuan, Chhuantea chu a ngaite bawkin a Nupui Remtluangpuii zun ngaih leh lunglen chuan a rawn bawh leh nghal lo thei silo!
an mutbu vela Remtluangpuii sam rim la nam chek mai te chu Chhuantea chuan mittui far zawih zawih chunga hnim leh vang vang țhinin, "i zun phurh leh i fam ngaih lunglen tawrh meuh hi zawng ka thawh chhuah pui zo tawh dawn em ni le!?
Mipa fa tan meuh pawh kawppuite inkal san meuh chu nun chanve hlohna a lo nih ngai hi le, i kianga riahrun rem leh theih ka va'n chak tak em Tluangpui"
tia phun chhuak sap chungin a sira a fapa muhil sek sek lai chu a țang chhungah chuan mittui tla zawih zawih chung chuan a han pawm ta vawng vawng a.
.
Zan a han rei chhova ruah lah chuan bang ta nge ti bik hek suh! a hmangaih ngaia a fapa pawm chial chunga an nun hlui chhui zar zar chunga Chhuantea mu pawh chu a harh tulh tulh mai si.
zanlai Ar khuan thleng rawk maia chutia tal tal ta chu țhenrual te'n ti tawh lo tura an tih hnua a insum luih hram hram țhin, zan laia Tluangpuii Thlana a kal duh țhinna thinlung chu a rilruah chuan rawn nei leh thutin a fapa chu a maha dah chu phal lovin a mu tui lai chu thiam mang lo zeta a puak hnuah, rizai chuan hul thei ang ber tura tuamin Thlanmual lam pan chuan a sur a sur chuan an chhuak pafa leh ta tawp mai a.
Thlan an thlen hnu chuan Ruah leh Thli lakah pawh him pial se a tih avanga Dapa Tluangpuii Thlan a zar khuhna te chu uluk taka a kar awng te chu sawi phui deuh nawk nawkin, a hnuai Thlan chhinchhiahna Kross inphun bulah chuan a fapa pawm chung chuan beidawng zetin a han țhu ngawi leh ta vang vang a.
mahse, rei ngawi thei lovin Tluangpuii hming chu zawi sapa lam leh țanin a fapa biang leh a biang insik tir chaih chung chuan a mittui dan rual lohva rawn tla zawih zawih mai chu zak deuh tak chungin a han hru leh mawlh mawlh a.
mahse, an inhmangaihna avanga engpawh huama an la dai ngai lohna thleng rawka an inzui tawhna te hrethiam ve lek lova, an inhmangaihna par vul lai thliah saka thihnain a rawn pawh țhen zui vat avanga a tawrhna namailo zet chu Mipa fa a ni chung pawh chuan tawrh dam rual a nih loh avang chuan, chu zan pawh chu Chhuantea chuan mittui nen a fapa biang leh a biang chuktuah tlat chung chuan a hmangaih Thlanah chuan a hmang tlingtla leh ta țhak mai a ni.
.
Chumi ni ațang chuan an țhenawm zawng zawng te chuan, Chhuantea te pafa chu ngaihtuahna thar nena ruahmanna thar siampui mai chu an rel ru deuh țan ta a.
mahse, an ruahmanna te chu Chhuantea chuan a remti dawn hauh lo tih an hriat avangin, a ruk deuha an tih tlang loh chuan a fapa tan pawh hian rei tak a dam theih an rin loh deuh tlat tawh avangin an tum chu tih tlang an tum ta a.
chumi ni tuk lawk chuan an rel ruk ang chuan, an pafa hriat lohvin Aizawl lamah Pu Kapluaia chu liam thla thuaiin a chanchin chu țhenawm khawveng te chuan an pafa enthla deuh reng chung chuan an lo ngaichang ta a ni.
.
Tluangpuii Thlana an pafa a an riah leh tak fo ațanga a kar 2na tur tukkhat chu Chhuantea chuan, an Arpa chu khawhlui tlang lamah a fapa darchhuan chung chuan a ak liam leh ta hnak hnak a.
mahse, khaw thler sang lai an han chuan chhuah rual chuan a mitmeng dul raih mai chu thawklehkhatah rawn khap deuh sak sakin, a dinna piah pen sawmthum vela hla In pakhat bula a Pa Rochula leh a farnu te pahnih Zamteii leh Rampuii te, Remtluangpuii Pa Darruma leh a u Thangkunga te lo ding țhap mai chu chiang zetin a han hmu a.
chutia anni ho a han hmu hnua ringhlel deuh taka a melh fiah leh deuh hnu chuan, a hnung lamah chuan inher vatin chak takin a han kal nghal thuai a.
mahse, a han kal țan chiah tihah chuan a farnu Rampuii leh Zamteii te chuan "ka u, ka u" tia țap deuh țiau chunga rawn auin, an pafa chuan an vai chuan an rawn fin chawpchilh ta thuai a.
tualchar pawh nise Pu Rochula leh Pu Darruma te chuan an fapa leh an tupa te pafa, thawmhnaw hlui zet zet inbel chung leh hrehawmna nasa tak an tuar a ni tih hai rual lohva an che reng reng pawh chau ru zet chu an en thei ta ngang lo!
ngaihdam dilna thuin Aizawl pa neinung pahnih te chu an fapa leh an tupa te hmaah chuan țhingțhit tir nghal rawpin, "ka fapa Chhuante, Tluangpuii nen khan in awmna hre reng chungin rambuai kara tawh sual tawh palh thulhah boruak muan hun nghakin a Pa nen hian rawn hruai dan tur che u kan ruahman nitin țhin asin, tunah erawh kan tlai ta hret a ni tih hi in chanchin kan dawn ațangin kan lo hria a. chutah meuh zawng engmahin min dang thei turin harsatna min siam tur a ni lo tiin hei kan rawn kal rawih mai a ni" tia kunin mittui far zawih zawih chungin a fanu te'n afapa kut ațanga țap chunga a tupa an lo la lai chu Pu Rochula chuan a han ena.
chutah meuh phei chuan a tupa hmel duhawm em em mai chuan thisen inzawm an nihna ațanga lainatna thuk em em mai chu rawn neih belhchhah tir zuiin, a fapa Chhuantea chu lungchim zeta pawm thlawp pahin a Nuin a ngaih zia thu nen, ngaihdam an ngaih zia thu te chu a chham nawn leh ta mawlh mawlh mai a.
chutih lai chuan Tluangpuii pa Pu. Darruma pawh chuan zak ru emem leh hnuk ulh zetin Chhuantea chu rawn hnaih chilh thuaiin a fapa Thangkunga nen chuan mittui tla țeuh chungin ngaihdam an rawn dil ve mawlh mawlh reng bawk a.
Vanlung khua te chuan chhungkua inhal tawh te insuihkhawm leh mek chu a khawnawt deuhthawa mittui nen rawn thlirin, Remtluangpuii thlarau pawhin an inremna thu chham chu nui ver ver chungin an chung van sang ațang chuan a rawn thlir ve ngei ang tih chu an ring ru țheuh hlawm a.


                                        

THALFANG LEH MILU, BUNG 14

THALFANG LEH MILU

A tunu an rawn hruai na kawngah ral che maksak zetin kawng lakah a lo chhuh hnu a, an ral rel a per ṭhelh ta fo mai leh a fapa Mangbula te chhungkua lah  Zadeng Lal Dengphunga salah a tlu ta bawk si te, an Pasalṭha te an chan tam zawk telh telh mai te chuan Lal Darrawta chu a ti mangang telh telh a, chu a chhapah a khat tawkin khatia a fapa te ho khua an rawn luh khalh aṭang khan Rawlthar leh Pa ṭhen khat te chak ilo lama ram lama chhuak leh dai tam hrut te hi lu bungin an chhar zui zing ta tulh tulh mai bawk si! Zadeng Lal leh a chekawi te hnenah chuan lam kal tirh vata an Lal nu Darluti leh a fapa Mangbula te chhungkua chu inthleng puiah sawm a ṭhat a rin thu a Mualkil te hnenah chuan a sawi ta deuh zauh zauh va.

Hetia a rilru a siam fel deuh titih tawh lai hian Zadeng Lal Deangphunga leh a fapa te erawh chuan funpui an er leh mek tawh a ni tih a hre hauh silo!
a fapa te ho nen an han inrawn kual vek hnu a hma lak dan tur an rel hnu chuan, a Mualkil mawng zang pahnih Darkuala pa leh Satluaia Pa te chu Pasalṭha pali nen Khanmual khua Zadeng Lal Dengphunga chu be turin a tir liam ta nge nge a.
an kal dawn hian a tunu chin kha an kut aṭanga a chin bih hmuh zui tur awm lova bo a nih miau avangin Lal nu Darluti bakah thil dang an ngen a nih pawhin "kan Lal chuan, i tunu chungah erawh thiam ka inchan loh chu a chhapah, kan valh chin ram pel rawka chhan tuma kan um chung pawhin he ral maksak zet hian Huai chawi takin a chawi a, ka Pasalṭha te meuh laka heti kova a hnu zui tur a thlah duh hlek lo hi zawng ka tan tha lak zui ngaihna a wm ta lo a ni han ti tawh u" tiin a chah a.

An Lalpa thuchah hian Darkuala pa leh Satluaia pa te hi a ti thaza lovin, an chhuah ni tlai lama mual rem deuh laia Buk an han tuk lai te chuan "Lal Dengphunga hian a tunu hi la thukru ah min lo ngaih chek zawngin, nuam kan thai lo cha ta ve ang ka ti Luta pa.
bumna rawlh tum hmuha min hmuh loh nan, kan Lal Ṭhi leh Ro hi phal chin nei mang lova kan sih hmuh a ngai mai tang tih pawh ka hlau hlel lo ve" a ti charh charh a.
Luaia pa thu lak kam keu chu Darkuala pa pawh chuan a ngaihdan leh huphurh lawk a nih ve riau avang chuan, an Pasalṭha hruai te pawh chu thu zep chin nei lem lo chuan an hma hun tawn tur huphurhawm ang reng zet chu a hrilh ta law law a. anni pawhin an Mualkil te chu a ṭul chuan, an thih thlenga an thlawp tur thu an sawi liam liam hnu ah "tlawm zawk chan chang lova Sa-ui tanpui tur atana sawm mai tura kan Lalin chet a lak hun hi a tlai hretin a rinawm dah mai si a, a tunu kha hruai lui lo khan, a fapa Mangbula te chhungkua an sal hruai velehah khan Sa-ui tan hi rawt ta zawk se a fin thlak zawk awm a sin maw" tiin an Pasalṭha hruai te zinga a thupui rel deuh ber tu Kelzinga chuan a ngaihdan chu a rawn sawi chhuak ve ta phawng a.

Mahse, thu liam tawh dawn ṭhat leha an chet awng tawh na lai bel phui leh tumin awmzia a neih loh zia hre thiam rual ṭhiau ta na na na chu, "Lal dengphunga chu kan be hmin zo ta lova kan chungah hriam a lek ta a nih leh ruam khatah kan tlu tlang mai ta law'ng" tiin Darkuala pa chuan an hhma tawn tur a huphurh zia chu rawn sawi chhuakin, dama an let leh chu a beisei lo lek lek hial a ni tih thleng chuan a sawi fai ta leng a.

Mualkil Darkuala pa thu dawn hi awlsam te in a thleng thei tlat mai tih hi an vai hian an hai tlat lo! Zadeng Lal hian a tute zingah pawh Darhliappuii hi keh thei dawmin a dawm tih bik riau tih hi an hai lova, chutak chu anni lam hian a thin deh na atan hmanrua ah an hmang ta kha a ni miau mai a.
Darhliappuii an zuk man lai khan, hei tak hi an Lal fapa Bualmanga leh a kawite phei kha chuan an hre chiang tawka, Lalnu Darluti leh Hliappuii te hi an hreng tlat anih chuan Lal Dengphunga hian anni pitu thleng nan hi chuan eng pawh a phal thuaia an rin chu a chhapah,   anni pitu hi an beng dar hawlh tu atan thah ah an vau chhen anga chet lak pawh an huangtau zui ngam an ring lo viau reng kha a ni a.
an rin ang chiahin Lal Dengphunga Pasalṭha te pawh Darhliapuii an lak aṭang hi chuan an han tawlh hret reng a, an khaw luh chilh hmabak pa ber Darrawta khua pawh an rawn kai ta mai ngam lo ngei kha a ni a.
mahse, kawngah an beisei loh deuh hunin a nang thuta, Darhliappuii ber chu Lal Darrawta khaw ram valh chhungah ngei Khual hruanghrau na zetin a put bopui ta daih mai si!
chutih laiin, Zadeng hovin a unaupa Mangbula khua an chil ram ṭhak hnuah a nupui fanaute nen lam an sal man hmiah tih an han hriat takah kha chuan, a khat tawkin rawlralin an rawn che zeuh zeuh zui ta tho bawk nen tlawm ai chuan tia Sa-ui tanpui kha Bualmanga khan a a pa hnenah a lo rawt ru daih tawh zawk a ni.

Ni lu liam turin khaw thlang lam Tlang dung lian fe Bawk Tlang dung chung mai Suk chen vela sanga Romei paw chuk a han ṭhuta, Sial leh Vawkpui no hruai te pawh daiah an rawn lut khup khup tawh a, Tleirawl leh Naupang te pawh Tuium khirhin an inzui haw thliai thliai a an hnungah Tlangval te'n Muzuk fei leh Phaw nen an chhawma, Ralveng tur Tlangval rual hnih rual thum te pawhin hriam chikim nen an khaw khan an pan mek bawk a.

Chung ralveng tur te'n ven Buk an han luah ṭan chauh tihah chuan, an thlang lawka pa paruk rawn hui chho dap dap te thawm chu an han hria a, chuveleh an zinga pahnih chu thawm an hriatna lamah chuan an liam thla zauhva chiang taka an zuk bih hnu ah, Kulh lam pan chuan an rawn let leh vata an hotupa Satbawnga hnehnah chuan pakhat zawk chuan "ral angin rawn lang mah suh se, pathum chuan Silai an pu a an zingah Mualkil tih hriat zet pahnih an kawi tel ve teh khiah a" tiin chung ho chu khaw la en laia rawn lang an nih chu thuhran, ngaihṭhat lohna tham an nih a rin loh thu a han hrilh a.

An rin ang chiahin anni ho chuan ṭi deuh tak chunga relven Buk aṭanga mautluk hnih vel leka hla aṭanga an ralven Buk an rawn thlir ṭhap lai chuan, an zinga upa ber chuan a 'aw' a then kharh kharh hnu ah "nau te u, inral melh tura rawn kai kan ni lo ve.., in Thalfang min thlah khum lo hram u la'ngin, thu ṭha i sawi zawk ang u khai.." a rawn ti ta a.

Chutia han en reng reng pawha Mualkil tih a hriat viau chu a chhapah, a pa rual dawna kum bih tam tawh tih hriat zet, a rawn ṭawng zawng pawha a khabe leh a hmui chung lam inpelh sawlh leh deuh bap bap ṭhinin thu tluang tak a rawn aupui takah chuan, Khanmual Pasalṭha Satbawnga chuan din chhuah pah chuan a kut a vai lauh lauh a.
ralven Buk tual an rawn thlen hnu chuan, an thu ken chu an Lal hnena an thlen hma chuan sawi a rem chiah loh thu te, rem thu kenga kal an nih thu leh Fanai Lal Darrawta Mualkil leh a Pasalṭha te an nih thu erawh chu an sawi hnu ah Satbawng chuan a naute ziga pakhat chu a han hui hranga, "khuain min thim chhilh tak tak hma hian, anni ho hi khaw chhungah va hruai tawh khai.
kan Lal In erawh kaipui ngawt lo la'ngin, Mualkil Hulha pa In pan hmasakpui la, chuta ṭang chuan kan Lal chin chu an hre hmasa zet turah ka ngai e" tia a chah hnu ah chung mite chu a mi tirh chuan khua a luhpui ta a.

Lal Dengphunga chuan, zan riah bar zawh hlima a Mualkil Hulha pa hova a In chhunga khual rawn kai mek te chu a Vaibel lu tuai vut vut chung chuan a han melh kual a, chutah a duhtawk a en fiah ta a nih teh chek a niang chu, chhuat biha a buk leh tluk hnu chuan a rawn dak chhuak leh a an zinga upa chan chang ber Lal Darrawta Mualkil Darkuala pa chu a han melh binga a Vaibel a pak tual hnu chuan, "ka chhuatpui in rawn ai hma khan, in thupui rawn zakkep thu chu in thlen In pa Mualkil Hulha pa hian min lo kam thawt lawk tawh a. thu zam dam nge nge zawng a zui pawh a nuam ngai e an lo ti ngai a,
Lalnu leh ka tunu te chu an ṭha maw"!? tia thu bul a rawn ṭan hnu chuan Tlangaupa chu an Mikhual te tan chuan a zupui kai chhuaka sem nghal tur chuan a han ti a.

An thu an han sawi kai thui tak deuhvah chuan, Lal Dengphunga chu a lung a dam ta hauh lo mai tih hriat zetin a nur tulh tulh a, a tawpah phei chuan Darrawta Mualkil leh a Pasalṭha te'n an huphurh lawk ang ngei chuan a mitmeng chu anni ho hren duhna leh thah mai duh na rilru a pu tih hriat zet chuan a rum tawh ul ul hle a.
mahse, Mualkil rawn kai belh zel te chuan an Lalpa chu inbengdai tura an thlem tak sap sapah chuan "sa-ui kan tan dawn a nih hrim zawngin, in Lal Darrawta ram valh chin leh a a fapa te rawm valh bakah a ro khawlna Thul thlenga Chemteii chu zawnga kan dap a ngai e.
chuti a nih loh zawngin nangni leh keini hian thu khat zai kan zap ngai lova nga, Ruh filh ṭhiau thlengin kan in ral rawt ta law law mai ang chu" la ti chhur chhur chungin Lal Darrawta Mualkil pahnih Darkuala pa leh Sattluaia pa te chu thip zetin a Vaibel dawn seh ri deuh rup rup chung chuan a han melh leh khuih khuih a.

Zan tairek dawn thlenga an han chai takah erawh chuan, Darrawta Mualkil Darkuala pa chu Lal Dengphunga chuan mihring daw-ha tak hmuhin a hmu ta lo telh telh a, a thu pawh a ngaihchan chhoh tak riauvah chuan,
"Lalpa, i chhawn kan dawl lo ve tiin, remthu hi tlawm takin kan rawn zakkep ta dah si a.
kan han chhuak hlawta, i tunu kan lam tel dawn lo tih hian kan chel a luh tak ber chu a chhapah, kha ral Huai ho fachuam nia mawi, i tunu hruai tu khan a hnu pawh a thup zar zar tih te hi i bengah thlen viau pawh ni ila kan thu leh Ui beng hlin tur i hmuh loh hi kan hlau em em a, mah reng reng se tiin, thih leh ruam khatah kan tlu tlang poh a nia'ng chu tiin kan rawn fin ta rawih che a ni tih hi min awih sak hram teh khai.." tia Darkuala pa-in dam thlapa a zahngaihna dil pahfawma dawt thu mai pu puka a tlang rawn kai an nih loh zia a rawn sawi leh takah phei chuan, "naktipah in khaw khan zawh chuan liam leh ta u la, Chemteii aiah i ro ka chhuh che a ngai e.Lal Dengphunga chuan a ti e han ti tawh u. in rualin ka Pasalṭha leh Tlangval sawm an rawn kal ve anga, chung ho chuan in khaw Silai ṭha ṭha fung hnih aia tlem lo an lak bakah in Lalpa Thul an hai bawk anga, a Sial zinga an duh duh sawm an rawn an rawn kai haw bawk tur a ni. Lalnu pawh an rawn hruai haw anga, Aitam Luiah keinin Mangbula te chhungkaw hruaiin kan lo nghak dawn che u a, Sa-ui pawh kan tan nghal mai a niang chu" a ti ta a.

Lal Dengphunga thilphut chu an rin lawk ai mahin a neu lo hle tih chu Lal Darrawta Mualkil leh a pasalṭha te chuan hre mah se, an inral nawr zel chuan tlawm hun an la nei nge nge dawn thova an hriat ruksa reng avangin an mahni ṭawng chuan an han inrawn kual sap sap a.
a tawpah chuan an hmuipui pu ber Darkuala pa bawk chu Lal Dengphunga thu chu hmaih nei loa an Lal hnen an thlen vat tur thu rawn sawiin, "kan tlang kan han kai ve leh anga, kan Lal hnenah i thu hi kan thlen hun chuan ani paw'n i tunu chunga hriam a lek loh zia tih chian nan pawh i phut ang hi a hlen ngei ka ring e" a rawn tih ve leh charh charh hnu ah Lal In aṭang chuan thu dam zawk nen an ṭin thei ta hram a.

Thu chhe duha put puk tur zawnga tap ta reng reng chu, a Pa hun lai aṭanga mi hnawksak Ralkupa leh a tupa Laivela te putu pawhin an Lal leh Fanai Lal te Sa-ui tan inrem tur thu chu a zan a zana an hriat ruk leh tawh avang chuan, an putu chuan varṭianah ralveng ho bula an dawt bawl puah chawp hmangin khua chu an chhuah san thei ta mai a.
tun ṭum an chhuak phei hi chu nawm sakna tiam tu an thuruk thlenna ṭhin Lungtian Lal Keihawla bel nghal tura chhuak an nibawka an phur putu sar sar hle a.
mahse, khaw dang Lal bel tura chhuak an nichung hian an kal ti sawt lo tur thuam leh rit dang bakah thup har tur thil chu an keng duh tlat lo, a fing vervek ta na na na chu ral veng ho pawhin eng dang nena chhuak an nih loh avang chuan anni putu In thar khawr tum Sut ban tur zawn tura chhuak inti ta na na na chu han bih zui ṭul an ti lo tawp mai a ni.

An khaw paslṭha verther zet Zatuaka nena thuchhia an neih avanga an Lalpa Khawluta sut vuana tlan luta him ta hram Laikherha chuan, Lal sal a nih phahna an khaw pasalṭha Zatuaka dawt bawl chu theihnghilh a hnekin, pa dawih chhe lem lo tak a nihna avang chuan phuba a lak ve theih dan tur a melh ve khiau reng a.
chu a duhdan tak chu an khaw Lal tunu bo an rawn hmuh ruala rawlthar sal danglam zet an rawn kaih haw ni chuan ngaihtuahna fim zawk nen ruahmanin, an Lal tunu lo haw leh ta leh a hruai bo tu an man lawm pahfawma an rik luih luih tlai lamah chuan, an Lal Khawluta hnenah chuan a Aiawt chiah zuk bih lawk a duh thu leh varṭian aṭanga Sial tlat mual tur ṭha zawnga chhuah leh nghal a duh avanga, hemi zan hi chu a nupui fanaute bula riah a rem tih leh tih loh a han zawt a. Lal Khawluta chu a lawm vawrtawp hunin a thil phal lai ber hun a lo nih tir ta chiah bawka, rui meng phak chapa a sal Laikherha chu a melh kik deuh haih hnuah a ngenna chu a 'aw' liam ta ngei a.

Laikherha chuan hun rei tak a hmuh tawh loh veng mawng lama an In chu a han luta, a Nupui fanau chhangchhe zet te chu thukhawchang a han sawipui a. chumi hnu chuan a tlai a tlaiin Chem tum nen ram lam a pan ta vang vang a.
Lofing sawm dawn a thlen hnua thimin a rawn chhilh tak hial hnu chuan, Buk sualin mual pawng deuhah a innghah hnuah a tuk lama a kal leh zel dan tur ngaihtuah ran chungin a chhing zui ta a.

Mahse, rei a tlu zal hman awm lo ve tihah chuan a Buk piah a meipui chhehin a en chin leh chin lovah chuan, Perh ṭawi lian zet zet karah pa pahnih rawn kun phei da da hi chiang mang lo zetin a han hmu a.
chuveleh Laikherha chuan a Chem tum chu lek nghal vat chung chuan "ral in nih leh tual mi in nih ka thliar lo va, ka chunga hriam lek duha min rawn bih in nih hrim zawngin a tu emaw zawk zawk kha chu ka han thih chilh teh ang che u" ti chungin a meipui chheh chu a thai mit nghal thuai a.
mahse, chutia insangmar ru al chunga thim zinga a Chem a lek sau pan tawh lai chuan "ral kan ni lo ve, Lungtian khaw kai tuma kal kan ni a, kan kawng chin zawh lai kan bo a talangin kan putu hian he ngaw hi kan rawn lut ta mai a ni e" tia putar 'aw' chiai zet rawn ṭawng ri avang chuan, tlema a inthlah dul deuh hlek hnu ah a meipui chheh chu Laikherha chuan a fawm khawma a lakai leh ta a.

A 'aw' rawn chhuak ang tak tak khan a hma a mipahnih rawn lang pakhat zawk chu a zang a kul titih tawh mai bakah, pakhat zawk pawh chu a mah ai chuan a kum bih a tlem lo ang tih a hre chiang viau a.
an han titi thui tak deuhvah phei chuan, a Buk khual te putu chu a kal tumna zadeng Lal Dengphunga khua aṭanga rawn chhuak an ni tih te chu a hre ta a.
anni putu lah an ṭawng a kal dun barh barh bawka, an kai tumana Lungtian khaw Lal Keihawla thu vuakpui Sialbuan khaw pa lakah chuan an khaw Lal chanchin leh Fanai ho nena an inral nawp dan te, an Lal Dengphunga tunu bo dan leh a hruai botu chanchin an hriat ang ang leh a pian zia nen an sawi nasa ta mai a.
a tawpah phei chuan, an Lal Dengphunga chu Lal ṭha tak a nih loh avanga an chhuah san tak mai thu te chu an sawi thleng titih ta mai a!
vertherna hian fin chang riau neiin midang bum turin inpeih at reng mah se, rahbi zal deuh a thlen hian a tawlh leu khet ṭhina chu chu siam tu'n sual inthup hlen tur kharh chhuahna atan a phum ruk tlat avangin, sual chu a inphum bo kumkhua thei tlat lo!
chutiang chiah chuan, Ralkhupa te putu pawh hian an fin verther tluan teuh kher nen Sialbuan khaw pa lakah hian an tawlh leu vei reuhva, Lal Dengphunga tunu ro bo tu hi an khaw mi te'n sal mana an rawn man Rawlthar nen khan a pian zia a inhmu chiah tih hi Laikherha hian a hriat nghal riau chu a chhapah, he mite putu thu put hnawk hi Lal Dengphunga tan hian a pawi thei hle dawn tih a man thiam ta tlat mai a.

Chutah chiah chuan, Lal Dengphunga tan hian thuruk thlen tur a zakkep ta tih a inhre thuaia, chu a thu zakkep ngei chuan lung muang taka a khaw mi lehsa ni thei tura a lo pawm theih na hun a hawn sak ta chiah bawk tih pawh a hre chiang ta khiu khiau hle a.
chuvang chuan, a Buk khual te pahnih chu rilru hmang taka a kawm deuh fe hnu chuan, inveng ran chunga a mut hnu a tuk zing van var ruala kal tura a insiam lai chuan "tuna kan tapna mual hi hmar hawiin zawh ta zar zar ula, Lofing riat vel in luh thlak hnu ah chhuah lawiah Tlang lian lote in hmu anga, chu Tlang chu in kai chhoh hnu chuan ruamah in tla thla leh anga, chu ruam chu chhuah lawi zawnga in chhir leh deuh chuan Tlang pang dam zet in kai leh anga a chhip in thlen chhoh chuan a piah mai Tlang bial deuh hmum chu Lal Keihawla khua Lungtian chu a ni tawh e" tiin a bo zawng hlirin ram chin a han kawh hmuh ta a.

Laikherha hian hetia ram chin a tirh bo loh hi chuan, tuna an awmna Ngawpui hi Lungtian khaw ram valh a ni tawh tih a hriat chian avangin Lal Dengphunga khua Khanmual a kai hmain anni hian Lungtian hi an kai anga, Lungtian Lal Keihawla'n Zadeng ho nekpui tura thu khat a vuakpui an Lal Khawluta hian Zadeng ho chu Fanai ho nen Sa-ui tanin an inrem vat dawn tih hi he mite putu ka aṭang hian a hre nghal anga, chutia an awm khawmuang tawh lai chu Lungtian leh an khua Sialbuan ṭang kawp hian an rawn run thut thei tlat tih hi a hre chiang em em a ni. 

Chalvunga chuan, an khung na Thingtuai ram ngheh tlat kar aṭang chuan Lal mual tawp lehlama Lal In leh Mualkil te In bawk ngir khup chu zing fimah chuan a han thlir pheia. mahse, chutia a inbeng khalh ṭalh ṭalh lai chuan, a nak hliam leh khua an luh hlima Talhtuma an vuakna a Lu hliam thi khawn uaih tawh chu intiam rual ni awm ang hrimin a rawn na zual thuta, luhaia a bawh leh deuh rap hnu ah a nghawnga an hlinna ramhrui lian tel tawl zet chu a han dapa vawihnih khat chu a han phih deuh sak sak a.

Chutih lai chuan, Lal In aṭang chuan pa pahnih leh Parchhingpuii te rawn chhuak mek chu a han hmu a, a bul an rawn thlen chuan pa pakhat zawk chuan thah a hreh hauh lo tih hriat zeta rum zeta rawn melh chung chuan "Chemteii i hnuh bo avanga kan buaina kha a namen lo hle a, kan chutih laiin, khawi Lal khaw mi nge i nih lah i zep teh chai a ni awm a! i lu hi kan pasalṭha te'n an lam chak hliah hliah tawh hle a nia" a ti chhar chhar mai a.
chu vauna 'aw' chu Chalvunga erawh chuan a ngai pawimawh chiam lo tih hriat zetin, chung pa pahnih te'n an hmuh lohna lam aṭanga Parchhingpuii'n a nak hliam laia enge maw a kut hmawr zum sal maia kai liai chunga a rawn ban da da ṭhin chu thlek zauh pah chuan, "i chungah khan ṭhatna thu ka rawlh ngai lo em ni!? eng aiah nge hliam tuar chunga ka tlukna hmun kha ral ho hnenah khan i lo hrilh chu ni"!!? tiin Parchhingpuii chu zawi thawp satin lungawi lo tih hriat zetin a han chhal deuh salh a.

THALFANG LEH MILU, BUNG 13

--Llpa rokhum//Chalvunga chuan a Buk awmna lama muala thawm awm tlat chu ngaihṭha lo zetin a han ngaithla a, chutih lai chuan kawl a eng hnai awh tih hriat zetin Ngawpui hnuaia sarthli tleh kual hum hum a han duk hnu lawk chuan khawchhak thli fim a rawn tleh hiau hiau bawk nen, a hliam tawrh mek lah chuan a kawchhung lamah na kalh deuh ṭunga khawp a ṭham tlat bawk si avang chuan, a bawh hle hle na bula Kaihzawl hnah chu a nuai nawk nawka a hliam laiah chuan a bel sawk sawka a bel bang chu a hmawm zui mial mial a.

Reilote ah a Kaihzawl hmawm chuan a rawn chhawka, a mit vaih deuh riau tawh te chu a rawn fim leh veleh chuan khaw var chian hma ngeia ral ho zinga a mi duh Ralthuma chu thah leh ngei rum chuan a Thang valh tawpna tur chu pawt per turin a inbuatsaih ru leh ṭan ta a.
mahse, chutia a rilru a siam leh rauh rauh tawhna chu a hliampui tawrh mek chuan a ti ṭhuanawp zui dawn nge? tih te chu Chalvunga chuan hre pha tawh bik hek suh le, a farnu Hliapuii that tu ngei nia a hriat a hlah ai chuan thih chilh rak erawh chu a ngam sak sak tawh em avangin a hliam tawrh avang chuan a chauh chhiat thulhah tiin, rang taka ral ho chu hmachhawn leh tumin a Buk lam chu bawkvakin a pan chho ta nge nge a.

A han luh thui deuh hnu chuan, a rin anga a Buk tukna leh ral ho insawnna hmun chu mual thuhmun nitawh mah se a lo inhlat deuh avang chuan thawk khat chuan a veng ta deuh a. ngaihtuahna fim zet neia tawlh ta na na na chu, a Buk tukna Thing bul a han thlen chuan thawm nei hlek lova a mit leh beng a chhit kual leh hlek hnu ah a Buk aṭanga ram hrui rawn uai thla sungah chuan a ban kai chho ta a.

Thingzar pheng hlai zet nghenga Parchhingpuii lo la ṭhu muhil chuan Chalvunga thaw ri hap a hriat veleh chuan, muang changa che deuh ṭiah ṭiah chungin Chalvunga chu biak mai tumin a ka a han ang ziau a. chuveleh Chalvunga kut bawr lian hlap mai chuan a ka chu a rawn khuap phui thuta, "ralin kan hnuai mual khu an rawn luh pawh tawh a, thawm chhuah a hun lo ve" a beng si cheta rawn tih sap pah chuan, a ban tha chak zet chuan a pawm zui nawlha Thing zar chhim lam hawia zar phei du ah chuan thim zingah chuan a lawn pheipui ta zawi zawi mai a.

Ngawpui chang chung lama hrui zam inphan kalh nuai kara thawm nei mang lova thui fe a ban pheipui hnu chuan, chhuah lam Thingzar buk thim zawk lamah mautluk hnih dawn a kai pui leh a, chuta ṭang chuan chhim zawng bawkin lei lama chhuk hniam hret hret chungin Chalvunga chuan a ban pheipui leh ta a.
thim chhah tlat kar a ni bawk nen, Parchhingpuii chuan chutia Chalvunga'n a kawng fek rat laia kuah bet tlat chunga a ban kualpui fe mai chu a ngaihna a hre lovin, a chang phei chuan Chalvunga chuan a thlauh anga an ban mekna aṭang chuan a tla hlum mai ang tih te chu a hlauh em avangin a khur leh hlak hlak ṭhin a.
mahse, a mah kuah bet tlat tu ban phiar fuat mai chuan a man ngheh em avang leh a ni pawhin a dar leh a nghawngah a uai beh ve tlat avang chuan, a duh na hmun tak a thlenpui hma chu a chawlhpui dawn chuang lo tih hre reng chungin thawm chhuah ngam lek lovin a invuan nghet ve sauh sauh ṭhin a. 

Lei aṭanga sang lote an thleng ta tih hriat zeta, Chalvunga'n a ṭhut tirna Thingzar awn du hnuaia a zuan thlak san hnu ah chuan, thawk lak hah pahin Parchhingpuii chuan a Puan bih Chalvunga'n a hleh ṭhen sak tawh tawngchham fe siam ṭha ve sat sat chung chuan a bul vel chu a thim a thim chuan a han hawi kual ve riai riai a.

Rei lovah khua a rawn eng ṭana, Chalvunga bo vang vang rawn let leh thawm ri sat pawh a hnuai Perh leh Ṭhang buk karah chuan a han hria a, a hnuai lam chu khawvar eng ruai tawh hnuaiah chuan a han kual ve nasa ta hle a. 

Chutia a hawi a hawi lai chuan, Chalvunga chuan a hriat mang lohna lam thim zing aṭang chuan a beng bul chetah a hmui a rawn dawh hnai thuta, thawk a lak hak hnu ah "khai le, i nuṭa Ralthuma kha han ko teh khai" a ti ta sap a.

Chutah zet chuan Parchhingpuii chuan Chalvunga thil tum chu a hre chiang ve ta kher mai!
a mah chu chawhchahin, a mah zawnga chu an tap na Ngawpui pil rawn lut te chu an khaw Pasalṭha te an ni tih a hriat chian bakah an zingah chuan, a u kher kher chu Chalvunga mi duh tak chu a ni tih pawh a hre chiang ta hle a.

Thupek khauh tak avanga rilru hrehawm zeta a kun zawi hnak lai chuan, Chalvunga chuan a hma aia fiaha ti tura a tih chu ti vat tura rawn tur lehin "ka sawi kha i man fu lo deuh nge ni!? i nuṭa au rawh ka tih kha maw" a rawn tih ram tak deuh hmakah chuan, Parchhingpuii chuan Chalvunga thu pek chu a hnial ngam ta ngang lo!
Parchhingpui'n a u hming lama a 'aw rawl' tawpa a han au vawihnihna ah chiah chuan, an 

tawm mekna aṭanga hmar lam mual dung phei mautluk sawmhnih dawna hla Ngawpui duk thim ruih kar aṭang chuan "chemte lo lung zur suh khai! Sialbuan Pasalṭha te kan lokal e" tia 

au ri leh thu dang dang sawia Patling inlek phek thawm a rawn ri ta chuah chuah a.

An thawm a rawn hnaih zel lai chuan, Chalvunga pawhin a mau fei lek zum vur chung chuan Parchhingpuii ṭhutna Thing hnuaiah chuan a mit fim zet chu thawm awmna lam hawi chuan a han melh phei khiau va, a tihrawl kal vel leh a thisen zam pawh a ṭang ṭalh ṭalh ta hle mai!    


A beisei ang ngeiin zing khaw eng ṭan tir la thim vawt ruih hnuaia an tawmna aṭanga mautluk hnih vela hla a, Ṭhang leh Perh buk sang zet zet kara ral ho rawn lang ṭhat chu Chalvunga chuan a melh fu chiang bawka, Parchhingpuii pawh a awmna Thing zarah chuan chiang taka an rawn hmuh theih ngei tura ding chhuak tura a tur leh zat hnu ah a nuṭa bawk chu au leh turin a han hrilh zui leh sap a.
Parchhingpuii chuan Chalvunga thu chu hnial ngam teuh hek suh le! a u a han auh leh veleh chuan Chalvunga duh ang ngei chuan Ralthuma chuan an hma lam mautluk hnih vel leka hla-a a farnu Parchhingpuii, lei aṭanga hlam chen awm vel leka sanga Thing zara a lo ding reng lai chu a rawn hmu chiang ta bawka, a rawn hmuh veleh chuan midang ho zawng zawng hma ah chuan thinrim leh makti meng val kulh chungin a rawn ding zui ta ngei a, Chuveleh Chalvunga chuan a mau fei chu na em emin a khawh phei puat a, Patling na tuar riin Ralthuma te ho rawn lan na hmun chu a luah nghal rawi rawi mai a.

Chutia an buai tak luai luai lai chuan, an lam pana Ṭhang buk leh Perh te, Phaipheng ṭawi luai leh hling inzam hnawk nuai Patling ban pil pila sanga bawk thliah thluah hnuaia hnahthel ro tla tling ten tun chu a rawn ri suauva, an tawm khawmna aṭanga mautluk pawh tling lova hnai Phaipheng buk kar aṭang chuan, Rawlthar lian dar pharh hlai hlep hlawp leh sam sei nghuau mai hi a rawn dawk chhuak puata, an tawm khawmna pel thuak khawpa chaka a tleng tlang puat rual chuan, enge maw ri fiak vin ṭhak ri an hre hman hrama chumi rual chiah chuan chhuah lam ber sira ding chu a vir nawlha a hrawk dawm chungin a ṭhingṭhi khur nghal chawr chawr mai a. 

Chutah zet chuan, an hma lama an Lal tunu ṭe ṭhawt ri leh thidang chunga a hnuai lama a tla ri chawrh thawm pawh chu tumah chuan an ngaihsak hlei thei ta hlawm lova, Ralthuma ber lah an hma zawn phei aṭanga mau fei rawn thlawk phei thut lo hmu hmana a fuh hma a amah indawha rawn inrawlh Val upa Ṭhiangkawia'n a nam petekna lama a tluk thlak na lamah an bul mai Kawrte chhungah a per lut thla bawk nen, Pasalṭha Zatuaka'n chu ral hlauhawm zet um zui chunga a hote hnena zui thuai tura a au nghal ṭhat lai chuan, kawr kama rawn vah chhuah tum chuan anchhe mawi hawih lo zet zeta rak chungin a invai invai buai nasa hle a.

Chalvunga chuan a tum tak Ralthuma a hlah ta tlat tih a hriat avang chuan, a chawchah Parchhingpuii chu hruai bo leh vat a ngai tih a hriat avangin a hriam thlah vawihnih chu a tlawlh lo ve ve chung pawh chuan an buai lai chu han ṭhawn leh chak viau mah se, Parchhingpuii zawk chu hruai pil leh hmak chu a pawimawh zawk tih a hre chiang hle a.
mahse, a tlak luhna tur kawr hnar lamah chuan Patling rawn tlan ri thla sun sun thawm a han hre thuta, chuveleh a tum thlakin a hnung lamah chuan a kuta a hruihrual vet ṭha sauh sauh chung chuan a tawlh let chho leh ta vat a.
 chutih lai chuan ral ho pawh chuan a tlak tumna kawr kam chu an rawn luh pawh a, an beisei ang an rawn hmuh tak loh avang chuan chak zetin an let leha, ri lovah an thawm chu a reh ta diak a.

Chalvunga chuan ral ho thawm pil ta daih chu chet pwr phah nan hmang duh hauh lo chuan, a penna aṭanga tlak deng lamah chuan a luh thlak deuh fe hnu ah chhim zawnga tlan let leh vatin, Parchhingpuii a dahna Thing zawn zawng chuan a lut chho leh ta ṭham ṭham a.

Khua a en ṭan hle tawh avangin ral ho an let leh diak bawk nen, Parchhingpuii a dah na chu han pawh leh pawh ni se ral ho hmuh lohva pilpui leh mai chu a harsa ṭan hle dawn tih chu a hre khiau baw a. chutih laiin, ral ho khan Parchhingpuii a dah na lai kha an rawn hre chiang tawh tih a hre reng bawk nen, theihtawpa fimkhur chunga a bawhvah leh fe hnua a nak hliam aṭanga thisen a rawn buak leh par par takah phei chuan, a chhak mautluk hnih leh tlem vela hla Parchhingpuii a dah na lai aṭang chiaha Parchhingpuii ṭe deuh ṭhat ri leh "chemte, keimah ka ni e min hlau suh khai" ti a mipa 'aw' rawn chhuak thut avang chuan a nak hliam hup thi zawih zawih chung chuan Chalvunga chuan a tum a hlawhchham leh ta tih hriain, a thlang kawrte thim zet lama tawlh luh thlak chu tumin a han let thla a.

Mahse, pen hnih thuma thuia tawlh awrh ang tih awm velah chuan, a sir ding lam hnai set sawt aṭang chuan "i hriam dah la chet thawh tum lovin i awm hmunah khan ding rawh. Silaiin ka hawlh chilh titih che a, ka nau te'n i nak lehlam an hawlh chilh thiak bawk e" tia Patling ṭhankin, chi keu tam awi tlei duah tawh khawpa a var tleh ngawt pawh tuam tla ṭhang tih hriat zet  'aw' phawi rum al maiin a rawn tlak chilh na 'aw' chu Chalvunga chuan a hre chiang ta kher mai!

Chupa 'aw' a reh rual deuhthaw chuan beng chu a rawn kiu rum ruma a khaw hmuh a tawi tual tuala, rang taka a thlang kawra zuan luh thut tumna a neih ruala a insan mar leh lai tak chuan, a mit leh sulha nikhaw hre mang lovin a bawk zawi ta hnawk mai a.

Mual rem deuh laia Chalvunga nikhaw hre mang lo an han hnuh thlen hnua, a nak hliam kaw phar aṭanga thisen rawn pik leh piat piat ṭhin thlira Ralthuma a din kun du lai chuan, a hnung lam aṭang chuan a farnu Parchhingpuii chu a rawn tlan thata Chalvunga lu zawna a ṭhingṭhit zui hnak hnu chuan  "ka u zahngai zahngai, ral enin en mah che se la ka chungah hriam a lek ngai lo a sin" tia meng dul raih chungin Ralthuma chu a chhoh en ta kiau a.
Ralthuma chuan chutia a farnuin a amah hruai bova an khaw Pasalṭha te nena a mah zawng tura an chhuak pawh lo phil filh leh pak duh tu an ral man tana a farnuin zahngaihna a dil ta mai chu a ngai thei ta bau lo mai, "i nunna a zuah emaw zuah lo e maw, kan khaw dai rawn kaia ka pawi rawn zah lo tu hi dim dawiha ka kal tir mai hi ring hauh suh. tamah nangmah zawnga kan tap chin hi i ngaihtuah hlek lo a nih zawngin, ka Pu sum hmunah kut ka thlak duh mai ang che ka ti! kan khaw Pasalṭha te chhawn pawh hi i zah eih lo a nih awm hi" tia rum zeta a farnu chu melh khuih khuih chung chuan, Chalvunga lu tan mai tuma a Kawlhnam a la lek run chu a kawng hruikhau hrenah chuan a thiat ta hram a.


Chutih lai chuan, an Pasalṭha Zatuaka pawhin an Lalpa tu te unau kara thu chhe lut ta tlat chu ṭhelh tum chuan a rawn inrawlh thuai a, "a enga pawh chu nise, he ral che maksak zet hi kan Lal te pawhin a lu nungin han hmu ve se la, a kam keu thu lah hriat tura rawn chhuah turin a thisen a thlauh tam a leiah nikhua a hre ik silo! khawi khaw ral nge a nih tih te hi a kam chhuak ngei hmanga kan hriat phawt hi a ngai e" tia thah ngawt chu ṭha-a a hriat loh thu a rawn sawi ve charh charh hnu chuan, "Sialbuan tualah a lu hi ka lam anga, a mah tir tu khaw Lal leh a chekawite chu ka nawp ram ṭhak ang" la ti bul bul chungin Ralthuma chu a kal kiang ta hram a.

THALFANG LEH MILU, BUNG 12

_Llpa rokhum // Ngawpui duk chhun enah pawh dur thim chuai khawpa pilril Kham sang turu zet hnuaia,
an vanneih a siama Chalvunga hrui kamin a phih liam thlak  ve hman loh pathum te chuan thlabar zetin an tapna chhuah
chhawng lama an Lal tupa Ralthuma leh a hote chu fin tumin an hnung lamah chuan an tawlh lut thuai a.
mahse, Ngawpui lai awm vel thim zual lai an luh lai chuan, a tlan hmasa ber Ralkuaia
hnungzangah chuan enge maw lum pup hi a rawn bei thlawpa, chutih rual chiah chuan a
hnung chiaha rawn tlan mek Chhunkunga lah chu Phung hmu ang maiin a ding chuta Ralkuaia
hnungzanga thikhar tharlam lian zet bei luang pur mai chu melh kuau chungin a khur titih nghal a!
chutia din det paha a hnung bera tlan Thangṭiala an han en meuh chuan, an dinna aṭanga mautluk dawna hla-ah a hrawk thler peh thla huau aṭanga thisen lar zet zet rawn baw puat puat chungin Thingtuai vuanin thei leh thei lovin a lo indawm ding khur dar dar mai a.

Chuatah zet chuan Ralkuai leh Chhunkunga te pahnih chuan, Ralkuaia hnungzanga thikhar rawn
bei thlawp chu Thangṭiala'n hliampui a tawh ruala rawn per phei chu a ni tih an hre chiang
kher mai!
rang taka Thangṭiala awmna an han tlan thlen meuh chuan Thangṭiala chu a indawmna
Thingtuai bul bawh chuan a lo la ṭhingṭhi hram hrama, a hrawk kaw huau aṭanga thisen lar
zet zet rawn phuan chhuak burh burh chung chuan anni pahnih chu tlanchhe turin a kut chuan
a lo vai hram hram a.

mahse, chutia an sa himna tur ngaihtuaha insaseng tura a lo vai ve lap lap chung chuan Ralkuaia leh Chhunkunga te chuan ṭhiante thih sual han pil bo san ngawt chu dika an hriat loh avang chuan, Thangṭiala nghawng kaw huau chu an Diara an hren sak mawlh mawlh hnua puak tuma an inhlan lai chuan, a rawn meng mel arh arha a bawp a leng zui aih aih hnu ah Thangṭiala chu a chat chu a ni zui ta mai a.

A tawmna Ṭhang ṭawi buk sang zet kar aṭanga a hnuai zawn Phaipheng buk bawk thleh thluah kara Sialbuan khaw Tlangval inbawihsawm mek te chu Chalvunga chuan a han thlek thla a, a hma lawka a hnung lam aṭanga zuan zawk paha a Hrui hrual hmawra Tlahthi hriam em em inhmerh zial fip ral hmanga a hrawk a vai thler sak ruang pua a pakhat zawk a din veleh chuan, a bula pakhat zawk a hawi phawk hra hra lai chuan a Maufei zum zet chu muangchangin a lek kang riai riai a na zetin a han khawh thla leh puat mai a. 

A mi khawh ṭe riin a nak dinglama Maufei inthiat lut ngur mai avanga a na tuar an tap mekna Ngawpui a han luah khawk tak ruah ruahah chuan, pakhat zawk mangang lutuk chuan a Milulakchem vai fur fur chung chuan hmuntin chu a melh kual ruai a.
chutih lai chuan, a hnung lam Ngawpui chung lam zelah chuan Chalvunga chuan tlemin a tawlh san hlek hnu ah a Hruihrual hmawr hriam ngei mai chu a han pawt dawk leh ta zal zal a.
mahse, chutih lai tak chuan chupa invai buai mekna chhak aṭang chuan thawm dang a rawn awma, reilote ah Rawlthar tawr tep tup hi rum dut dut chungin a rawn lang thuta, a sir tawn tawnah chuan Ṭhang buk kara tlan phe vuai vuai chung leh thinrim eng phiara rak chungin mi sawmhnih bawr vel hi an rawn lang zui ṭhat bawk a. 

Chutia an tam tak viau ah chuan, Chalvunga chuan hriam lek tumin a inpeih leh at tawh chung chuan a tum dan chu chawplehchilha a thlak vat hnu ah a mit la bik riau tu, a mah aia kum bih tam bik vak lo tura a ngaih, midangin an ngaihchan ruk riau Rawlthar san ṭha luah chu a melh bing ṭan ta a.

Ralthuma chuan Kawr bir zeta tla liam te bakah Kham hnuai lama an Pasalṭha pakhat, Ralzika hova tla liam ta te chanchin Ralkuaia ka aṭanga a han hriat hnua, a la dam awm chhun pathum te zinga pahnih Thangṭiala ruang hrawk thler peh duai mai leh Chhunkunga ruang, a nak lehlama rawn pawng zawr khawpa a nak dinglama Maufei lut ngur mai a han en chian meuh chuan, chuti khawpa an tap mekna Ngawpui hnuaia a farnu lo chawchaha anni ho lo bitum chat tu chu Sapui reng reng a ni tawh lo tih a hriat chian tak chu a chhapah, Zadeng Lal Dengphunga leh a chekawite an phiar ṭan chauh tih loh ral nek lai an neia a hriat loh avang te chuan, chu ral chetphung huaisar leh zei ze mak tak mai chu khawi khaw Lal Pasalṭha te chu nitak maw!? tih hlir a ngaihtuah tih a hmeleh chuan a rawn lang chhuak ta hial a.

 Val upa Ṭhiangkawia chuan an Pasalṭha Zatuaka melh rulh rulh chung chuan, "kan ṭum lak danin Sapui a hawi dawn ta lo riau e ka ti Sialtuaia pa! a eng ral kan nek lah va hre uk suh i, Sapui hnu leh mihring hnu inṭha ṭhen dah khan ka khaw hawi a ti phawk ta telh telh mai e ka ti" tia zawi supa inpet fun chunga an nau pahnih te ruang a melh leh run lai chuan, Ralthuma pawhin ralrel leh dan tur a haihchham viau tawh tih hriat zetin Zatuaka chu a lo be ru ve deuh sup a.

Khua a rawn hnim zuala, an tap na Ngawpui vawt thim ruih mai a han thim chian hnu a, an ralmuan deuh na lai tura an rin Ngawpui laita vela an Buk tukna lai taka meipui an puah kai ṭan chiah tih ah chuan, na zet zetin an Naute ruang meipui en chin laia an Diara an khuh tlawn ar te pahnih thla rawn hruai ni awm hrima Sar thli rawn rum lut hum hum mai chuan a rawn tleh khuma, zei ze mak leh rawng zetin a chenchilh tlat nia an inhriat tawh avanga therhlo kah tuma vak chhuak pawh insiam tawh lova an bul hnai Anpanṭhuam leh Tumbu hmuam ilo dapa thuilo te te vak mek te pawh rau ṭih rukna-in a man ta deuh riau a ni tih hriat zetin an rawn let thuai thuai a, an Buk mei eng chin leh chin lohva Thizun hram dur dur ṭhin te chu rawlthar zual deuh te phei chuan meng phawk hra chungin an bih leh zauh zauh ṭhin a.
 mahse, chutia an hun tawn ṭih ru riau chunga rawlthar zual deuh te an ṭit riau lai pawh chuan, Ralthuma erawh chu fim zeta la inngaihtuahin "he ral huangtau zet hian ka farnu hi Sapui ka aṭang kha chuan a chhuh dawn hauh silo! a chutih laiin, puan fem kan chhar te lah kha ka farnu puan ngei a ni si, mah reng reng se, mualin a tlin chhung chu Sapui a ni emaw, ral ze rawng zet a ni emaw kan um filh ṭhiau tur a ni. thim hi han ṭin se, he Ngawpui hi a huhovin kan dap chhuak leng tur a ni" a la ti sauh sauh a.

Ralthuma rel dan chu khauh viau mah se, Val upa Ṭhiangkawia leh Pasalṭha Zatuaka te pahnih chuan ruang hnih ngawt an nghak bawk nen, Khama tla liam ta te ruang leh Kawr thuk zeta tla te ruang an hlawm theih tawh loh a hnu an ruang kawl lai pahnih hi chu nghak ṭawih ngawt lova khaw lama haw'npui pawl insiam a ṭhat thu an han sawi a.
chu an thu rel chu Ralthuma thinbutut chuan a diar leh ta lo "zan hunin mipa thu keuh a dal ngai lo ve! a duh chu kir ta ula, kei chuan he Ngaw hnuai hi ka dap chhuah thial hma zawngin khua kai ka tum lo ve" a rawn ti vin ta ṭhet ṭhet mai a.

Chutia an inhnial buai deuh lai chuan chhum lo chat lova an tawmna Ngawpui chenchilh tlat tu sar thli rum kual ruih ruih mai chuan an meipui chheh chu thwklehkhatah a rawn chhem awn zuai a, meipui chheh ṭhat tuma mau theia an chawhmeh pawh khawm chhuan vila buai mek te an phili chak chak hlawm lai chuan, a hma aia na in sar thli chuan a rawn luh leh huka meipui chu a si leng de chuah chuah khawpa na -in a rawn vir thim ta hmuk mai a.

Chalvunga chuan a hnuai mai an meipui chheh Thliin a bawh mih hmuk avanga thim chhah zet hnuaia mei thingthu de chuah chuah kara ral ho phili lai chu a chet thawhli na a tan chuan a lo thlang fel rang leh tawh hle mai! Ngawpui hnuaia a lo ṭhan lenpui a mit de ṭha zet chuan thim zingah pawh chuan a tu a mah chu hmaih nei lovin hmu thei miau hek le!
rang takin an Buk awmna piah maitluk hnih vela hla ah chuan a bula ramhrui ring chuan a uai thla thuai a, a hrui hrual fip zet hmawr a kuta a veh ngheh leh sauh hnu chuan ral ho thingthu nung fawma ṭeh hak te vah mekna sir, chhuah chhawng ep Perh buk zet zet karah chuan chak mangkhengin a dawk phei ta puat mai a.

Na zeta a hrui hrual a vai rik fua ruala meithingthu ṭek chuai kara patling ṭe ruah ruah thawmin Ngawpui a luah khawk rum rum lai chuan, chupa tlukna zawna enge maw ri bawrh bawrh thawm chu Patling au chunga tlan thawmin a rawn chhilh thuai a, chuveleh che zui leh mai tura inpeih leh at tawh chunga a din kun leh dah tawh na piah mautluk hnih vela hla ah chuan  Silai a rawn puak de dura, Silai a puah rual deuhthawa a dar pheng veilam thawi thuaka Muzukfei rawn thlawk zui puat chu Chalvunga chuan a vanduaipui teuh ve hle mai le!

A ral bitum mek te zinga a farnu Darhliappuii that tu nia a hriat ngei, an zinga Rawlthar ngeng zet awmna zawn nia a hriata lai taka chupa hlah hauh lova beih phei leh tuma a ṭan hmun siamna zawn chu an rawn chhui fu hman tih a hre chiang ta si!
Muzukfei leh Silai mu a rawn thlawh tlang hnu lawk chuan, chatlak mang lovin a tawmna zawnah chuan Fei dang a rawn thlawk lut zui ta fua fua a, a karlakah a Rawlthar bitum pa ngei au rawl leh midangin an naute an fuihna thu chu gawpui khawk kual ruih ruih khawp chuan a rawn ri chhuak bawk! chung an Fei rawn khawh fur fur na lam aṭanga au chuah chuah thawma rawn chhuah leh lai chuan Silai a rawn de puak leh dur dura, a puah vawithumna ah chuan a awm hmun sawna a sahimna tur zawnga Chalvunga lim chhuak chiah chu a ṭhingṭi ta hnawk a.

Sialbuan Pasalṭha Zatuaka hian, sarthliin an meipui a bawh mih hmuk hnu lawka an piah deuhva an kawite zinga pakhat meithingthu darh chhar tura a lut kal phei lai a melh khiau lai taka chiang zeta ṭe ṭhawt chunga a vir hlawm nawlh lai enge mawin aphet liam san vuai lai tak kha a hmuh hman tlat avang khan, chu lam chu Silai nen Fei nen sai chilha khawh zui turin a Naute ho chu a hrilh hman tlat mai a. 
mahse, an hriat chian loh che rawva zet hi an sai fuh a ni tih an hriat loh avangin Zatuaka chuan, an nau pakhat ruang chu zing lama zawn a ṭha zawka a rin thu a sawi hnuah, midang pahnih ruang chu pua a tawlh ril leh deuh tura a hrilhin an Thal la thlah mek lai chu duhtawka an Buk tukna mual chu fimkhur taka an piah deuh fe a mual pakhat inpharh Ngaw chhah loh deuh na lamah chuan tawlh luh san turin a han hrilh thuai a.
 mahse, he mual tak hi an bitum mek eng sa emaw ral emaw che hlauhawm thei zet-in Bu a khuarna mual a ni tlat mai le!
  thim zinga an han indap thlen hnu, zanlai varparh engin kal ruih khawpa vanlaizawl a luah var ruih tawh lai chuan chu mualte chu an vai chuan an inpal lut ta a.

Chalvunga chuan a nak veilam Silai mu luhna kaw pam mai aṭanga thisen rawn baw lum leh hak hak ṭhin hup chung chuan, a luh thlakna kawrte chu mautluk sawmhnih dawn a zawh thlak hnu ah tlak lam hawiin a chung mualah chuan a han vak chho leh a.
mahse, a hliam chuan a tum aia a tih chauh tak riau avang chuan, a bawh chawlh leh detna aṭanga mautluk thum vela hla-a a Buk awmna Thingler inban kai leh tur chuan a thapuiin a tlin mang dawn lo tih a hre thiam thuai a, chutia a ngaihtuahna a hman fiah rual chuan a sal man tleirawl Parchhingpuii chu a hre chhuak zawka, a Thang valh tawpna pawh a hlawhchham zui thei hle dawn tih lah a hre chiang ta hle a.

THALFANG LEH MILU, BUNG 11

THALFANG LEH MILÚ
By. Llpa rokhum
.
>>>> Sialbuan pasalțhate leh pasalțha tia chhal ngam thuak tawh khawpa Sa leh Ral laka chet lak thiam zet zet tlangval rual sawmriat dawn te chuan, an luhna ngawpui hnuaia tlak lam hawia luh bir thlak ngat ngat ngai khawpa pen sawm leh sawm thum dan lek leka thisen far zai zai chu chak thei ang berin an chhuah ni nileng leh zankhuaa an chhui ngat ngat hnuah,
chu thisen far chu a inhlat berah pen sawmthum dan ațanga a rawn lan leh zel avang chuan, an tan chhui zui a harh loh chu achhapah, chu hnu kalna lai zela thingluang leh lungpui lo awm leh zauh țhinah te chuan, chu Sapui chuan a mihring put thisen chu thui fe fea a tah ngei nguai țhin avang chuan a hnu chu hai rual lohvin ral ațang pawhin a lang rek ruak fo mai a.
mahse, an luh thlak zelna hmabak ngawpui inkhawh thla tawp piah lama tlangdung lian fe inkham ruah mai phena Ni a liam țep tawh tihah pawh chuan, chu Sapui hnu chuan a han kawi ve zauh chang pawhin thui tak kal kawi lovin an tlak thlakna mual thla ngawt chu a zawh ngut ngut mai si!
ruam tawp thleng rawka an chhui thla zel anih chuan an khaw ram valh chin chu sawi loh, tuna an tapna chin pawh an khaw ram chin ațang chuan thlir vang vang ngai khawpa hla anih tawh bakah, Sapuiin a hnu a hnutchhiah zawm zelna ruam tawp thla phei chu a tu a mah chuan an la dai ngai loh ram a ni vek tawh a. 
mahse, chuti chung pawh chuan Ralthuma leh pasalțha dangte mai nilo tlangval zawng zawngte chuan, khawi ngawpui duk leh pilril pawh lut dawn mah se, an Lal tunu la tu Sapui hnu chhui chu tawp san an tum lo hle tih hriat zetin an thlang tlangdung chung zawna, țangphel chen leka sanga Ni a din vuh tawh lai pawh chuan an hma lam chu tha tho zetin an la su thla buan buan hlawm a.
.
Sapui hnu chuan an rin ang ngeiin ngawpui hnuai ruam tawp chu a han thleng thla dawna, an luh chin ngawpui pawh a lo pan zual tawhin ngawpui fem mau leh țhang leh perh hmun bawn deuh leih luihah an han chhuak ta a.
chuveleh valupa Țhiangkawia leh Zatuaka te pahnih chuan an vai chuan ding lawk tura an auh lauh lauh hnuah, an hnu hmuh thar chu Ralthuma leh pasalțha dangte chu an han kawh hmuh thuai a.
Ralthuma chuan Zatuaka leh valupa Țhiangkawia te pahnih luh thlakna laia, thisen baw nuaih leh chu thisen buakna piah vei lam mautluk dawna hla a, Sadai-ek khal lam tawh kara Mihring hniak lo chiar dap chu mak ti zetin a han bih ve ta vung vung a.
tlangval ho lah chuan chutia an hotu te'n din an rawt tlat nachhan chu hre mai hlawm hek suh!
a hnung lama rawn thleng thla leh mek te chuan chulai hmun thleng thla thawh ho chu au țhat țhat chunga la rawn nawr thla zelin, an rawn thlen ve meuh chuan mautluk dan vel leka inhnaiha mihring hnu leh Sapui hnu a lo lang dun tlat mai leh, chutia mihring hnu a rawn lan țanna lai chiaha chhim hawi leh tlak lam hawia chu mihring hnu leh Sapui hnu a ințhen phawk mai te chu mak an ti ve ta hle a.
.
Chutia an inrawn khawm lai chuan Ni lah chu an ep tlangdung dur mup mai phenah chuan a liam dawn ruai ani leh mai bawk nen, an hnu zui lai zet chuan hmar khaw lian Sialbuan pasalțhate meuh pawh a ti hrilhhai hle tih hriat zetin an țhu ngawi țhuap tawh mai a.
mahse, chutia zawh lam tur hre lova an thapui lak lai chawlh reng ai chuan tiin valupa Țhiangkawia leh Ralthuma leh pasalțha dang te chuan, khun khan zetin an chet leh dan tur chu an rel fel leh vat loh chuan hunin an chet chhung chu a nghak ve dawn eih lo tih lah an hre chiang si.
"kan hetih tak si ah chuan, Ngawia pa tui ațanga Sapui hnu kal fal ngat ngat hi a zui zel pawl leh mihring hnu hi biha kal peng pawl kan insiam mai a va țul ta ve maw!?
thisen baw ngei nguai karah khan, nimin nileng leh zankhua khan a tu mahin mihring hniak va hmu hlawm suh i!
helai ngawpui fema heti teh nuaia mihring hnu lo lang ta tlat mai hi zawng, ngaihtuahna luh phir tu a ni lo thei love ka ti" tia valupa Țhiangkawia'n chhum bung zeta mihring hnu a lo awm ngawt mai chu mak a tih thu a rawn sawi chhuah hlawl lai chuan, Zatuaka chuan an thlang lam bih thlak vung vung pah chuan "helai ruam ngawpui fem kan tlak luh tirh khan, kan tam talna hnu ngawpui hnuaiah Sapui hnu a lan chian avang khan kha Sapui hnu lanna lai ngawpui nak tawn tawn kha bih nachang kan hre hauh lo mai tih hi ka ngaihtuah kai ta pek a. mah reng reng se, khatia Sapui hnu lang chiang ta tho chu hmun dang biha han dap kual tur khan, khawilai pawh kha a lei a rem loh chu a chhapah, chhehrawp hnawk leh perh kar zawng zawng kha zui fak tur hnu dang a awm reng laia lo va bih kual țalh thu lah va awm suh!
kan valupa rel ang chuan țhuang hnihah hêm kan thlak ava ngai mai awm ve maw" tih sup sup pahin a Vaibel lu chu a sahmim ațang chuan a han phawrh zui nuap nuap a.
.
Pasalțha rual mah ni se, hetia an hnu chhui laiin an luh lehna ngawpui fem a chhuah leh veleha mihring hnu an hmu tel ta tlat mai hi han buai ve chak chak loh nachi a ni tlat lo!
an khaw tuikhur dai ațanga an thlang tlak lam ngawpui hnuai pana thisen far lah chiang zet zeta a lan chu achhapah, lei dur lai deuhah te phei chuan Kepui hniak lian zet zet, mah se kal pangngaiin a kal lo leh zauh țhin tih hriat zeta a changa a hniak a pherh leh veng vung țhin leh, an hma zawn lungpui leh thingluangah te, thingbul țhenkhatah te thisen a hrût kai kawi leh zêk zûk țhin te chuan mihring hliampui tuar mek put a nei ngei tih lah han rinhlel rual chi a ni silo.
chumai nilovin, a han kal kawi ve deuh chang pawhin thui tak a vah kawi duh eih loh avang te chuan, Sapuiin ran emaw mihring emaw a lak reng reng chuan, a rang thei ang bera bikbo a tum tlat țhin avangin peng buai lovin a tlan ngut ngut mai țhin tih an hriat chian avangin chutia a hnu a kawi mang hlek loh avang te chuan Lal tunu pu chung ngeia tlan a ni ang tih chu a rinawm hle mai bawk si!
mahse, chutia ngaihna fel tak nei chunga an hnu chhui lai ngawpui fema an han tlak chhilh ruala mak tak maia mihring hnu lo lang ringawt erawh chu ro dang lak zui lohna chi a nih loh zia an han sawi tlan takah chuan, fim taka ngaihtuah chunga an rel tlan dan zuiin Ralthuma leh pasalțha pakhat Ralzika te'n, tlangval sawmthum hruaiin mihring hniak chu zui sela, midang zawngin Sapui hnu zel chu Zatuaka leh valupa Țhiangkawia hoin an zui ang tih chu an thu tawpna a ni ta a.
hetia an thu tawpna atana Sapui hnu lam zui lo tura Ralthuma an nawr chhan hi Zatuaka leh valupa Țhiangkawiate hian tuna an tlak lehna tur ruam lehlam ațang hi chuan, a farnu ruh leh tisa te hi an chhar tawh tura an ngaih ruk riau tawh avangin Ralthuma hian chung chu hmu lo se an duh vang a ni a.
an hnu kal san tawh zawng zawnga a thisen baw zeih zuih țhin avanga, Ralthuma thinrim rilru mumal pu lo leh zauh țhin kha Zatuaka hian a lo hmuh hmaih ngai tlat lo!
chutih laiin he mihring hnu pawh hi Parchhingpuii hnu a ni thei tih pawh hre ru dun khiauin, Sapui hian he ngawpui femah hian Parchhingpuii hi vanneih thlak takin a kal sanin a thi tawhah riak a ngaih hnuah Sachhawlchhin dahin a dah anga, an thlang ruamah chuan a pen san hnuah Parchhingpuii hi a lo la dam si anga he lamah hian a vak phei a ni thei tih te thleng chuan an ngaihtuah kim dun hle tlat mai a.
chung ngaihtuahna an put tak tlat nachhan chu he hniak kalna laiah hian thisen far an hmuh zeuh zeuh bakah, Sapui hnu zawm thla ah hian thisen hi a baw khat pharh tawh a.
chuvang chuan, Zatuak leh valupa Țhiangkawiate pahnih hian Ralthuma pawh he hnu hi meichher lakai meuha bih fiahpuiin an ngaihdan chu chiang takin an hrilh tawp reng a.
.
Zan thim hnuai pawh nise tumah chuan buk suala chawlh mai chu an duh tlat loh avang chuan, an valupa leh pasalțhate rel ang ngei chuan țhuang hnihin chulai hmun ațang chuan an ințhen ta a.
mahse, Zatuaka leh valupa Țhiangkawiate lam chuan thui tak an luh thlak leh hnuah pawh an beisei Parchhingpuii ruang ruh emaw, a tisa them leh a puan ilo takngial pawh chu an hmu ta tlat lo!
thisen bua erawh chu a hnu tir lam ang chiahin an la hmu zela tlem tlemin a baw khat ta deuh tial tial tih leh, Sapui ke hnu pawh chu a inher telh telha hmar hawiin a hawi thla hret hret tih erawh chu an hre chiang dun viau a.
chuti chung pawh chuan pasalțha san țha Zatuaka chuan Buk tuk phawta, chhin hnih khat tal han tluk ngial pawh a tum bau lo mai tih hriat zetin, "Ralthuma te nen chuan kan tlak dan a inhawi ta lo telh telh mai e ka ti!
mah reng reng se, Sapui leh Sialbuan valte tluang engmahin va kham suh ei. meichher kha tel belh zel ula, thimțin ban zakin i han chhui law law te'ng u khai" tiin a naute ho chu la fuih chhar chhar chungin an hma chu a la tawn thla sat sat reng mai a.
.
Ralthuma chuan an hnu zui lai mihring ke hniak chu a meichher thlarah chuan a han bih chiang a, a khat tawka thisen far hnih khat lo tla leh fap țhin pawh chu a hmu chiang thei kher mai!
Ralzika chu phawk deuh kura melh zauh pah chuan "kan hnu hian chhim hawiin min her chhohpui zel tih hi i hre ve chek turah ka ngai e!
kan hetih takah chuan, he hnu hi ka farnu hniak a nih rinna ka nei khat viau tawh a.
kan rel khawm tawh ang khan, Sapui khan Sachhawlchhin' dahin a dah anga ani lo la dam si chuan, helam hi hliampui tuar chungin a pan ve a nih ka va ring ta ve maw" tih leh a hmaa kal mek tlangval pakhat nawr sawn leh hmahruai chu a han rual zui zat a.
mahse, Zatuaka te ho ang bawkin thui deuh fe meichher tel belh sauh sauh chunga an hnu chhui lai an han chhui hnu chuan, chu hnu chuan khawi khaw Chul ram emaw a hruai luh hnuah hnu dang reng reng hmuh zui tur a hnut chhiah zui ta tlat lo!
chu Chul vau leh a vel reng reng dap chuan nasa zetin an inham buai zuia, mahni vah vahin Chul bawn kar Buarzê leh perh leh țhang keu sup sup chung chuan an vak darh zui a, zanlai ban chho thleng rawk khawpin an inham buai chu ani ta mai a.
.
.
A luh thlakna țhang buk lian zet hnuaia Vahrit thlawk lut luh chilha chhehkhanga a vawm thlak nalh hnu chuan, a Buk sualna ngawpui khuh chin chu mual hnih lian zet zet leh hlawm țha zet anih avangin, chu mual hlawm chhim lam zawk lai taka Buk tuk a nih avang a ni bawk nen, a mual hlawm thlang zawk leh a Buk tukna mual zawk insir zawmna laia, kawr zau zet, patling hlam thum zeta zau leh thim thla mup khawpa bir thuk zet chu a chet lak thawh khatna a tan Chalvunga chuan a thlang fel rang hle a.
tukțhuan bar zawh hun awm vel ațanga ralho lo ep let natur hmun rem leh kut lo thlakna remchang tur zawnga buai a ni bawk nen, chawhnu lam khaw eng dul thim ruih tawh hnuaiah chuan chu kawr kam lehlam ngawpui khuh mual khat zawk chu, a chunglama ramhrui rawn uai thla sungah chuan uaiin a kai phei ta a.
kawr kam a thlen veleh chuan a kam bul vela thingtuai lo ding țhalh zinga pakhat uipum rual zeta lian, chu a ler lam lawn chilha a han hlawi țhawt țhawt hnua a hlawina hnuah sadai-ek a tah leh vek hnu chuan, kawr kam lehlam hawi chuan kawrpui lehlama inkhang kai tur chiah chuan a kit thlu phei ta a.
a kihna hnua a har tlakna kar lang sar lutuk laite chu uluk zetin țhang leh perh hnah bukin a kawih khuh leh te te hnu chuan, thingtuai rinchhan chuan a Buk tukna mual lehlam chu kai phei lehin, a thing kih rawn invaw kai hmawr innghahna chu lungtum chungah pial lek lekin a han nghata, chumi hnu chuan lungtuma a zuk nghahna bul lawkah chuan ramhrui banrek tiat vela lian, mautlawn hnih zet zawta sei a thlun leh hnuah a innghahna lai vel chu hnahthel leh hnim dangin a kawih khuh leh diama, a zawh hnu chuan a thlang lam pen sawmhnih vela hlaa perh kar buk ban pil zeta sanga ding țawi thim ruih hnuaiah chuan, lei hrulah ramhrui chu pawt thla zelin a luh thlakpui ta a.
perh buk karah chuan a hrui pawh chu perh kung chawn rual dawna lianah vawikhat a bah hêl  hnuah, a hmawr lehlawm chu a piah pen sawmhnih vela hlaa lungpui lian zet zet insir khep khup karah chuan a luh phei pui leh ta a.
.
A duh ang taka a han chet zawh hnu chuan, a thing kih invuak kaina chung zawn leh a chheh vel reng renga chung lam ațanga ramhrui rawn uai thlâ han uai mai nana rem tur awma a hriat zawng zawng chu, chung lama lawn chhovin ban phak aia sangah pawt tawm chho vekin a chhuk leh hnuah a Buk tukna mual ngawpui thim zawkah chuan a let leh ta thuai a.
.
An Buk a han lawn chhoh thlen leh lai chuan, Parchhingpuii chuan a ngaite bawkin a lo melh kal kala, a han en ve hlek lah chuan a kun rang leh țhin hle lawi si!
chutia a kûn deuh tlat lai chuan Chalvunga chuan tlema a han tawlh hnaih hret hnuah, "i puan fem kha ka lo hlep teh ang khai" tih leh Parchhingpuii puan bih lai pawh chu a han ruala. 
chuveleh Parchhingpuii chuan țê deuh țhat chunga lo inveng ve vatin "zahngai zahngai! hmeichhe awm nem mai ka ni tih i hriat avang hian, thapui chhuahin min rum țhaih lul suh" a ti ta chul a.
mahse, chutia Parchhingpuii țe deuh țhat țhat pawh chu Chalvunga chuan ngawi hmiah chunga a tih tur chu tih san mial mialin, a puan fem zawng zawng chu a milulakchem chuan a malte lang var hai khawpa chhing chuan a han hleh sak ta thova.
chumi hnu chuan Parchhingpuii puan a hleh sak chu a Vahrit vawm thlak thlaki leh bawp bal thi zuih mai tuam nan chuan a han hmanga, a thisen kai nasa thei ang ber tura a han nuai nawk nawk hnu chuan Buk ațang chuan ramhrui rinchhana a uai thla lehin, a Buk sakna ngawpui tlak lamah chuan chak zeta liam thla-in chu ngawpui tawpa kham sang em em mai, tlak palh vaih chuan a mawng thlen hmain vawikhat tal kan thla a chhuak hman mai awm mang e' tih tur khawpa sang awmna chu a pan thla zui ta a.
.
Kham hmawr chung zawn a thlen thlak hnu chuan, hmanhmawh zetin kham hmawr vela ramhrui hnawk nuaih zinga rin tlak tur awm deuh chu a han chhata, a hmawr lehlam chu kham ko zar zarah chuan kham ko ațanga pen hnih vela hlaa mautluk thum dawna thui a kal thlakpui hnuah, kham ko rem laiah chuan lawn liam thlain kham ko ațanga hlam thum dawna thuia kham panga thingtuai rawn ding chhuak nghohah chuan a zuk thlung bet ta chat a. chumi hnu chuan a luh țanna lamah chuan let chho lehin hrui hmawr lehlam chu thingtuai banrek pawh tiat mang lovah a veh hual leh te te a, rei vak lo a han hawi kual thuak thuak hnuah, a mit chu a dinna veilam hreta chu kham pang hmawra a zar rawn inhawlh chhuak chho laih thing pakhat kungah chuan fu leh chatin, a ko chung ațang chuan hlamli vela thuka a tawlh liam thlak leh hret hnuah chu kham pang taka, chu thingtuai uipum rual zeta lian bul lo ding awn thla dâ ah chuan a lawn ta thuai a.
a kakpui aia sang hret a han kai thlen hnu chuan Parchhingpuii puan a hleh țhen chu hmun thum velah a han pawt thler kawk kawk a, chumi hnu chuan chu thingzar langsar laiah chuan a khai phe ta dar dar a.
chutia puan them a khai zawh hnu chuan, kham ko ațanga hlam hnih dawna hlaa a ramhrui chap thlak zai zai hmawr lehlam chu chu thing ziding chho sang deuh hlek leh a hnah bukna laiah chuan nghet zeta a han suih leh chat hnuah, hmanhmawh zeta chhuk thuaiin chu thing zung chung lam zawng zawng chu a auh rik deuh țhat țhat thlengin a chhat mawlh mawlha, a ding deuh țawng țawng ani tawh awm mang e tih tur khawpa tlu kar teuha a chhah hnu chuan Buk lam chu chak zeta pan chhovin, a kal pah chuan puanthem dang chu awmze nei zetin hmun hnih vela a thloh hnuah kawrpui kama a thing khan kaina lam kha a Buk zawn ațang chuan a pan leh ta vang vang a.
ava thlen chuan a thing khang kai zawn perh karah chuan puanthem pakhat chu langsar deuh tak tura a suih tan leh va hnuah, khaw dang hawi tawh lovin an Buk lam chu a pan ding leh ta nal nal a.
.
A Buk a kai leh hnu chuan, Parchhingpuii chuan a puan chu a zai țeh sak leh ang tih a hlau hle tih hriat zetin a lo tawlh san vat a, Chalvunga lahin ngawi ngal chungin a Vahrit vawm thlak chu a puah zui ve mial mial bawk!
an cheziaah reng reng chuan inhal rukna lian tak an nei ve ve tawh a ni tih a lang țan hle tawh a.
mahse, Parchhingpuii chuan haw ru viau e ti lo chuan a tel lovin he ngaw duk chhah em em mai, chhun ên eng ang hun lai pawha thim chhilh bakchhelen hun lai ang tlat maia thim dur mup reng mai karah hian, him takin a awm thei dawn miah lo a ni tih leh an khua thlen leh thei tu awm chhun pawh he pa chauh hi a ni tih lah a ngaihtuah pha ve vek si.
a chang chuan chupa-in an Buk a chhuah san hlana chhuk tuma a buai phili ve fo te chu a inchhir leh deuh țhinin, he ngaw an luh tirha chupa-in mahni kut kawih chauh eia inah tia a hrilh lawk chung pawha, a rilțam tawpah meuh chuan ei tur a sem ve ta ziah leh a hnu lam zelah pawh a kep ve ta zel te chu a lawm ru ang reng viau a.
chutih laiin, chupa thu reng reng chu kawi khat pawh a zawm loh vaih zawngin chupa chuan a dim duhin a rin loh chu achhapah, a țawng chhun zawi leh tawi tek tawk te chu lo hriat hman loh hlauin a beng a chhi ngun thei hle tawh mai a ni. 
.
Chalvunga chuan a Vahrit hem lai a han ur hmin hnu chuan a bawp tî țhalai leh a êngti te chu Parchhingpuii chu a han pe a, chutia pek pah chuan fiah zetin a han melha tlema a hnaih leh hret hnuah, "ralin kan tawmna ngaw hi an rawn luh thleng thuai dawna, ka thu lak thlawpin i che ve zel ang chu maw"!? thupe 'aw' deuh lek lek hian a han ti sap a.
Parchhingpuii chuan Chalvunga zawhna awmzia chu angaihna hre lo zeta engemaw chen hawihai hâ hâ chunga a ngawih reng hnu chuan, Chalvunga chuan ral ho a lo ep let hunah chuan amah chu a mamawh dawn thu a rawn sawi leh ta a.
chuveleh Parchhingpuii chuan chung ral ho chu khawi lam ral nge an nih tih leh, engtiangin nge a lo puih ve dawn tih te chu hlau thawng zet chung chuan a han zawt let hram a.
mahse, a zawhna chu Chalvunga chuan chhang ta lo chuan, "i khua te pawhin an rawn zawng tawh ngei ang che" ti chauha a zawhna lo lam daiha a rawn chhan zauh hnuah a thu chu zawm turin a han hrilh nawn leh a.
.
Khua a rawn thima Chalvunga pawhin an Buk mei chu a ti mit thuai a, Parchhingpuii chu thawm chhuah lo tura a chah hnuah lei lamah a hriam chikim nen chuan a chhuk ta zal zal a!
an tawm mekna ngawpui mual lehlam liama khua chuana chhun lama a vah lai khan, an thlang hmar lam tlang ngawpui la hla ang reng fe a thlir thlak apianga a kutza zak țhin avang khan, hemi zan hi chuan a lo nghah khiau tawh ral ho hi an rawn langin a ring nghet em em tawh mai a.
rei a nghah hma, lenglenhun pelh chhoh hret awm velah chuan, a beisei ang chiahin an Buk tukna ngawpui mual hmar zawk thlang ral lofing khat pawh tling tawh loa hla a, meichher rawn dê sen zauh zauh țhin chu Chalvunga chuan a hmu chiang ta hle a.
.
Chutia ralho mei dê a han hmuh hnu chuan zawi deuh sapa phun sapin, Hliappuii thlâ chu inpet ruh fan chung chuan a han be sap sapa a hun tiam a thlen thu te nen, a phuba chu a lam ngei dawn a ni tihte chu a han phunpui sap sap a.
rei lovah chuan ral ho mei dê pawh chu a rawn hnai zela, tuiburhmuamda hnih vel lekah an awmna ngawpui hmar lawi zawk fem chu an rawn dai lut dawn ta tlat mai!
chak zetin a thang valh khatna vil tur chuan ngawpil lamah chuan a lut thuai a, zei zet leh chak zet zeta a lim zauh zauh hnuah an Buk tukna mual ngawpui hnuai zawk chu a lut ta!
a hrui hmawr lehlam delh behna lungpui kara a luh hnu lawk chuan ngawpui hmar zawk hnuai chu meichher keng mi sawm dawnin an rawn luh pawh zui mai bawk nen, chu ngawpui hnuaiah chuan thihna rim chu hai rual lohvin a rawn nam țan ta tih hriat zetin, a hma lawka zan hun thengthaw leh boruak zang zet lawma leihrik leh nungcha tin reng hram chiah chiah te, perh buk leh thingzar hrang hranga Chhimbuk hnar tum dat dat ri te pawh chu an reh zui țhiap a, an zavai aiawh ta niawm hrim chuan Thizûnin pasalțha thihnain thla a zar hnan mek te chu pialral thlenga awih zui tum niawm hrimin khat fan dulhin a rawn 'thihzûn' khum ta dur dur mai le!
.
Ralthuma leh Zika te chuan an hote chu chu ngawpui an luh rual chuan hnuhma awm thei reng reng bih fiah hle tura chah zel chung chuan, an hma lam chu muang lova pan zel turin an chah uluk hle a.
mahse, chu ngawpui an han luh thuk fe hnu chuan an rin loh zetin an kal mekna ngawpui rawn zar zawm leh chiah tu, an kal mekna aimaha ngaw dur zawk an va pawhna laiah chuan, chu ngawpui zar khuh luih mual lian zet zet pahnih inkar daidang tu kawrpui thuk zet leh zau zet lo awm ruah mai chu an han hmu ta a.
chu kawrpui kam an han thlen rual chuan, Ralthuma leh Zika te chuan a kanna tur an zawnna lamah chuan, kawr kam lehlam perh kung khup chen vela sanga hmeichhe puan fem ban chen dawna sei, kutphah beng vela hlai lo uai phe hlep hlep chu chiang mang lo zetin an meichher eng thlarah chuan an han hmu ta a.
.
Chuveleh chu puan fem awmna zawn chu an naute ho nen chuan chak zetin an han pan thuaia, chutia tlan pah chuan puan fem hmuh chian tum chuan an meichher te chu an hma lamah chuan an han lek zui thuai hlawm a.
chu puan fem lo tanna kawr lehlam kam zawn an han thlen rual chuan, Ralthuma chuan chu puan fem chu a farnu puan fem thler ngei a ni tih a hre chiang ta kher mai!
thinrim ngawltawt up up chung chuan a hote chu kawrpui lehlam kaina tur zawng thuai tur chuan tur nghal tuarh tuarhin, rei lovah an zinga pakhat chuan a ke bul maia thing uipum rual vela lian kawrpui lehlama invaw kai phei chu kawk va chung chuan, chu thing chu zawh tum chuan a han pakai nghal thuai a.
chutia chu thing inkhang pheia an țhianpa tlan lawn chu midang chuan mawng zang zetin an rawn zui ve nghala, a hmasa berin kawrpui lehlam a kai țep tihah chuan pali ngawt chuan thing tlu kham chu an rawn kai ve der tawha.
a pangana turin thing luang hmawr chu a han kai chho ve chiah tih laia, a hmasaberin kawr kam lehlam kai chiah tura vawikhat pen leh tuma a ke a khai lai tak chuan, nâ em emin an thingluang zawh lai chu thlang lamah a her thla thuta, chumi rual chiah chuan thingluanga fu kai hman zawng mipangate chu kawrpui mawng thim zet lamah chuan an tla au thla ta chuah chuah mai a!
.
Chutah zet zawng pasalțha pakhat zawk Ralzika chuan, chu ngawpui chu huai enge maw takin a chen chilh nia ngaihna lian tak a nei rang kher mai!
an țhian te'n kawrpui chhuat an tlak thlen ruala tisa sawh thler ri chawrh chawrh leh ruh tliak ri fiak pak pak ri an hriat zui zat lai phei chuan, midang zawng chu an hnung lamah an tawlh dualha phawk fe fe a hawi kualin, an hotute pahnih chu an melh tang hru hlawm a.
mahse, Ralthuma buluk ngawltawtna chuan, a hote panga ngawt kawrpuia tla hlum ta te avang chuan tlawm a tum lo hle tih hriat zetin rum ngul ngul chungin kawrpui kaina tur chu a la zawng nasa mai si!
hnung lama rawn tawlh let ho chu rum fe fe a rawn melh khuih khuih chung chuan, "tu pawn in hma bih fiah zel tawh teh u khai, kha thingluang kha a ler lam innghahna a pial palh ta mai mai a nih awm kha" tih leh thing tuai lian deuh kih tur dapa vah kual chu a rual zui ta vut vut a.
Ralthuma ber a so zual tak tulh tulh avang chuan midang zawng chuan a chet lak chu thlawp zui loh theih niin an hre țeuh silo,
an vaia kawrpuia dawh kai leh tur thing tuai lian deuh an han zawn hnua, an duh ang tak an hmuh hnu chuan kawrpui kam lehlam chu rei lovah an kai phei ta nge nge a.
.
Chu ngawpui khuh mual khat zawk an han luh hnu meuhah phei chuan, Ralthuma'n a fuih nasa zual zel bawk nen a tu pawh mai chu an che zang leh ta kher mai a.
mahse, chu ngaw hnuai chhim zawk an luh hnu pawh chuan, an puanthem chhar tih loh kha chu hnu thar han chhui fuh tur leh thawm danglam deuh tal pawh an hriat zui tak loh avang chuan, Parchhingpuii puan fem an hmuh tawh avangin a mah tak pawh an hmuh thuai tawh la ring tlat chung chuan, hmun rem deuh laiah chawlh riha thimțin ruala ngawpui ril lai leh a dai fem zawng zawng chu fiah taka dap chhuah vek an rel tlang ta a.
mahse, varțian khaw rawn eng țan mekin an awm khawmna ngawpui hnuai a rawn luh deuh ruaih tawh laia hmun tin mai dapa an vah deuh fe hnu leh, Ni lu a lan hun dawn tawhah pawh hnu dang deuh leh thawm awm an la hre ta chuang tlat lo!
Ralthuma beidawng thinrim chuan a hote chu țawng tlahawlh deuh fe fea vau titih, fuih titiha rak khum deuh piap piap chung chuan ngawpui fem tlak lama lut thla pawl leh chhuah lama lut tur chu a țhen hrang zui ta a.
.
Tlak lama vak tur ho chu Ralzika chu ho tura a ruat hnuah, amah leh tlangval sawmhnihte chuan ngawpui chhuah chhawng lam chu ngawpui fem thleng rawka luh chilh chho turin an pan ta a.
ngawpui lai bialah engmah thawm leh hnu an hmuh loh avanga an beidawngin ngawpui fem hrut tura, pawl hniha ințhena an han inkawi hrang leh zet chu an beidawng ru tawh hle tih a hriat hle a.
mahse, an vai mai chuan an hotupa Ralthuma mitmei chu an ngaichang ru lo thei silo.
Ni a san fe tawh laia tlak lam liama lut thlate zinga pakhatin a ke bul maia a lungtum kan chiah phena hmeichhe puan fem lo tla a han hmuh rual chuan, beiseina thar nei leh tha tho zetin an hotupa Ralzika chu a han au thuai a.
.
Ralzika'n chu puan fem them kutphah tiat vela hlai a han hmuh rual chuan, an zinga pakhat chuan an dinna thlang thla ah chuan puan fem dang a chhar thu a rawn au pui leh ta lauh lauh a.
chuveleh an vai mai chuan an thlang lam ațanga rawn au te awmna lamah chuan liam thla nghal duakin, chung ho an zuk pawhna thlang lawk ngawpuiin a khuh huam chhung si a, kham ko hnuai lam ațanga thingzar rawn zar chhuak karah chuan an puan them hmuh tawh zawng zawng aia hlai fe lo tang phe hlap hlap chu an zuk hmu chiang ta kher mai!.
chu puan them hlai ang reng zet chu a tira an puan fem chhar leh a hnua an chhar zui zel te nen chuan a inzawm vek a ni tih hai rual lohvin, a rawng leh a zia te chu a in ang vek mai si!
chu achhapah, chu puanthema thisen kai te chu an puanthem chhar tawhte ai khan a lang chiang hle bawk a.
an zinga pakhat chu Zika chuan chu puan them la thla tura a tirh hnu chuan, midang zawng chu kham hnuai lam an bih theih tawka thuk chu uluk taka thlithlai tur chuan a han hrilh zui thuai a.
mahse, an zinga pakhatin chu puan them a lawn chilh hnua a han ban țan chiah tihah chuan, a lawnna thing bul lam chu vawilehkhatah a rawn ri tuarha, a zung bul lam chawp chuan kham sang zetah chuan a inkhawh liam thla ta pur pur mai le!
midang zawngin kham hnuai biha la kun țhap chunga, a lawnna thingtuai inkhawh thla puat puat zara la bet țai chunga an țhianpa țê thla ruai ruai lai an la bih far lai chuan, an țhianpa lawnna thing ziding chhova ramhrui zam kai rawn inpawt mar thut chu an hawi let dual rual chuan, chu hrui zawm zel an hnung lama rawn dûk zui leh thut chuan an vai deuhthaw chuan, kham kovah chuan an hotupa Ralzika ho chuan a rawn phih liam ve ta phiar mai a!
chutah zet zawng kham kar thla zawng zawng chu patling thlabar au ri țial ruan ruan leh ruh tliak ri leh tisa thler hawk hawk riin luah khawk thla ruih ruihin, an zinga pathum tih loh chu chu kham sang zetah chuan Chalvunga hrui kam chuan a phih liam thla ta phiarh a.
.
.

THALFANG LEH MILU, BUNG 10

>>>>> Ngawia pa Tuikhur hmar lam mautluk thum vela hla Tlangsam hmuna, Keipuiin an Lalpa Khawluta tunu tleirawl duhawm zet Parchhingpuii a put bona hnuhma an han hmuh zet chuan, Sialbuan paho leh tlangval zawng zawng te chu an thinrim tlang hle tih hriat zetin an au țe țhat țhat hlawm a.
a bikin Parchhingpuii nuța Ralthuma phei chu rilru mumal pu mang lo khawpa a thin so bulhin a bual ât ruai tawh avang chuan, pa ho leh valupa Țhiangkawia te chuan Keipui liamna hnu bawh thlak tuma tlan thlak tuma a phi ruai lai chu an chelh laih laih mai a.
mahse, chuti chung pawh chuan Ralthuma chuan meng sen rum tawh chunga a mah chelh tute chu rum deuh ula melh kualin, "a ngam chuan ka hnu zui ula'ngin, a ngam lo chu khuaah let leh mai tawh u khai.
ka farnu Parchhingpuii thlau hlum țhak khawpin ka dawihzep love" tih leh a thâpui sawm khawm chunga tâl chu a han rual zui leh buan buan a.
.
Rawlthar mah nise khaw daingula chhiar leh khual kai chho mek khawpa huaisen, pian mum leh hleitling Ralthuma meuhin a thâpui a han thawh takah chuan, a tu a mah chuan a thinrim ruala a bulukna butut zet chhuak bawk si avang chuan chelh țha ngam tawh hek suh!
an hmai zawna Ralthuma'n a ban tawr tep tup a vai fur fur rual chuan an vai mai chuan țil deuh hukin, Sialbuan khaw pasalțha Zatuaka leh valupa Țhiangkawia te chuan an han bawh thlu leh hram a.
mahse, anni pahnih pawh chuan rei an chelh thei dawn lova an inhriat hnu chuan Zatuaka chuan fim zeta Ralthuma chu bih hnaih pah chuan, "nang leh kei chu hruihrual bilh zawm ang hlauh kan nih kha maw, hetia mahnia chet lak tuma tal lo hian, han țhu chhuak la khuaah Lal leh mualkilte thu vuak dan ngaichang turin i let thuai teh zawk ang khai.
zan tam riak tur faisa leh hriam țha zawk kan ken loh zawngin, a rem rem ban kuala kan lek chhuah Fei leh Kawlhnam te hi chu Sapui nawr nan chuan a khauh tawk lo deuh e ka ti"! tiin hmanhmawh baklenga Parchhingpuii chhan tura tlan chhuah paha, a ban awlsam sam hriamhrei an tlan chhuahpui te chu a duh anga a rin tlak loh thu a han sawi zawi sup a.
.
Ralthuma rawn fim ta deuh chuan a kip a kawia a zui țhin leh a mah hruai hrât tu pakhat, a u rual zet an khaw pasalțha daingul Zatuaka sawi chu a dik zia a hriat fiah rual chuan, a farnu erawh Sapui meuh chuan a phih filh vek tawh ang tih chu a ringhlel lo chiang hle a.
chutia ngaihtuahna fim zawk a put rual chuan, ruang dai mek tawh um nghal chuk chuka hriam nei mumal mang lo nena bawh ngawt ai chuan tiin, valupa Țhiangkawia'n Zatuaka thu rawn thlawp zui zat chunga, "a bawh kan hmanhmawh atalangin, Sapui kam lakah inhliam palh a hlauhawm hle tih hi kan hriat khiau a ngai ngai e" tia a rawn thual zui veleh lai chuan, Zatuaka leh valupa te thu chu a pawm thu Ralthuma chuan hreh deuh tak chunga a rawn sawi sup hnuah a chak thei ang berin tlangval leh paho zawng zawngte nen chuan, mawngvawmba ang maia chaka khaw lam pana tlan letin rei lovah Lal mualah chuan an ding ther ta fuk a.
.
Rang takin ro an han rel zung zunga, an chet chhuah dan tur pawh an ruahman fel hma hle a.
mahse, hetih lai hian mualkilte leh Lal Khawluta te ho hian, an hun tawn hi a khirh an ti ru țan viau tih chu an inrawn ngun danah chuan a lang ta tlat mai!
an rel anga Sapui kut ațanga Parchhingpuii ruang tal lak tuma inlek puk mek, an pasalțha rual te tukțhuan bar tura an țin sung sung lai te chuan, "kan ralrelin Zadeng ho a hawi tawha, kan țanhmun tur lah kan rem fel tawh ti a, Thla dê tirin milu a chawi leh chawi loh kan bih tawh mai chu achhapah, Bawngpui thlawk zui tuma khaw thlir mai kan nih tawh laiin, ka tunu chawi laite zingah pawh keh thei dawma ka dawm ber Chemteii chunga, bih loh khan lam ațanga Sapui kut a rawn tlâ ta mai hi ka ngai zam thei ta hauh lo mai e ka ti!
kan hetih tak si ah chuan, naktip maia Maubuh ruama inkulh tura luh tuma kan insingsa fel tawh meuh pawh kan țhulh a ngai ta der dawn anih hi le!
Chemteii ruang dai lah engtia rei nge kan pasalțha te'n an zawn dawn lah tu hriat va ni suh, a ruang ruh tal kan ruh loh zawngin a thla vakin a pu meuh hi min țah khum fo awm si a" tia kûn ruih chunga a Vaibel lu bih vung vung chung chuan Lal Khawluta chuan, an hun tawn dan avanga an ralrel pawh țhulh rih a ngaih dawn thu te chu a mualkilte bulah chuan a sawi sup sup reng mai a.
.
Mualkilte chuan an Lalpa rilru hnual zet chu an vaia rawn țawng thlamuan liam liam pah chuan, an relrel bawh hun tur chu khua a la tlai loh thu leh a tunu chu an pasalțha rualte meuh chuan an zawn rei an rin loh thu te chu an rawn sawi ve hlawm a.
mahse, Lal Khawluta chuan ralrel bawh hun an sawn tur thu ai mah chuan, a tunu avang chuan a lungngai hle a ni tih hriat zeta rawn rum leh deuh hulh țhinin, "ka lusun zam nguai lai hi zawngin ral bawhin kan pasalțhate che chhuak rih suh se, chuti lo zawng zulin a zui anga, vanduaina thuah hnihin kan ral bawh a zui hlauh dah a nge" rawn tih leh sup pah chuan Khumpui kawma Lalnu Darvuani leh a famo, Parchhingpuii Nu Velthluaii te insut fap fap lai chu a zuk melh leh rulh rulh a.
an Lalpa berin chutia a thu lak dan a sawhsawn tak rih miau avang chuan, mualkilte leh tukțhuan bar zo hriam chikim nen faisa bawk puar luah chunga, Parchhingpuii zawng tura zan tam pawh ngawpui hnuaia riah inpeih at chunga Lal mual rawn kai leh mek pasalțha țhenkhatte pawh chuan, an Lal thu lak tawpna chu a țha dawn zawka an hriat thu rawn sawi veleh hlawmin, kil khata Parchhingpuii Pa Raldawla leh pa țhenkhat țhu khawm laih laite pawh chu an Lalpa thu tawp siamna chuan a ti harh deuh huai hlawm a.
Ralthuma leh Parchhingpuii te pa Raldawla hi pa zam dam zet mai a nih avangin a pa Lal Khawluta leh a fapa Ralthuma te'n, thapui lak chhilh hnan nana chhim Lal Zadeng an phiar ru pawh hi a thlawp chiah lo hle a.
hei vang hian tuna a fanu avanga an ralrel zui hun an țhulh pawh hi, an vanduainain a hrin mah nise rilru nawm phah deuh nan a hman bakah a thlawp hle a.
mahse, a fanu nungchang țha leh hmelțha zet Parchhingpuii avanga amah chu sawi loh, a Nu Velthluaii leh Parchhingpuii unaute lungngai erawhin tawp ni a nei theiin a ring lo hial a.
.
Ni lu pawh a kang tawh viau tihah chuan, an rel angin Sialbuan khaw tlangval leh pasalțha rualte chuan Lal mual chu an han chhuah sana, Ngawia pa tuikhur awmna khaw hmar tlak lam hretah an vaia innghak khawm lehin, an han thlen kim hnu chuan valupa Țhiangkawia chuan a Muzukfei hawl lai lek kang vâ chung chuan "khai le! Sialbuan khaw pasalțha leh tlangval te u, Sapui suaiah kan tlawm kan tlan chhiat ngai hi tufa mahin va hre ngai suh i!
hmarah khaw lian ber chan chang leh pasalțha pawh khawdai khuap chhuak zak khawpa tam kawl thei khua tia chhâl kan ni ngai e.
kan Lalpa tunu hi a lu nungin kan hmu hman ta lo a nih pawhin, a ruang ruh zawng zawng kan khawm kim barh tur a ni tih hi i hre reng ang u khai.
Sa leh Ral lakah kan tlawm kan hre lo kan chungah Ni leh thla bak va leng suh, mual daih chhung he Sapui hnu hi kan zui tur a ni.
fimkhurna erawh tuma'n tlakchham lovah kan ti anga, aia u te leh ro lak fing zawkte thu kan ngaichang zel dawn nia" tia ring fiak zeta a fuih zawh hnua, van lam hawia an hriam lek suau suau chunga an lo au nghal hulh hulh lai chuan, a hma aia ring zawka rawn au chhuak lehin "Sialbuan valte u, kan hmaah Sa leh Ral a ding ngam tur a ni love, khawnge, mitthite pal nêk rawk rawk khawpin kan bengtawia chu i han nawr te'ng aw" rawn tih zui leh zat pah chuan a thlang ngawpui thim lama luh thlak chu a han rual nghal a.
.
Khaw lian tih takah Sialbuan khaw tlangval hote ngawpui lut thawm chu a țha bawk a nia nge, ngawpui kara Sava leh Satê deuh te chu an thawm hlau chuan an țil nghal ur ur a, an thlen chin perh leh țhang bukte lah a pê êng nghal uarh uarh mai bawk nen, tlangval zawng zawngte chuan an lo ngaihzawn ruk țheuh Parchhingpuii chu a thi tawh ngei dawn tih ngaihtuahna pu chung chuan, thinrim engphiarin chutia kal pah chuan an kawng dal hlek chu mau a ni emaw thingtuai a ni emaw an chhawk zawk zawk hlawm mai a.
chutih laiin valupa leh pasalțha te'n an sir tawn tawnah fuihna thu leh chophawkna thuin an rawn au țang zui tuarh tuarh reng bawk nen, Ni luin vailaizawl a han kai chhoh dawnah meuh chuan, infuih leh inla pawr sauh sauh chunga vak ta na na na chu an ngaw luh chin pawh a pilril ta raih raih hle a.
.
Ngawpui hnuaia seilian tih takah ralin an rawn chhui fuh lohna lai zel tur, ngawpui duk thim leh chhengchhe lai zel chu a zawh deuh fe hnu chuan, han tawm bona tur hmun biru lai awm te chu Chalvunga chuan a melh pah zel bawk a.
mahse, a mi man tleirawl chu a hnung lawkah a khawnawtin an rawn zawng nghal dawn tih a hriat chian avang chuan, thla ngam zana chung ho lo ep let tura chet lak zui theihna tur lai leh, rei tak pawh khawsak ngamna lai tur hmun a hmuh hma chuan chawl duh lovin, a duh tawka thui hmun chheng chhia hlir a zawhpui hnuah ngawpui khuh chin si, mah se ngawpui femin a zar hliah phak siloh bawn leh mau inpawlh ram bua zetah a chhuak ta hlawl a.
chutia a luhna ngawpui hnuaia tlak lam hawia a kal kual hnu chuan, a chhuahna ngawpui femah chuan a hnuhma chu thup duh tawh lovin lofing dawna thui chu mual mar phei chu a zawh par par hnuah khawi khaw chul emaw hi a lut leh ta a. 
.
Chu chul vaua a han din dat lai chuan a tleirawl put chu leiah chuan nghat thlain, chutia a han nghah lai chuan la maimitchhing tlat chung chuan chu tleirawl chu a rawn zi țiah țiah mai a.
chuveleh Chalvunga chuan a kawnga a Kawi thil suih beh chu rang taka la thla vatin a kê hnuai khing hnihah chuan, hmanhmawh zeta țawn bet ve ve in, a han țawnbeh zawh rual chuan Chul lu lam thlir chho ngar chung chuan tleirawl la zi țiah țiah lai chu a pu leh nawlha hmanhmawh zetin a chhohpui ta vawk vawk a.
Thlam ram tawh zet awmna Chul lu a han thlen hnu chuan Chalvunga chuan, a hma aia chak zawkin chhim lam liam zel chu chhuk zawnga a pan thlak leh ngat ngat hnuah chu Chul mawng Vau ngawpui dep chu a han lut leha, chuta țang chuan ngawpui bir leh thim lam zel chu tlak lam hawia zawh thla leh ngat ngatin, thuife a han luh hnu chuan a duhthusam hmun biru leh a tana chet rem tur ngawpui hnuai thim zet chu a pawh ta nge nge a.
.
Chu ngawpui Thing reng rengte chu patling pawm ai maha lian țhiau an nih deuh vek bakah, a chung lam mautluk hnih dawna sang china, hnah inkhachhuan tawn tup khawpa a zar lian zet zet insir phui chho mup maite chu Chalvunga chuan a hmuh rual chuan, ruahmanna fing zet a neih zui thuai chu achhapah, chu a ruahmanna chu a duh ang takin thapui lak nan pawh a tlak dawn tih a hre rang hle bawk a.
mahse, chutia a chetna tur hmun thlir kuala a din reng lai chuan a Sal man tleirawl leia a nghah zawh chauh chu a rawn meng diar diara, a ngaihna hriat loh hmel zetin a mah chu khup deuh dai chungin a rawn en ta kal mai a. Chalvunga lah chuan a duhtawka ril a thlenpui tawh a hnu chu, rawn țhut chhuah paha chutia a Sal tleirawlin a la rawn melh bial kal maite chu a ngaihsak lo nasa mai si!
vawikhat a han melh zauh bak chu a mit sir pawha en zui duh talo chuan, chung ngawpui hnuai Thing lian zet zet zingah chuan enge maw zawn bik a nei tih hriat zetin a vak kual ta theuh theuh mai a.
.
Parchhingpuii chuan ami hriat ngai miah loh chu sawi loh, a rawn harh ruala kam khat tal pawha be miah lo tu leh chuti khawpa ngawpui pilrila a mah pu bo tu vak kual lai chu hlauh rukna nasa zet nei chung chuan a thlir ngawi reng ringawt mai a.
chutia a thlir reng lai chuan awmna ngawpui thim dur mup mai hlauhna chu rawn nei thutin, khur zawih zawih chunga a din phat ruala amah hruai bo tupa a han thlir phei leh lai tak chuan, chupa, a hmel pawh hmuh chian theih lohva a mah hnungchhawn zawnga a kal liam tur lai tak chu a han hmu a.
.
Chuveleh Parchhingpuii chuan hreh zet chunga tlanin chupa liam tur chu a han uma, a hmanhmawh atalangin a puan fem te lah chu a tlan zawng chuan perh kuang khauh tak tak leh ngawpuichang bawm hling sei leh khauh zet zet te'n an lo tai thler kawk kawk mai bawk nen, ami um pa a zuk hmuh veleh a thlen china a din dat ruala, a thlang mautluk hnih vel leka hla a chupa lo ding ngawi rengin thinrim hmel zeta a lam a rawn hawi let lai tak chuan, zak em emin a puan țet kara a mal mum var em em mai leh khal mar nalh zet rawn lang paw phek chu a puan la thler lo lai pawh khawm nghal thuai thuai pah chuan a han hliah ve thuai thuai a.
a chutih tawh lai chuan chupa chuan inseh ruh țeuh chung leh rum dat dat chunga rawn pan chhovin, "mahni zelin khawsak kan rel ang" a tih ram hmak hnuah a inher nghata thlang lam bawk chu a pan san leh ta nghal a.
.
Chalvunga chuan, a duh ang taka lian lungthu ang deuha indo tawn zawnga hlam ruk dan vel dawna inhlata Thing lian zet zet ding khawm bik te chu a en uluk leh deuh hnu chuan, a zar sang zet ațanga ramhrui rawn uai thla sung chu zei zeta pakai chhoh nan hmangin, mautlawn hnih dawna sanga a zar lian chin in zar zawm phui chut kar chu a han luh pawh ta a.
a zar pheng hlai chin a inhnaih hlawm em avang chuan, ramhrui banrek rual rual te chu a han pawt khawma, a pawh khawmsa Thingzar te zawk ho chu a zar pheng lian zawk karah chuan pawt khawm leh vekin, rem zetin thingzar pheng inkarah chuan chung Thingzar te zawk a pawh khawmte chu a dawh zawl ta dap a.
chumi hnu chuan, Thingkak pheng zawl lai duh tawka țhut nan pawha hman theih khawpa lian chu a milulakchem chuan a rual thei ang bera a hlawi rem leh hnuah, a meitalh a han phawrha a thingzarpheng hlawi rual chungah chuan mei a nun ta zui ta a.
.
Ngawpui fachuam tih takah, ngaihtuahna fing zet nei khiau reng chunga Chalvunga'n chung lam thingzar kar zela buk a sual ziah mai hi, amah veha a hnu zui tute tan chuan a hnu chhui ti har tu pakhat hi a ni fo reng a.
tun țuma ral ho rawn chet hun tur ngaihtuah lawk khiau chunga buk a sual phei hi chu ralho tan chuan, awlsam taka hmuh mai chi a ni tawp dawn lo tih a lang chiang leh tawhin, leia mei nun lova Thingzar sang zeta meikhu a chhuah daih mai hi a finrawl chhuah thiam avang a ni tih a lang chiang hle bawk a.
meikhuin chung lam a bawh zawk zel dawn tih hi a hriat chian tluk zetin, a rim pawhin chung lam zel a bawh dawn tih leh, ralho chuan chung lamah mei a det an ring dawn hauh lo tih nen lam Chalvunga hian a hre chiang viau mai a ni.
.
A Sal man tleirawl chuan an awmna ngawpui hnuai thim dur mup mai chu a hlau hle tih hre chiang viau mah se, a farnu laka a nuța Ralthuma chet duhdan zawng zawng kha ni khat pawh la liam lo ang maia chiangin a mitthlaah a hmu reng mai si!
chutih laiin a hmel leh pian zia pawh en mang lova a put liam hnu khan, he a buk sual duhna hmun an thlen hnu chauh hian a hmel leh pian te chu a hmuh fiah ve chauh chu achhapah, a duh loh tawp maiin Ralthuma farnu pian leh hmel hian thâh hrehna engemaw tak a neih tir tlat mai a.
mahse, huatna a khat tawh Chalvunga chuan Ralthuma farnu chuan a rilru put hmang chu a hriat loh nana thup tlatin, a farnu Darhliappuii mizia leh a mize in ang chiah mai te avang chuan a ruk takin a ngaina nghal tlat mai bawk a.
chuvang chuan, he tleirawl hi a that dawn nge dawn lo tih hi a rilruah a ngaihtuah nasa tawhin, a buk sual thingzar ram chunga chu tleirawl țhu nu zam mai chu a han thlek leh zauh a.
chutia a thlek rual chuan ani lah chuan chiang zetin a lo en reng mai bawk nen!
Chalvunga chuan a va en ruala chu tleirawlin rang zeta hnuai lam a bih lai te chuan, a farnu Hliappuii mizia bawk chu ngaihtuah leh tawhin thah lohva an khua a dah let leh duhna a nei ta hial mai a ni.
.
An buka zan khat an han riah hnu thimțin tirh ațang chuan, Chalvunga chuan ralho an rawn lan theihna awm hmun hrang hrang khaw chuan turin buk ațang chuan a chhuk nghal thuai a.
mahse, Ni lu a san fe tawh hnu pawh chuan ralho chu a ruahman ang chiaha inzawm lo zet zeta a hnu a thlah chuan a bum hneh hle tih hriat loh rual lohvin, theireh takin an reh hmak ahnu hmanah, a hnu kual fe fe leh a changa a hnu thup bo nana a kawi thil a kea a țawng bet daih zel te kha an buai phili phah hle tawh a ni tih pawh a angaihtuah chhuak rang hle a.
mahse, ralho hian an Lal tunu zawn hi an beidawn san dawn hauh loh chu achhapah, an tawmna ngawpui hi an la rawn dap thleng ngei dawn tih hi Chalvunga hian a hriat avangin, hetia inhai buai tir fe phawta an buai chhunga an tawmna ngawpui chu lo bih chian hman vek hi a tum dan a ni leh chiah a.
mahse, chu a tum dan chu a hnu chhui hleih theih lohva a thlah tlat avanga, uluk zeta ramchin a bih kual fe pawha an la rawn lan ve theih tak miah loah hian a hlawhtling thawkhat tih hi Chalvunga hian hre chiang viau mah se, mal țan tur na na na chu a ralrel valh hnihna a valh fel leh thuai loh chuan, ralho hian an rawn tam hneh rang hle thei tih pawh a hre chiang hle a!
a hma nia a changa a hnu lang ngei tura a kal kual vak țhin leh a changa a hnu lang thei miah lo tura, a kehnuai khing hniha a Kawi thil țawn bet chunga a kal leh ta daih zel khan a ngaihtuah lawk ang ngeiin, ralho chu a hruai kawi hneh hle tih hi Chalvunga hian a hre chiang thawkhat tawh hle a.
chuvang chuan, a ralrel valh hnihna tur chu hetia an buai chhunga lo ruahman fel diam tura inpuahchah lehin, ram chin pawh chu rei bih kual lovin ram thei leh zungpil no deuh zawnga a thlang lama a liam zui vang vang hnuah, chawfak hun dawn tawh awm velah an buk chu a kai chho leh ta a.
.
Ka Type laiin ka Lu a nâ deuh tlat maia, duh anga thui ka type thei tlat lo.
min lo hrethiam lawk ula, naktuk lamah eps 19in zawm leh kan tum mai dawn nia.