CRYSTAL HILL, BUNG 4

CRYSTAL HILL, BUNG 4
💱Recap
Joani message tur chu a type leh zung zunga "naktuk chu khawiah mah kal bo lovin, i room ah inkawm mai mai zawk ang hmiang" tih chu a tawp nan tum nei ranin a send leha, Joani'n a lo delever veleh chuan, a zangthal zawngin a Khumah chuan a let phei thaka a maimitchhing zui ta vang vang a.
.
Llpa rokhum//Room tukverha dak vang vang chung chuan a sir ding lama ding Joani chu Rafela chuan a han melh zauhva "i search hmuh tawhsa kha print rawh le" a han ti zawi sap a.
Joani chuan Rafela thil duh chu a ngaihna a hriat tawh loh em avang chuan, Mizoram leh Myanmar state boundary a save sa zawng zawng Computer file-a a dah luhsa chu a han print thuai thuai a, chutia a phet buai laih laih lai chuan chung map te chu engatan nge a tih!? tih chu a zawt awl lo bawk a.
mahse, chung a zawhna zawng zawng chu Rafela kâ aṭang chuan chhanna a dawng chuang tlat lo! 
thil dang daih a ngaihtuah tih hrat zeta Rafela ngawi reng lai chu a rawn hawi phei zauhva,
"ṭhian hovin ram dangah sum tuaka kal ve kan tum a sin" 
a thu rawn sawi teh daih chu Joani chuan a hrethiam chiah lo tih hriat zetin Rafela chu a mit meng mawi zet chuan a han melh kala, a thil tih lai chawl meuha ṭhut ṭhat sauh paha a thawk a lak hak hnu chuan "in thil tum chu i Pi peh Pu te'n an rem tihpui dawn che em ni"!? a ti ta sap a.
.
Joani hian a thlahlel hle tih hi Rafela hian a hai hauh lo!
a ngaihzawng hlui tam ber te aiin ani pawh hian a ngainain hmelṭha a ti bik hliah hliaha, a mize nu zâm mai leh a pian nalh zet, siamtuin duhtawka a duan ang maia a lian lai tur leh a vawng lai tur vawng taih mai te, a kawh lai tur kawh lah mai te leh a fêk lai tur siam chawpa zût mam leh hlarh ang maia fêk rât te, a vun ngo no paw phek mai leh a sam sei dum hlap mai te hi a mizia nen hian a inchawih zia a hai bik hauh lo. a mithmul er sei sang mai chawih zeta a mitmeng nalh zet leh a hnar sang vehvawh thlawp chawih em ema a kareh mawi zet ti itawm zual tur tinga a hmui sen vam hiam mai te, Lasi te zinga tualchai ṭhin niawm fahrana mawi Joani ngei hi a vei ber a ni tih hi Rafela hian a inhai ngai hauh lo. "mipa fa chuan, mawhphurhna sang zet kan neia i la hrethiam ve mai ang" tih zawih sap paha Joani a han melh leh ran lai chuan, Joani chuan a thinlung chhung ril zet aṭanga a rilru no rawn tawt up up thup tum ve hram hram chung chuan, "engmah ka duh lo" a ti sep a hnuai lam a bih ta vat a.
.
Rafela chuan Joani thu sawi tum mah se a sawi leh ngam tak loh chu a lo man thiam leh hman veka, nui sak chunga Joani chu a pan hnaih hnu-ah hnai zeta inringtawk zet chung chuan enin "in chhungkua hian mamawh dang in nei hauh lo. 
kei erawh chuan hmabak ka ngah a ni" a han ti leh a.
chutah meuh chuan, Joani chuan a thinlung chhunga a mah rawn tur tawt ap ap tu chu a thup hlen thei ta ngang lo "pawisa chiah hi i hlimna em ni Rafel" a ṭah a chhuak tawh ngang bawka a 'aw' pawh a no nalh zual kher mai!
"mahni nupui man tur pawh nei zo lo ka nih hi i hria tiraw!?
mipa chuan, kawppui a neih hmain a mah intodelh a tum hmasa tur a ni" Rafela'n a rawn tih leh lai te chuan, a mit meng mawi zet phena a mittui rawn hnam ṭiam ṭiam chu Joani chuan Rafela'n a hmuh hlau tak chuan lehlam hawiin a hru fap fap a.
.
Eng ang pawhin dan tum dawn mah se, Rafela zawng mipa luhlul leh Sehhel a ni tlat tih hi Joani hian a hai hauh si lo, kum an inzui tling tawh chung pawh hian amah a hmangaih thu leh a duh thu lah a sawi rik duh loh chu thuhran, ani lah tleirawl zakzum rual lek nita chu a duh ngawih ngawih a ni tih te, a vei em ema a nunphung thlengin a buai phah fo tih te hi a sawi ngam teuh si lo!
an inkawm laia Rafela'n hmeichhe dang a message lai te hian thinrim em emin a lo insawh nasa thei hle a.
mahse, chutia a insawh tau ve nghang nghang lai te chu Rafela chuan hre awm pawhin a lang ngai bawk si lo, a lungawi loh em em lai pawha Rafela'n nuih sak paha a han biak hi chuan a rilru a hlim chawpchilh leh thuaia a nui leh seih seih lo thei ṭhin lo a ni.
.
Mahse, tun ṭuma Rafela'n a thil mamawh tih tir chunga ram danga hna zawng tura a kal tur thu a sawi zet hi chu, Joani hian a dawngsawng thiam lo hle tih chu a awm danah hian a lang chiang hle a. inthup duh si ni dang zawnga a tauh ruk ṭhinna aia thu danglam a nih avang erawh chuan inthup a har a ti ṭalh ṭalh hle tih hriatzetin, "nakin hun aiin tun hun hi ka ngaihtuah daih zawk" Joani chuan a ti zawi leh sap a.
Rafela chuan Joani awm dan chu a hmuh ruk khiau avang chuan, rilru dam zawka an inthlah theih nan enge maw tak tih sak chu a ṭha viau tih a hriat avangin "tuesday ah hian dinner kan ei dun dawn nia. tun atan chuan, kan thil tih lai hi i zo thuai teh ang" tih leh Computer hma a ṭhut chu rualin hmanhmawh zet zetin a map mamawh tur awm dang la awm thei tur chu a search leh ta zung zung a.
.
An ṭhian hova dinner an ei ho fona ṭhin Aizawl tlak lam hmun thengthaw zeta Spot pakhat, open air pool in a hual chhuah chiata couple te te a hmun tina dinner kil fir fer te zingah chuan, tlak lam bera ṭhu dun rawlthar leh tleirawl hmel ṭha dun zet leh inhmeh em em te chu tupawh chuan an melh bing ngun hle a. midang zawngin an en leh zauh zauh ṭhin tih chu anni pahnih chuan ngaihtuah lek lo chuan, ngawi rengin an ei in tur inchhawp hrang hrang te chu an spoon ken lai chuan an ei mial mial a, an chezia ah chuan helhkamtu enge maw an nei ve ve tih chu hai rual a ni lo! mipa zawk chuan a bula soup a han lem khalh hnu chuan a hma a ṭhu chu fiah zetin a han en a "mamawh i neih chuan sawi zel rawh aw" tih zawih sap pahin a spoon bawk chu a ban leh nghal zat a.
.
An ei kham thleng chuan Joani chuan Rafela zawhna chu a rul tawk baka a chhan lem loh avang chuan, Rafela meuh pawh a hrilhhai ve lek lek tih hriat zetin Joani dara kuah chung chuan a kal ngawi ve hmiah hmiah mai a.
mahse, chulai hmun aṭanga an inphurh chhuah hnu khua a tlai chhiat hma a, a chhungte ngaihdan a nih loh palh hlau zeta ama room a Ni tlak ruala a thlenpui leh hnu chuan, "ka sawi reng kha, ka dinhmun hi a laklawh viau a, mahni intum chawpa mipa chu chhuah ve reng reng a ṭha ka ti, ka rilru ka thlak thei tawh lo" tia phun sap sap chungin Joani room verandah thlang lam railling ngheng chuan a ding awn deuh da a.
Joani chuan a zahzumna zawng zawng chu dah bovin a thinlung chhung ril zet chu phawrh vek law law chu duh viau mah se, mipa ah pawh rilru luhlul Rafela lung chu a kuai thei chuangin a ring silo!
a tum ṭhulh tir thei chu engmah a awm dawn lo tih a hriat chian avang chuan, ṭah chhuak zet chungin a insum hram hrama khawi rama kal nge a duh tih te chu a zawt thei ta hram a.
chu zawhna kher kher chu Rafela chuan thudika chhan chi a ni hauh lo tih a hre chiang bawk a, a kal duhna ram chu tu hriat chi a ni lo ti a ngaihṭha lo zeta siam ai chuan tiin "Mumbai thlen phawta chuta ṭanga ram hrang hrang job tender list en mai chu ṭha-in kan hria. flight ticket lak chu ka ui deuhva Train in bul kan ṭan mai ang chu" a han ti liam puat a.
.
A rilru chhung rilah Joani laka a inpha kual chu inthiam lo zet mah se, tun atan chuan chutia tih bak kawng dang a awm lo tih chu Rafela chuan a hre chiang si! a hlauh ang ngeiin Joani'n train a kal ai chuan flight tricket lak sak a duh thu leh a mamawh zat pawisa chu sawi tura a nawr zui takah meuh chuan, a rilruah hmeichhe sum hmanga inlek kual duh reng reng lo chi a nihna chu a rawn lian zual thuta "ka nei ve a lawm, ka han fiamthu mai mai a nih kha flight tricket pawh ka la fel tawh e" tia a phat leh zauh hnu ah "kum 3 bak kan thang lovang, ṭhian ṭha chu kan inhmu leh nge nge tho tho dawn a lawm le" a ti awlsam leh ta êt a.
.
Ni 27 zirtawp ni tlai lam a ni a, Rafela chuan a phone-ah zawi raiha ṭawng chung chuan, a Pu chu dam ṭhat thu leh a tuk zing takah an ṭhian thuma an chhuah tawh tur thu chu a hrilh zung zung a.
a Pu chuan rem ti chiah lo mah se, Rafela sawi chu thu ho mai mai a ni ngai lo tih a hriat avangin ṭha taka kal tluang tura a duh thu te, khawiah pawh awm se Pathian malsawmna leh venna a Pi nen ṭawngṭaina ah an lo dilpui reng tur thu te chu a rawn hrilh let sar sar a.
Phone a dah hnu chuan Rafela chuan a vawikhat nan, a Pi leh Pu te chu dawt a hrilh tak avang chuan nuam lo tihna enge maw tak chu a nei tih a hmelah chuan a hriat theih hial a. mahse, a ruahmanna chu a ti lo a nih chuan, thing tlang lamah a Pi leh Pu te chu a fin anga an tan harsatna a siam zual ting dawn tih te, a mamawh ber Tiger brain lah chu a tan a harsa zual ting dawn tih te chu a hre chiang a, chung te avang chuan a thil tum chu chhungte tana harsatna a vai kian sak theihna ṭha ber nia a hriat avanga ti a nih thu te chu hre nawn lehin, ani tan lah hnianghnar zawka a thil duh ber a hmuhna tur a lo nibawk nen, thil dang ngaihtuah tawh hauh lova a tumna chu rilru nuam taka ti tura a inbuatsaih sauh sauh chu a tan a ṭha zawk tihah chuan a innghat fel ta thlap a.
.
Zanlaiah chuan, an ṭhian thum chuan an chhungte ṭheuh an hmin fel tawh bawka tiin Bibi-a room ah an inkalh khung sauh sauhva, an tana thil pawimawh ber khawchhak lama Mizoram state boundary map chu an study ho leh ta a.
.
Map ah chuan, mizoram rawn hnaih ber myanmar ram chhunga khaw lian ve deuh chin awm te chu an han en ho leh a, Tonzang leh Falam bakah Hakka leh Thantlang te chuan ril deuh zawk aṭangin an rawn ep viau tih chu an hre chiang viauva.
South west lamah Mantupi leh Paletwa te chu ei tur chhek tur lam nan a rem dawn riau tih an hre chung chuan, myanmar ram lai taka tan tlang ruah tu Luipui lian em em irrawddy luipui leh chung khaw hnih te inkara khua te chu a inhnaih hlawm viau tih an hre tlat mai a!
hei vang hian chhak lama awm Tonzang khawpui lam hnaiha luh chu ṭha a an hriat tlan hnu chuan, irrawddy luipui dung chhim lama khawpui pahnih Kalemyo leh Mandalay pawh chu Tonzang nena kar tawn nan chuan tawk tiu teu viaua an hriat avangin, he khaw thum hi an awm hmun khuar tumna state boundary lai chiah aṭanga hla lutuk lo vek a nih avang hian, a ṭul changa kar tawn kual nan a ṭha hle dawn tih an hriat avangin an duhna hmun tak chu an ṭhian thum chuan an lung tlukpui viau a ni.
.
An awm hmun khuar duhna hmun hi chhak lam aṭanga an thil duh rawn tawlhna kawngpui ber a nih tlat avangin, Rafela thluak ṭha zet hian an mamawh tur chu a lo lam khawm rang kher mai a.
ruihhlo an rawn tawlh luhna kawngpui kal dan chin nen lam a hriat chian avang hian kawng dangah tawlh tho mah se, tuna an inkhuar tumna lai hi khan ṭha ber a ni tih a hre thiam tlat mai a.
Irrawddy luipui chhak lam aṭangin irrawddy luipui dungah zanlaiah te Lawngte-in an rawn tawlh thla a, hmar lam an rawn luh thui fe hnu ah Tonzing leh a chhehvel khaw ṭhenkhata an agent te lo delever leh turin vau kamah uppet ho chuan an vawrh phawta, chuta ṭangin irrawddy luipui dungah vek chuan an let chho leh ta ṭhin a ni tih te pawh Rafela hian a hre chiang hle a ni.
.
An ruahmanna fing zet chu a tawpna an rel fel thawkhat bawka, zing lam dar 2:00am velah an chhing seka dar 4:20am velah tha tho zetin an tho leh vek a.
Bibi-a leh Zela te chuan an Bag ah Dagger ṭha zet zet an dah ṭhat khiau bakah, Rafela chuan a Pu Pistol Cz75B chu a peihsa at bawka.
an chhungte ṭheuhin an insawi anga kal tak tak tur emaw an tih avanga pawisa tlem chhe lo tak an pai ṭheuh nen, a hma fe aṭanga an lo inlam lawk Savuna siam lam thuamhnaw lum a tam thei ang ber nen mahni Bag ṭheuhva inbeng puar alh chung chuan Airport lam pan tum niawm taka tukṭhuan ei kham dar 10:00am vela an chhuah hnu ah, Aizawl hmar lama Rental office pakhatah an lut diaka an Motor hman duh an la fel vat a khawchhak lam panin chak zetin an tlan liam ta a.
.
Mizoram assembly boruak inlumleh dan chu a sosang nasa hle tih hriat zetin, house member za ah sawm pawh tling phalo Lusei pa pali, LPW party oppose lama ṭhu zinga Lusei ze hum tuma ṭan khawh reng ṭhin Pu Ronghaka, Pu Siamliana leh Pu Zosanga te chuan, CM mizo leh Hindu thisenin a din Chandra leh a ui pa rual a tam zawk Lusei leh chi dang inpawlh thisenin a hrin te duh dan, Mizoram hmar lam thingtlang khuate chu a tam zawk khaw khat rem chang deuh laia pem khawm tir leh, an hmun hlui chu an ram chhunga rawn luh dil hnam dang ral tlan leh hnam te zawkte tana awm hmun khuar nana dah chu an hnial nâ ṭhak ṭhak hle a.
mahse, state ho tu lu pahnih CM leh Governor Gautam te chu chi khat an nih piah lamah Lusei ho ram nawk ral vek duh mi ve ve an ni si!
Lusei pa tan chuan an thu chai lai chu hneh a harsa chho tulh tulh dawn tih chu a lang chiang hle tawh a.
chu an thu khel khirh zet tih tlang tum chuan, CM Chandra phei chu a rak nasa-in "hamaradesh ah hian hnam hrang hrang kan zalen tur a ni a, state bil chhunga hnam bil tia inlak hran hi Danpui kalh a ni" ti ngul ngul chungin Danpui tlawh chhanin Central a lo hmin daih tawh tih a thusawi duhdan aṭang ngawt pawh chuan a lang chiang viau mai a.
ṭhutkhawm an han ṭin hnua Pu Ronghaka'n rilru nâ zeta Lusei ram tlu hlum lek lek tawh chungchang ngaihtuah reng chunga kawtthlera hnam dang leh thlah pawlh inthlahrung lo zet maia an lo zi hut hut lai a thlir vang vang laia, "kan rorelna fung vuantu hmasate sum bawihah an tang rei lua a ni e. hun tam tak an neia, kan ram leh kan hnam humhalh aiin mahni pumpui chhah hnawh puarna tur ngawt an zawnga, hnam dangte laka kan ram chhung ngeia Lusei hnam te thisen a luan pawhin kâ ṭhui pin sak ang maiin an ṭhu ngawi hle hle ṭhin si!
kil tinah hnam dangin an rawn nek sawr chang lahin an beng dar a kêh ta emaw tihturin an bengngawng hawi mai mai a, khuavang ramri kham chin pawh sât thar ngam reng reng va awm suh!
an chutih laiin, hmun changkang zawka zirna leh thiamna bel kan Nula hmelṭha ṭha te'n hnam hnukpui tan a pawi em em a ni tih ngaihtuah duh hlek lovin, thisenin hnam chi an lo pawlh dal nasa telh telh mai bawk si a. kan tlangval thâ chak tak tak te'n ruihhlo ngaih ban tikni nei lovin, an thlah keini ho tana ram leh hnam lo vauh lawk thei khawpa chakna hi nei bik bawk hek suh le!
tunah meuh zawng, kan rorelna Inpui sang ber pawh ralin an hneha, Lusei Lu la hnam chu tih tlawmin kan awm chiang ta bal tih hi kan vawiin hun hian a va hril chiang tak em" tia Pu Zosanga kûn ngâih hmelah chuan lungchhiatna nasa em em hmel a chhiar theih ta hial chu a en ngawih ngawih mai a.
.
Ani lah taka, sawi tawh angin he ram tereuhte a chhunga cheng hnam duhawm zet rinawmna, tlawmngaihna, huaisenna te'n an pi pute hun lai aṭang tawha an lo cheimawi hi kum 2070 an han chuan chhuah zet chuan, hnam tia chhiar tham an awm tawh mang loh nachhan hi a inṭanna a ril em em a.
an pi pute chu hnam huaisen Lu la hnam ti a chhal ni mah se, hmelma lakah lo chuan nunze mawi leh huaisen em em Khawvelah pawh Tuipral thlenga vun ngo ho pawhin an hrilhfak khawpa hnam ze mawi an ni a.
an History ah te reng pawh Khawvel hruaitu huaisena chhiar Hitler te, Nepoleon bonaparte te ai pawha pa rothap Lal leh Pasalṭha nei an nih zia te a chuang keu kuau a, ral lu an lak mai duhtawk lovin riam takin an han lâm khum zui ta mai ṭhin te chu hnam huaisen tia an chhiar hnam kawlh dangte zingah ching an awm ve mang tlat lo! Khawvela hnam kawlh bera an chhiar Apache Indian te ai pawha mahni hnam leh ram humhalhna kawnga hnam kawlh leh huaisen ni ṭhin kha, ṭhangthar zel te'n an pi pute hnu an thlawp loh a leiah an thlâh zel te chu heti khawp hian an lo chêp ta a ni.
.
Rafela te ṭhian thum chuan an map leh compass chu an hmang thiam bawka, mi dai loh lam tura an rin Champhai district hmar chhak Khuangphah khua aṭanga state boundary hrul ram pilrila an han luh meuh chuan, mipa pawh nise ram ril la dai ngai lo an nihna chu an chetze zawi ṭan riauah chuan a lang ṭan hle a.
mahse, an thluak bur Rafela erawh chu a boruak tawn a zira mihring inthunun thiam leh zei thlep thlawp a nihna chuan a ti tha tho telh telh tih hriat zetin an ram luh chin ngawpui pil dur thim mup mai te chuan tha rilru leh thâ chakna a pe zual telh telh tih hriat zetin a vei theuh theuh mai a.
Bibi leh Zela te erawh chu an chauh a nâ telh telha, "helai hi riah nan i hmang mai ang u" tia Zela'n kal zel tawh rih loh a rawt nawn leh takah chuan, "khua pawh a tlai tawh viau a nih dawn hi, chawl hahdam ila a ṭha lo maw"!? tia Bibia'n a rawn rawt ve tak avangin Rafela pawh chuan an thlen chin en fiaha map bih vang vang chung chuan riahna hmun tur zawn a ṭul hmasak ber thu chu a sawi ve ta a.
.
Chulai ngawpui hnuaia zan khat an riah hnu chuan, a tuk varṭian rualin khaw chhak hawiin an kal leh nghal ngat ngat a, an thlen chin ram pawh Ni sa boruak lum luh pawh theih mang lohna khawpa ngawpui chhah leh thim dur a lo ni ta!
an chawlh a piang chuan, Rafela chuan khua emaw kawngpui emaw a la hnai em tih en reng reng chuan a map zial bawk chu a phelh vat zela, a duh ang taka pil ril leh chet awlsam tur si erawh chu an la pawh lo tih a hriat avangin chumi ni pawh chu an vak nileng leh ta ṭhaka.
a tukah pawh ni tla leh tla lo pawh hriat thiam har tawh khawpa ngawpui duk thim mup mai hnuaia an vah leh fe pawh chuan, a target point duh lai chu an la pawh lo nia a hriat avangin Rafela chuan a ṭhiante pahnih chau lek lek tawh chu a la fuih sauh sauh a.
mahse, chumi tuk leh lama an han chhuah leh hnu chawhnu lamah chuan, ngawpui ruam thuk zet hnuaia Lungpui lian zet zet, In lian pangngai tiat tiat insir bawk khep khup hnuai Puk kaw kel biru zet zet te chu an Buk ruk nghet atan Rafela chuan a thlang fel ta a. chung lungpui hnuai kaw riak ruak te chu tuihna ṭha zetin a sir zai zaiah a luan khung her her deuh vek avangin mihring chen nan chuan a tlak thawkhat tih chu a chiang hle a.
mahse, Ni eng erawh a luh mang loh avangin chhunah pawh meichher chhit titih ngai khawpin chung Lungpui hnuai puk te chu a thim tlat mai a. chuvang chuan, mei khu a chhuah pawha chulai ngawpui hmun tina a rim a chhuah loh theih dan ber chu an zawn a ngai ta a ni!
.
Puk kawkel hrang hrang an fan vek hnu chuan, a kaw zau ber lai chu an thian fai te te a, a kawkel dangin a rawn pawh tamna lai berah chuan mei chhehna lai tur chu an han siam ta a.
chumi hnu chuan, chung lamah an vak chhuaka an Buk chung lam Lungpui lian tak tak insir khep khup kara Thingtuluang kawrawng Ui pum rual vela lian, hlam sawm dawna sei bawk zan chu hnuai lama an meichhehna tur zawnah chuan nghet zetin an sawh tlang thla ta a.
chu an thing kawrawng sawh phun bul lam chu hnuai lam aṭang chuan an hawlh kaw chho leha meikhu hip thei ang ber turin lungtumin an sawh hual leh ta a.
.
An hlauhthawn ber an mei rim paih bona an siamfel tawh bawka, meipui an chhep sauh sauhva an ei tur pai te chu an thuk phum hlarh hlarh mai a.
chutia meipui kil chung chuan, an pathum chuan boundary map bawk chu mei êngah chuan an han bih leh ṭhapa, an duh dan chiahin myanmar puppet ho kawngpui pawh an Buk aṭang chuan chawhma kal vel chiaha hla a ni ta chiah bawk a. mahse, a tuk lam hna atan chu kawngpui en fiah chu an rel thlu thuaia, an pum an hnawh puar te te hnu ah mahni thuamhnaw lum ṭha ṭheuh inbelin tui zetin an muhil ta siai siai a.
.
An awm hmun an khuar fel aṭanga Thla hnih a liam chiah tiha myanmar puppet ho an han lambun ṭan chiah aṭang chuan, an Puk Thla de tir ang deuh hleka kawkel kual raih chawia 'moon gate' tia a hming ruk an phuah chhungah chuan, Tiger brain chu an chheprelh tam ta hle a. chuti khawpa hrat laka che chho ta na na na chu a ni telin an nun pawh a rawng chhovin, myanmar puppet ho talh chu timna nei lo lekin ngaiah an nei a ni ta der mai a. kum a ral dawnah meuh phei chuan, an Pawl hming atan chuan an thu ruk rel ṭan kum chawiin 'Agent71' tih an invuah sauh sauhva, mi paliin an pawl chu an rawn zawm ve ta bawk nen, State boundary hnaiha Myanmar khaw ṭhenkhat leh Mizo khua thleng chuan an chet dan rawva zet chu a darh ta nge nge.
mahse, heti khawp hian che rawngra mah se anni ho hi tuman tute nge an nih an hre hauh lo!
Myanmar puppet te zinga Mizo tel ve te nen lam an dah ṭhat hmiah hmiah zel avang hian, ruihhlo tawlh pawl lian tak tak te hian burmese tho an nih te an rin chang a tam phah mai bakah, an lo lambun apianga thih ṭih hlek lova an che mai ṭhin leh an inbeih buai laia inbiak nan ṭawng hmang miah lova, Code hrang hrang an hmang daih ṭhin te chu an bo phah map map hle a ni.
.
2073.13.8 zing lam a ni a, Agent71 te pawhin an thluak bur Rafela ralrel dan chu a vawihnih nan an chai ho leh laih laih tawh a.
"vawiin atan chuan, Kalayam khan an rawn zawh dawna a lan avangin, kawngpui chhuah hma Kham khawkrawk hmunah khan Bibi leh Puia leh Nuna leh Chacha te kha in lo tawm anga, keinin in target point chhunga rawn hnawh luh tumin hma lam Far hmun kha kan lo luh khalh ang.
an rawn lan hun tur hi hriat lawk a nih loh avangin, ei tur leh tui kha pai sa u la. kan mithar pawh a vawikhat nan a che zia kan en ang chu" tih ram hmak pah chuan Rafela chuan an pawl rawn zawm tu thar ber, fiahna a paltlang hram hnua tawrhchhelna nei tura an hrual hrep Kimtea chu a han melh khâih a.
an chet chhuah hma chuan an zavai chuan tunṭum an chetna hmun tur hi chu, Kham leh hmun chhengchhia a nih dawn avangin che fimkhur viau tura an inchah hnu ah, vawi enge maw zat an lo lambun tawhna lama an lak sak myanmar puppet ho Silai zinga a ṭha ṭha keng far chung chuan, an vai chuan Kalayam khan pan chuan an chhuak ta a.
.
Kalayam khan awmna hi Ngawpui khuh thim mup leh kawng ruk em em a nih avang hian, puppet ho pawh hian tam tham deuh an tawlh dawn ṭum chauh lovah chuan he khan hi an zawh duh lem lova. he khan an zawh ṭum hi chuan, him taka an kal theih nan assasin leh Silai kah thiam tak tak an hruai tel ngei ngeia vawikhatmah he khanah hian an la che sual ngai hauh lo reng a. tun ṭumah hian, khan danga an tawlh apiang deuhthawa mak tak maia State boundary lai vela an mi tirhte chin hriat mang lohva an bo duak ṭhin leh, an ruang hmuh kim mang lohva bo hlen ta fo te avangin Shooter ṭha leh hriam chelek thiam rual tam zawk hruaia hmun khata kal tlang pui duaka Ṭiau mawng lama vawrh darh leh an tum a ni.
.
Myanmar puppet pawl lian pathum Taunggyi Cat, Lion leh Pathein Gun te hi inngeih lo viau mah se, an pawl ruihhlo tawlh lo phil bo ṭhin tu an awm aṭang hian an inbe rem chho hle a.
a tirah chuan, heng pawl pathumte hi an inringhlelh tawn ṭheuhva a khat tawka buaina tenau an neih fo piah lamah Gang fight a chhuah tak hial bakah, an pawl thum member nilo Civil Customer thlengin an buaina avang hian an thih phah nual a. mahse, hun a kal hret hreta, Boundary fighter ho hi anni pawl thum innghirnghona avang emawa rawn inrawlh eng pawl ber emaw an ni hauh lo tih hi an hre chhuak hnuhnawha, chu chuan an pawl thum inkarah inremna a hring thuaia an pawl thum hian Kalayam khanah hian a huhova ruihhlo tawlh mai hi him taka an kal theihna ani zawk dawna an hriat avangin an rawt ho ta a ni.
.
Ngawpui hnuaia nun inthlak thawka kawsa an nih achin an thil duh la tura nunchan an han zir tak tak aṭang hi chuan, kum thum a han ral leh meuh chuan mahni nunna thapa mihring tawrawt tak tak hmachhawn leh nun ralṭi reng renga khawsa an ni ta bawka, sawi tawh angin Rafela te ṭhian thum hian insual, Silai kah, ralrel leh hmelma bum hi chu duhthusamin an thiam hi a ni hawt tawh a.
a bikin, mihring danglam Rafela ngat phei chu Bibi leh Zela te aia rilru chak leh tha ngah a nihna te hian a chungnun tir zui zela, an pawl rawn zawm an awm nual hnu hi chuan hotu chan a chang titih der tawh a.
mahse, Rafela hian a ralrel hi midang ho hian zawmin zah ru riau mah se, hotu ber awma awm chunga awl mai mai emaw, myanmar puppet ho an phil changa ral muanna lai laia lo tawm sen mai mai hi a duh der lo!
a hmatawngah ngat ṭan hmun siam hmasa ber a nih zat zat bakah, ṭhiante thlawpa thih huama che nâ berah a ṭan ziah chu sawi loh, chet dan tur him zawk zawng chunga a ṭhiante ṭan hmun en kual zat zat tu ah a ṭang ngei ngei ṭhin a.
hei vang hian vawitam Silaia kah hliam a tawka, myanmar puppet hovin an sual rawn chang lah a tam.
a hmaifang ṭha zet pawh tunah meuh chuan a lang hriam lek lek tawhin, chutia a cher ta deuh hlek leh a khabe veilam ser kal raih te chuan, a hmelṭhatna erawh chu a belh sauh thung emaw tih tur a ni thung a.
a han inchei danglama, an a ṭhiante ngawt ring mai lova Paletwa leh Mantupia a an eitur lama a kal chang te chuan, chung lai khua leh a chhehvela Historical place tlawh Tourist Ram dang Nula leh tualchhung Nula duhawm tak tak lo zi hut hut ṭhin te chuan, a pian sang ria nalh zet leh a hmel pa hrak te chu an lo en duh theiin, Pa til chêh tak chu nise zan khat Ar thau anga tlâk cher rawih na tham Nula chen tur chu a hmu awl lo ang tih chu an melh dan aṭang chuan a hriat ṭhin hle a.
mahse, Joani a ngaihtuah reng ṭhin tih lohvah chuan, a tihtur hmabak piah lamah hmanrua atan a la ṭangkai mahna ti-a a thlun beh Thailand tleirawl duhawm zet, nungcha chi hrang hrang tamna ngawpui epa awm Paletwa a biological science a master digree neih tuma Research ti mek, sang thlerh thlawrh ngo no paw phek mai leh sam ngil mitmeng mawi zet, a hmelṭhatna piah lama a pian mipa hip zet Apinya inkhuarna White star Hotel room no 703, privatise zeta cheibawl zau zet leh changkang zet chu Paletwa a kal apiangin a tlawh hmaih ngai hauh thung lo.
.
An luhna a ril ta bawka, Kalayam khan pawh an hma lawk tlang dung tluanin a lo inkhawh phei zui tawh a.
an ralrel lawk ang ngeiin Kalayam khan ngawpui inṭanna an han luh chuan, "Far hmun kan luh saw chuan, nangni chuan in position tur in thlang fel diam tawh turah ka ngai" tia zawi sapa Rafela'n an thutawpna a sawi lai chuan, Bibi leh a hruai hran tur ho midang te chu a han en kual a. Bibi chuan Rafela thusawi chu rang taka a lo buk khum nghat hnu chuan, "Silai kan rawn hmeh puah tawh chuan, puppet ho hnung chu rawn dawl zawm lovin in theih ang angin per san vat vat zel ula a ṭha ang" tiin fimkhur thulhah inkah palh a hlauh thu a sawi zawi ve ta sap a.
.
An inthlah fel tihah chuan Chacha chuan "kan khan chan hi rawn zawh zawm lovin bibo ta vek se engtia chet lak nge ṭha ta ang le"!? tiin Rafela chu chu zawhna chhang tur chuan a phut deuh bik tih hriat zetin a han melh deuh ran a.
boruak vawt hik chuai mai hipa vanvadãk vang vang chunga, an chung lam ngawpui kar la en chho ran chunga thawk la khu hlat hlat chung chuan a lukhum lum chu a khum ṭhat malh malh hnu ah, "kalayam tlang dung tluan chhuah lam hi Kham sang zet zet inchhuang thla thluah vek niin a lang a, khi Kham pangah khian hnim leh Thing reng reng a ṭo mang lo ang.
khing kham sang zet zeta tlak liam ai chuan, khan chhuah lam tlang dung pang awih thla ngawpui hnuai khi an bel ngei anga, awlsamte-in kan chhuk veh thla tawh mai ang chu" tih leh a hma lam hnim tawn bawrh bawrh chunga luh bo chu Rafela chuan a rual zui ta a.
.
Rafela leh Zela leh Hruaisanga te an liam hnu chuan, Bibi te pali pawhin an position tur zawngin khan tawp lo inṭanna laia Lung khawkrawk zet zet inchhuang kawkalh ki ber bur hmun chu an en kual uluk hle hlawm a.
a inhnaih berah hlam sawm aia hnaia awm lo tura Bibi chuan a hrilh ṭheuh avangin mipa inringtawk ṭhe ṭhaw an ni bawka Chacha, Puia leh Kimtea te pawh an che buai rei lo kher mai!
ngawpui thim duk dur mup mai hnuai khan khawkrawk zet karah chuan, Lusei tlangval rual leh Myanmar puppet pawl thum infin te chu thihna-in thla a zar hnan ṭan ta tih hria niawm takin, Kalayam ngawpui bawmtu Nungcha hram zawng zawng te chu thawklehkhatah thehmeh reh takin an reh ta duak mai a.
.
Thim hmulin myanmar puppet ho an lo channa ngawpui hnuai a bawh thim zual mup tawh tiha, Rafela te lamin Far upa zet zet kar hnuai hmun hrang hranga lungpui kara ṭanhmun an siam rem fel awr chauh tihah chuan, an beisei loh zetin zan rei nghak hauh lovin puppet ho chuan Kalayam tlang dung hnuai khanpui ber aṭanga km30 vela hla a, kawngpuia boundary hulum lai hel nana hman an tum Motor ruat lawksa man thuai tuma kea an rawn kal thawm chu an hre ta mai a!
Rafela chuan an mi chan te an hnai tih hriat nana code an hman ṭhin, 55pp' tih chu a piah hlam sarih vela hnaia Zela tawm lai hmuh tur ngei chuan boruakah a kutzungchal chuan a thai kual zauhva, Zela pawhin a lo receive tih entir nan a kutzungpui chu a lo ti kawh nghal vã a.
.
Reiloteah puppet ho chuan kawng zim lai an rawn luta lungpui insir khup kar thim lai an luh veleh chuan, Rafela Cz75B chu a de zawka puppet ho kal lai mi sawmhnih dawn zinga a hnuhnung ber chu a tukkhum dawm chungin a tlu ṭhuai mai a!
midang rawn lehhawi mek chu Zela Silai mu chuan a brass phei leh ṭhawta, Hruaisanga pawhin a Rifle ken chu a hmet puak rang dat dat hle mai le!
Puppet ho chuan an zinga pathum lai tlu tawh chu ngaihsak lo lek chuan an darh huka, a ṭhen hma lamah an tlana position lak tumin lungpui phen thim lai lai bel chuan an au ṭhat ṭhat hlawm a.
ralkhel dar a ri tak tak ta, Lusei val te nge khawchhak sakawlh rual ho chu chan ṭha zawk dawn a hriat ta loh!
.
Puppet ho tawm khawmna aṭang chuan Silai puak rang zet zet a rawn ri tuarh tuarha, Zela leh Rafela te tawmna lungpui chung lam chu a rawn khem ta ṭhawt ṭhawt mai a.
mahse, chuti chung pawh chuan Rafela leh Zela te chuan an ṭanhmun chu sawn duh lek lo chuan, an kun hniam te te a lei hrulhah puppet ho tawmna hawi chuan an han hmet de leh ta zawk zawk a.
ṭe ṭhawt ṭhawt thawm a rawn chhuak thuta, khawchhak ṭawng dik taka au ri leh Silai riin Kalayam ngawpui hnuai thim ruih mai chu a luah leh thuta tlan ri khip khup riin chu thawm chu a zui nghal zat a.
Rafela chuan an tlanchhe thawm chu ngaithla ran chung chuan, an thawm a reh veleh chuan Zela tawmna lam hawi chuan Code113 a han thai kual leh zauhva, Zela chuan Rafela code thawn chu bawh a bawh zui thuaia, rang taka Rafela chu a fin phei hnu ah Hruaisanga chu sir lama lungpui phen chung zela kal tura an hrilh hnu chuan, anni pawh chu inṭhenin a lai takah Rafela a lut pheia ding lamah Zela chu a lut thla ve thuai a.
mahse, an tum angin puppet ho chu an va pawh mai theih tak loh avang chuan, hlam sawmli vel an mahni hma zawn ṭheuhva an kal hnu chuan inhnaih deuh zawkin an kal ta a.
.
Chutia an kal khawm deuh hlek hnu, pen sawmhnih vela thui an kal leh chiah tihah chuan, an hma lam hla deuh fe aṭang chuan rang zet zetin Silai a rawn puak ṭhawt ṭhawta Bibi leh a ṭhiante an che ve chiah tih hai rual lohvin khawchhak ṭawnga au nâtuar au thawmin Silai puak ṭhawt ṭhawt thawm chu a rawn zui zat bawk a.
.
Chuveleh Rafela te pathum chuan, an ralrel lawk kha hre rengin an hual phei zelna khan chu rang zetin sir lam lungpui khawkrawk zet zet karah chuan an per luh san thuaia, an rawn tlan let tur chang chuan position pawh an la fel nghal thuai a.
mahse, an beisei ang zanin an chet dan chu an bawh zui tluan thei ta bik tlat lo!
thawm ngaithla a an han pil leh hlek lai chuan, Hruaisanga tawmna aṭang chuan tisa ri no chawrh chawrh thawm a rawn chhuak thuta, Hruaisanga rum kawk ri leh mipakhat ṭê ṭhawt riin chu thawm chu a rawn zui ta tlat mai a!
.
Rafela chuan chu thawm chu thinrim sa pup pup chung chuan a ngaithla chiang te te a, a Pistol lek vâ chung chuan Hruaisanga tawmna lam a thlang vei lam hlam sawm hnih dawna hla a lungpui leh thingtuluang bawk ṭhiang thim mup lam chu a pan thla chher chher mai a.
mahse, thui a kal hma chuan, a luh lehna tur chiah lungpui ko thim zet hnuai aṭang chuan, a dum hlanga inthuam China sword sei zet keng rawn lawr thut chuan a dar dinglam chu a rawn vai thawi fua a, Rafela tan pawh chu mihring che rang em em laka a him hman hlauh chu vanneihna sang tak a ni tlat mai le!
a Pistol erawh chupa-in a rawn vai ruala a tluk thlawrh rual chuan, a tum loh zetin a thlauh avangin a tan chuan a khel sir veilama a pai a Dagger sei zen zawn chiah chu inven nana a hman theih awmchhun chu a ni ta!
.
Chupa veha a han insiam rem vat lai chuan, an hma lam Silai rikna hmun ngai bawk aṭang khan Silai a rawn puak leh ṭhawt ṭhawta, patling ṭê thawm leh khat deuh hleka Silai puak zui riin a rawn zui leh a, chu Silai rikna lai an chian avang chuan Bibi leh midang chu an hima an position a la dik hle tih a lang chiang viau a.
mahse, Rafela te ṭhian thum erawh chu puppet ho mi rawih fighter paliin an rawn luh chilh tak avangin thih leh dam inkar a zim ta hle tih hriat zetin, Zela pawh mi pahnihin a tawmna lungpui kar thim hnuaiah an pet tlu hnawk hnawk mai a!
Hruaisanga lah a tumpuipa chuan kut a thlak ngun zawk tial tiala, rei lovah Thingtuluangah nem betin a Dagger ken chuan vih tumin a nawr bet ta tlat mai a!
mahse, thih thâ a ṭang a nih bakah hlauhna nei eih lo Hruaisanga chuan chupa Dagger tle var mai chu a lak leu sak zel avang chuan, chupa chuan a duh ang takin a finish thei bik hauh lo!
a chhak lawka patling ṭê ṭhawt a hriat ruala Rafela rum ngal ngal thawm a hriat thut veleh chuan, chupa Dagger humna kut dinglam banrek chu a elh thuta, nâ zeta lak kual nghal vat pah chuan ama Dagger ken ngei chu chupa Nâk thawlah chuan Hruaisanga chuan a chum lut ta ngheng mai a.
.
Rafela chuan, a bitum pa hmai a vai thler sak peh duai mai chu thim hmul phe ruai karah chuan chiang zeta en ran chung chuan, a ban veilam vunpui chat hmawk khawpa thler hawk aṭanga thisen rawn baw par par chu a han thlek zauhva.
chutia a rilru peng zauh chu a bitum pa chuan a rawn bawh zui thuta, zei zet leh rang zetin a rawn zuan fua-a a Sword vai thawm pawh a fiak ziau ṭha kher mai!
Rafela lo per sawn zauh nak dinglam zawnah chuan a vai tlang puata, chutia a Sword vai tlang kun lai insiam rem leh tur chu Rafela chuan a hnungzangah chuan nâ zetin a nghawk thaw hawka, chutih rual deuhthaw chuan a kê chu invawr ṭhawh khawpin a han pet sak nghal nghek mai bawk a.
.
A bawkkhup zawnga a tluk veleh chuan Rafela chuan chu pa Sword kenna a ban dinglam banrek chu rah beh sak chung chuan, a Dagger chuan vih tumin a han vai thla fua-a a tum a fuh hma chuan chu pa chu mak zetin a rawn inlet hman tlat mai a.
a taksa a vih ai chuan ti niawm taka a kutphah-a Dagger zum lam a rawn dan rual chuan, Rafela chuan tim eihna nei hauh lovin chupa kutphah chu a vit tlang thla zawka, a ban lehlam a rahbehna a tal chhuah veleha chupa-in a Dagger kenna lam rawn man beh leh tuma nâtuar rum kawk kawk chunga a rawn ban leh lai chuan, a chu pa kuta a Dagger tlang thla rung chu Rafela chuan a phih phawi zawka a hâm hawng hawk khawpa thuk chuan chupa awmah chuan a Dagger chu rang em emin a han vit lut ta hrâwih a.
.
A duhtawka thukah a vit fuh chat chat bawka, chupa ka aṭanga thisen lar zet rawn phuan chhuak bawrh bawrh leh a 'aw' chhuah tum ṭang khur ngat ngat lai chu a Dagger kar herh sawk sawk pah chuan, vawithum lai a nawr thuk luih leh salh salh hnuah Rafela chuan a Dagger chu a phawi zawka a thlang lam Hruaisanga awmna lam chu thinrim meng sen ram chung chuan a pan thla nghal vat a.
.
A mi thah chil chhak ṭhat ṭhat chunga Hruaisanga kal sawn tum mek lai chu Rafela chuan "Zela khawnge"!? tia zawh sap pah chuan, an thlang lam lung lian tak tak insir khep khup lam chu thim zingah chuan a hawi thla ruai a.
"hmanhmawh a hun viau, a thawm a rehna a rei riau mai" tia Hruaisanga'n a lo chhan lai chuan, a Pistol thlauh pawh chu ngaihsak ta lo chuan Rafela chuan an thlang lam chu chak zetin a pan thla nghal vat a.
.
Rei an zawn hma chuan, mi pahnihin Zela tlu reng lai lung lian zet zet chawi chunga den hlum tuma an lo din chilh lai chu an zuk hmu thuta, bihruk kuala veh ṭhat lehna hun a awm tawh lo tih chu Rafela leh Hruaisanga te chuan an hre rang kher mai!
Rafela Dagger chu a thlawk chhuak zawka chutih rual chuan Hruaisanga pawhin Zela tlukna chu a thleng phei chawpchilha, pakhat zawk nen an inkeuh nghal ṭhuai ṭhuai lai chuan pakhat zawk awma a Dagger bur vu dim lo zeta phawi pah chuan, a vir thuta Hruaisanga keuh bet mektu pa chu Rafela chuan a Dagger vai fua pah chuan a han ṭum chilh zui ngheng mai a.
.
A kawng chung chiaha Rafela Dagger lut thawih chu chupa tan chuan thihpui loh chi ziazang a ni lo!
Hruaisanga rawn tho chhuak chuan "a thâ a fei kher mai! rawn che zui lo la chuan min rek hlum hman hialin ka ring a ni" tia a nghawng tuai vat vat chung chuan Zela la tlu zawi reng chu a pan phei thuai a.
.
Zan a thim chhah viau tawh hnua fimkhur zeta thawm ngaithla chung zela Zela hliampui tuar an tawm bopui lai chuan, an thlang lam hret aṭang chuan thum zeta a sawi hriat mang si lohva rawn phun bul bul thawm an han hria a. Rafela chuan mumal awm miah lova phun sup sup chungin a lo chhawn ve vata rei lovah Bibi chuan a rawn fin chho thuai a, a hnungah chuan Chacha leh Kimtea leh Nuna pawh an rawn lang nghal zat a.
.
"Zela chu a ngaihtuahawm lutuk lo ang chu maw?
paruk chu chiang zetin kan thata, a dang zawng chu um zui hman loh khawpin an tlan bo hman tlat mai.
an Bag erawh chu kan lak sak deuh vekin ka hria a, Silai pawh min rawn ken sak ṭha viauin ka hria" Bibi chuan a han ti sap a.
Rafela chuan Zela chuan thisen a hlauh hnem deuh thu leh an chet dan a phuai lek lek thu te a sawi hnu chuan, an vai chuan moon gate luhna khan hnai zawh chuan thawm dim zetin an pil bo ta diak a.

CRYSYAL HILL, BUNG 3

CRYSTAL HILL, BUNG 3
💱RECAP
zawl dinglam sir deuhva an inher luh hnu chuan, an beisei aia hmain an tlan luhna kawng lam aṭanga Motor rawn lut êng zeuh zeuh chu an hmu thuai a, chutah meuh chuan an tiril pawh a khur ṭang ta at at hlawm hle mai!
Car seat hnunga bawk khup tlat chung chuan Rafela chuan, "game chikhatah ngai rawh u" tia a ṭhiante pahnih chu a fuih zauh hnu ah a Pu-in a Officer nih laia inven nan tia a kawl Cz75B semi automatic 9mm Pistol kah nâ zet a ruk chhuah chu, a hnung lam Kawnghren kar aṭang chuan a phawi ta zâl zâl a.
.
           Llpa rokhum//Car rawn thleng thar pahnih te'n an lo dinna zawl an rawn luh chuan, Zela leh Bibi-a te chu an zauthaunain hlauhna a siam sak ru tlat a ni tih hriat zetin an khur ru hlak hlak renga.
Rafela erawh chu an hma bak chuan zamna leh rilru chiaina a thlen ve em em hran lo.
"nghak hret ang" tia Rafela a phun sap lai chuan, Car pahnih Kawngkhar chu a rawn inhawng riai riai a, a chhung aṭang chuan mi paruk an rawn chhuaka thim zingah chuan an hmel chu a lan loh avangin Rafela te pathum chuan eng ang hmel pu nge an nih an hre hauh lo.
.
             "hun rei tak kan nei lo a nia" tia an zinga pakhatin Mizo ṭawng âwn deuh chhâ, khawchhak Kawl 'aw' phawi tih hai rual lohva anni ho a rawn hrilh sup lai chuan, Bibi-a leh Zela te chu Car kawngka hawngin an pen chhuak ve ta a.
.
              Chung mite bul an va thlen chuan, hnai taka an din chilh chung pawh chuan an chung lamah Thla êngin rawn chhun ruih mah se, Thingtuai hmun zar hnuaia awm an ni bawk nen, fiah mang lovin an hmai tlang an hmu ruai tih leh tumah chu an mi hriat an awm lo tih chu Bibi-a leh Zela te chuan an hre chiang viau mai!

               "hei hi chu, agent hnih hnena dah tham zan a ni. thla khat chhunga in thêh ral lo a nih chuan, co-opporate pui reng chi ah kan ruat lovang che u" an zinga pakhat Mizo rawn tel vein thum zawi chhura a rawn tih leh lai chuan, Zela chuan an Car lam chu Rafela ngaichangin a han melh phei zauhva.
.
                 Inches 6 bial vela lian, inches 4 vela chhah uluk zeta sarang duma tuam rit nelh nawlh chu chupa vek chuan a kawnghren kar aṭang chuan a han phawrha, Bibi-a kuta la pe ta mai lo chuan, "cash chu"? a ti zui sup a.
Bibi-a'n pawisa phawrh tum niawm taka a Jacket chhung lam zena a kun ngar ngar lai chuan, an piah veilam thim zing aṭang chuan Pistol a rawn puak dê zawka, chu bawm pack keng tupa chu a ṭhingṭhi hnawka a bawm pack thlauh chu Zela chuan rang taka chharin Car phenah chuan a tawlh luhpui nghal vat a!
.
             Midang chuan thim zingah chuan an rohlu bikbopui tu chu an um zui a, Bibi-a pawhin a tihtur hre takin a kereka a Dagger thiah chu a phawi sauh sauhva Zela um tute chu a bawh chilh phei rang hle a.
chutihlai chuan, Rafela chu Zela hmaah chuan rawn inrawlh hman khawpin a che rang tlat mai!
rang em ema vawithum lai a cz75b hum lai a han kah dêt leh zawk zawk takah chuan, mipanga rawn tlan lut mekte zinga pahnih chu an ṭhu leh hnawk hnawka, a dang pathum te chuan an Silai pai chu Rafela leh Zela te tawmna Car phen lam hawi chuan an rawn hmet puak ve ṭan ta a.
chutah chiah chuan, Rafela chuan an hnung lam aṭanga rawn veh phei tu Bibi-a chu tawlh leta thim lam bel turin a han au vata, Zela chu Car hnuaia tawlh luta an mahni Car thlenga bawkvak tura a hrilh leh sap hnu ah, "Bibi saw ka va fin theih hunah kan rawn let vat ang. Car kha start a tlan nghal mai thei turin lo inring la" a ti leh sap a an thlang hnim zing awih lamah chuan bawkvakin a tawlh thla ta a.
.
              An intawhna Thingtuai hmun bial hêla a sir tlak lam aṭanga a tawlh luh leh hnu rei vak lovah chuan, a tawlh chhoh lehna hmabaka Bibi-a lo bawk phek reng chu Rafela chuan a han hmu ruai a.
a lu ûm aṭang chuan tunge a nih chu an chung lam hnim buk kar aṭanga Thla êng zung thlà rawn rawn lut kar aṭang chuan Rafela chuan a hre khawp mai.
               "Car lamah Zela a tawlh phei tih an hre lo hlauh mai" tih leh an thlang lam hawia a bul lawka Lungtum tlawh lum thlak chu a han rual a.
thim zinga an mahni hmuh theih chiah si lohva Lung lum ri hria a an rawn rik thlak san san lai chuan, Bibi-a chu Rafela chuan an piah veilam hawiin a pawt phei nawk nawka, meter 30 dawn an tawlh hlat hnu chuan an Car dahna lam pan chuan chak zetin kun chungin an tawlh phei leh ta a.
.
               Car chhunga an han luh meuh chuan, Zela chuan a lo hmanhmawh tawh tih hriat zetin an ṭhut ṭhat hma hma chuan Car chu a start vata, chak em emin an luh thlakna kawngah chuan a leu chho nghal puat puat a.
kawngpui an chhuak thuaia, chuta chin phei chu speed meter pawh a sang chho chak leh zual hle mai!
Bibi-a ṭhu khawr hlan lai chu Rafela chuan "i va ngawi ve a" tih leh a dara sawi chu a han rual a.
.
           Chutia a sawi lai chuan a jacket ban chu a han ṭham tela a hma aia nasa a nui sak sak chunga sawi leh tuma a han thin leh dawn lai chuan, Bibi-a jacket ban lo huh hnuang a khawih fuh avang chuan "i zam deuh em ni i va thlan nasa ve" tih leh a kut huh chu Car seat cover a hruk tuma kun chu a han rual a.
mahse, chutia a kun tur kut han lek che Car tukverh aṭanga Thla êngin a rawn chhun zauh lai chuan, a kuta thisen hlir lo kai zûih mai chu a mit fiah zet chuan a hmu thuaia, rang zetin Bibi-a chu a sawi nawk nawka a ko nghal mawlh mawlh bawk a.
.
            Bibi-a chuan, Rafela chu meng zuai raih chung chuan a rawn thlëk thuaia "ka ṭha, Zela tlanchhia an ûm laia i rawn kah let lai khan, an zinga pakhat rilru la fim deuh khan min rawn lehhawi thuta a rawn rin kah ve ta mai a lawm le! ka ban hi a rawn fuh ta tlat a" a tih zawih sap hnu chuan, nâ lutuk a nih loh thu leh a ruh a khawih tel ni-a a hriat thu chu a han sawi leh a. a thisen chhuak nasa zet avang chuan, Bibi-a chu a zuai ru riau tih chu Zela leh Rafela te chuan an hai hauh lo! "khawpui chhung lamah tlan lut la, Chaltlangah ka ṭhiannu i pan phawt mai ang u" Rafela chuan a han ti a.
mahse, khawpui chhung lam pana an peng dawn chiah tihah chuan, an hnung lam hnai ang reng zet aṭanga Car head light beam rawn phê zawk chu Zela chuan a Side glass aṭang chuan a hmu thuta, "he lam kan pan a ngai" tih zawih sap pahin a Car khalh lai steering wheel chu a veilamah Wbank road peng panin a herh thut mai a.
.
Wbank road kawng dung tluana Car pathum in um leu zuai zuai thawm chu, zing khawfingchat tur rawn inṭam reh ruih hnuaiah chuan a rapawm danglam kher mai!
kum tlin hma a Car khalh ruk hrat zet Zela speed chu sang teh mah se an hnung lama Car lian zawk pahnih rawn tlan chak zet zet te chuan an rawn su pha titiha, Zela Car karcheh tur chuan a sir tawn tawnah an rawn inrawlh ta tlat mai a.
rei loteah phei chuan, chung Car pahnih chuan a laia Car te zawk tlan lai chu an nawk zeuh zeuhva, driver seat glass chu an down sauh sauha Pistol an rawn hmet puak dê ta zawk zawk mai a.
.
An sir tawn tawn aṭanga an Car kawngkhar Car an rawn kah keh tak chuai chuaiah chuan, a seat hnunga ṭhu Rafela chuan Bibi-a ṭhutna seat chu a kawih awn sak vata, hnung lamah a pawh luh hnuah, "hnuai lamah khuan kun lut teh" tiin a nem bawk nghal rawpa "myanmar puppet (ruih hlova inhnamhnawih chhak lam mi hi anni ṭhian thum hi chuan 'myanmar puppet' tiin an sawi mai ṭhin) nge Lusei pachalin Car khalh thiam i en ang hmiang" tiin Zela chu a fuih leh zauhva, a Pistol pai chu an mahni rawn nawk tuma rawn tlan hnai leh chiah, an dinglama Car tlan lai hawi chuan a hmet puak nghal zat bawk a.
.
Rafela'n a rawn hnai hmasa sa a lo kah ve tak ṭhuai ṭhuaiah chuan, a nazawnga hmet puak nilova tum nei rana hmet puak anih zelna chuan ven khat chuan an hma a su veng a ni tih a lang ṭana, Car pakhat zawk chu a ke hma veilam a kap chhe tawh a ni tih hriat zetin hnung lamah tyre ri hluk hluk chungin a la rawn tlan ve laih laih a.
pakhat zawk erawh chu a leu thuta, Zela side lamah a rawn inrawlh leh sauh sauhva chak em emin a rawn tawlh lut leh fur fura, Zero point thlen dawnah phei chuan a rawn dawk chak leh ta kher mai a!
.
Zela chuan a Car khalh lai chu kawng thlang lam side ah a herh thla zauhva, thuife a tlan hnuah a luhna lam side a an mahni um tu a rawn luh ve lai tak chuan chhak lamah chak zetin a leu chho leh thuai a.
chutia a leu san tak chhenah chuan, a chhung aṭang chuan Silai pawh duh anga an rawn kah theih tawh loh avangin him khat chuan an him tih chu an vai chuan an hre chiang bawka, Rafela pawhin an leu karlakah chuan a Pistol chu hmet puak lovin a ngaichang ta rih a.
mahse, Zero point an pelh pheia lei tawlh kawng zim thui tak leh a hnuai awih bung pial sang em em mai an in ûm luh vaih chuan, anni chuanna Car aia lian, an mahni um tu Car chuan nâ vaklo pawha a rawn sut fuh hlek chuan, hoteah kawng thlang an liam mai thei dawn tih an hre chiang a, hun tlemte chiah an nei ta tih pawh an ngaihtuah thiam tlang hle a.
.
An hun tawn avanga huaisennain a chenchilh tlat tawh Zela mawhphurhna a san zia chu Rafela chuan zawi sapin a han hrilha, chumi hnuah Bibi-a chu bawk hniam leh zual tura a hrilh leh hnu ah Zela lam chu a han hawi leha, "finish rawh le" a ti ta sap a.
.
An hma km 1 lek awm tawhah lei tawlhin kawngpui a tawlh hnan, kawngpui thlang lam bal hnuai bir thla pût an tlan thleng thuai tawh dawn.
Zela chuan a ṭhianpa-in zam lo zeta a fuihna thu chu a hre chiang bawka, a side glass bih zauh pah chuan a hnung lama Car dum lian zet rawn tlan hnai leh mek chu kawng thlang lamah a leu san leh ta puat a.
.
Chutah kawng thlang lam side-a tlan chung chuan, a Car speed chu top speed in chiau vawng vawng khawpa chakin a han san chhova, "Bibi, Rafel a ṭul leh ruam khatah kan thi ang" a tih sap laia lei tawlh lo inṭanna kawng bal zim lai chiah a tlan luh rual chuan, ding lama full pawp khawpa Car steering ṭhuai pah chuan a break chu tlum hmawk khawpa rapin a han ruala chiau tuarh khawpa Car hnung lam a inpaih lai chuan, an hnung lama Car rawn tlan pawh chu a rawn thleng chawpchilh nghal zuai mai a!
.
Chak em ema speed san belh fur fur chunga tlan Car dum lian zet chuan, a Car um kawng thlang veilam side a tlan mek lai, a tyre innawt alh puat khawpa dinglama a turn thut mai chu sut chhoh bur tumin a turn ve vat a, speed ngai aia sanga dawk chhuak turin a han rûm vin nghal tuarh a.
mahse, chutia a turn lai chuan a Car ûm lai la in turn vir nâ zet rawn vir lêt thla leh chuan, a engine invuahna hma lam chu wind glass zawng zawng darh chuai khawpa nâ-in a rawn hêm bura, chumi rual chuan thunun hman rual loha chakin  a hnuai lei tawlh bir leh thui zetah chuan, head light la in on vu chung chuan a tawlh liam thla ta pur pur a.
.
.
"game over" Rafela rawn ṭawng zawi sap chu hnuai lam aṭang chuan "pakhat kha" Bibi-a chuan a rawn ti zawi sap a.
.
"hla fe aṭang khan an tlat let daih tawh" tia Rafela'n a lo chhan leh var lai chuan,
"an tyre chhia kha a buai phah ta deuh a ni maw!? khawpui daiah an invuah ṭha anga khaw en hma-in hla tak thlen hman an tum ngei ang" Zela chuan a rawn ti ve sap bawk a.
.
Rei ding lovin an Bike thuhrukna lamah chuan an liam thuaia, an han thlen hnu chuan Bibi-a Pa Car hmelhem chhe tawh tak mai chu tih dan an ngaihtuah tlan a ngai ta!
an inchan chhuahna laia Rafela'n a mi kah te kha Car pakhat zawk let leh ta khan a va tuam hlawm dawn nge?
a tlan tlang san dawn tih an hre phak tawh silo. chutia an inrawn kual lai chuan, khawchhak lamah lah Ni zung a rawn inkhawh chhuak suar suara, an thlang lam ruama ṭiau chhum tla pawh a pan chak viau mai bawk si!

"kan duh ber kan hmu tawha, a bak buaipui zui vak chi kan niin ka hre lo.
Car hi kawng thlangah nam liam ila, Car accident chuan kei hi ban tliak chungin min sawh chhuak a ni leh mai" Bibia'n a rawn tih sam tak êtah chuan, "i rawtna a lak tlak ber ṭum" tia khi sak chungin Rafela chu a lo nui deuh saka, Bibi-a rawtna ang chuan Car chu kawngah an khalh chho leh te te a, ko sang lo deuh laiah chuan an nam liam ta a.
.
Rafela leh Zela te an tlan liam hnu chuan, Bibi-a chuan a Pa Car an nam tlhakna bula ṭhu ran chung chuan kawnga mi rawn veivak nghak chuan a ban chu a chelh ran mai a.
rei lovah Ni a rawn sanga, dar 6:40am velah chuan Bibi-a chu Khualzin veivak Khawpui lam aṭanga chhim lam khaw hrang hrang pana rawn chhuak te'n an rawn chhar thuaia, khawpui chhung lamah an phur lut vata a chanchin chu a chhungte pawh an hrilh thuaia. chutia plan fel tak neia che ta chu, a chetsual dan zawta Police te'n an kawm deuh pawh chuan, Bibi-a chuan a rui phur tlan kual mai mai chesual palh ta a nih thu a sawi tlat avangin chumi zana an chëtna hnu pawr leh chhui zui theih awm hnu reng reng chu nalh zeta thup a ni ta a.
.
.
Tlai lamah chuan Myanmar puppet Car an bum liam tak chu tu te'n emaw an chhar chhuaka, an intawhna hmasa lama Rafela'n a kah te erawh kha chu an ṭhian tlan let leh te khan an la bo hman a ni tih hriat zetin an chin hriat zui tur a awm ta lova.
Bibi-a pawh chhungkaw harsa tak an ni lo bawka enkawlna ṭha taka enkawl a nih avangin rei lovah a rawn ṭha chhuak ve leh thuai a, an ṭhian thum chuan Tiger brain chu hnianghnar zetin an tlan ta miah miah a.
.
An ṭhian thum zinga a thluak ṭha ber Rafela chuan, a ngaihtuahna fing zawk hmanga ruahmanna hrang hrang a suangtuah te chu tih puitlin chakin a rilru a kawm ngawrh sauh sauva, a tumna erawh a ṭhiante pahnih takngial pawh chu hrilh rih lovin, a nun ril tak luah nghet tlat tu a thuruk te chu a hmela lang lek lo chuan a pai ru khiau renga. mahse, hun a kal hret hreta, a khat tawka Mizoram lama myanmar puppet ho Tiger brain tawlha an rawn lut leh zauh ṭhin lo suama lo lambun zeuh zeuh chu an hrat chho zela, kum 2073 an han kai chhoh meuh phei chuan, chung myanmar puppet rawn lut ru ṭhin te zinga ṭhenkhat ruang chu Aizawl khawpui daifem leh khawpui chhung hmun kilkhawrah thleng chuan miin an chhar ta zauh zauhva. 
.
Heti khawpa ṭhalai tam zawkah an State rorelna ah Duhlian chi dazat tak tak te inrawlh thuk chhoh zelnain nghawng chhe tak a neih chu Sawrkar lah chuan a haider thiam bawka, Lusei thlah kal zel chi hrang hrangte chu, ruihhlo bawihah chuan tang hlum phiar mah se pawi ti miah lo ram hruaina fung chelh michallang an tam hle mai si!
chu hun inmung pawr chho zel avang chuan, State boundary a Security khauh zawk an dah ṭhin pawh chu Sawrkar thar rawn Lal, Chandra-lal Zothangliana leh a Party 'Lusei people wing' LPW  party te chuan an rawn thlâh dul thuta, a hminga State boundary a Security an dah ve te pawh chu ruihhlo tawlh rukna kawngah chuan a inhnamhnawih thuk thuk an ni ta hial a.
.
Chutah zet chuan, Rafela ṭhian thum chu sawi loh Lusei ṭhalaite chu ruihhlo bawihah nghet zawkin an tang nasa telh telha, Pa tam zawkte chuan kum sawm ral an kai leh hunah meuh phei chuan, Lusei hote ram chu nghet takin Hnam dang kutah a tlu pumhlum ngei tawh dawn tih chu an hre chiang em em tawh a.
chuti khawpa hnam ral titih tawh nichunga, Lusei chi diktak nihna avanga thinlung hliam an ram lainatna rilru pu te'n ṭan ho rawta an zinga parawn kai leh Lehkhathiam deuh te an han biak ruk pawh chuan, ralthuam aia hlauhawm zawk, Chi' leh thisen hmanga kum za piah lam liam tawha an Hmeichhe ṭhenkhat te'n hnam rilru pu lo leka, an nawmna ngawt ngaihtuah leh an hmangngaihna ngawt chhuanlama Lusei chi an lo tih bawrhban tawhna-in a nghawng chu a pawi thui lutuk tawh avangin siam ṭhat a harsat tawh zia an lo sawi khum fo mai si!
chu a chhapah, chung an mi rawnte ngei pawh chu an chhungkaw inzawmna peng kil khat talah hnam dang chi leh thisen kai tel an nih deuh fur zel avangin an Sakhua Kristianna thlenga tlu hlen lek lek tawh te, an Hnam ze mawi tak leh thisen boral ṭep tawhte chu siam ṭha a, duat taka enkawltu tur mithiam leh Sawrkara 'aw' chhuah ngam tur an vang hle tih a lang chiang ting mai a!
LPW Party hotupa Chandra ngei pawh chu Mizo leh Hindu thisen inpawlh aṭanga rawn zi chhuak a nihna chuan, State mi nihna a pek tel miau avangin Lusei State roreltu lu bera rawn ṭhu tur chu a hma aia Lusei ho rap bet hreh lo tu tur a ni ta tlat a ni.
.
Zing tin maia Aizawl khawpui chhung chu sawi loh, Zoram khaw tina hnam dangte Pathian biakna thawm leh an rorelna chu ṭhalai dangte ang bawkin Rafela te ṭhian thum pawh chuan a tur emaw tiin an ruih san leh miah miah tawh a.
a khat tawka Mizovin hnam dang te avanga an mahni tual ngeia vuak leh sawisak te, harsatna hrang hrang an tawhte pawh chu a tur rengah an ngaih tlat tawh avangin an tan chanchin danglam tehchiam a ni tlat tawh lo!
an duhtawka Tiger brain kick tur an neih reng theih nana, ralrelna fing zet zet hmanga myanmar puppet ho an lo suam zeuh zeuh theih chuan an lawm tawk em em ringawt mai a ni.
.
.
A Pi leh Pu te pawh ngaihsak tawh lo zeta khawsa Rafela chuan, a ni telin a Pu-in a sawi ang chiaha Thingtlang lama an insawn hun a hnaih tawh zia chu a vei ber awmchhun a ni a.
Thla thum chiah khawpuia khawsakna hun nei tawh an nih avang chuan, a Pi leh Pu te lah Thingtlang lama an In sak mek chei reng reng chuan an hmanhlela, ani chu hruai tum ve fo mah se sawm kal chu sawi loh ngawi rengin a chhuak bo nghal nal nal zel mai si.
Chaw an han ei rual ve changa, theihtawpa mittui tla zawih zawih chunga an zilh ve pawhin Lungbul biak ang chauhin Rafela chu a awm ngaiin a awm hmak zel mai a.
chuti khawpa luhlul a ni chung pawh chuan, "mamte, engtikah e maw chuan, i tanna ruihhlo bawih hi i la chhuahsan ve ngei ang tih hi ka beisei fan reng ang" tiin Pi Parteii chuan a tupa chu beiseina nen beidawng lova ṭawngṭaina nena a thlir tlat thu a hrilh fo thung a.
chutiang bawkin Pu Zuala pawhin beiseina mit ngai lo an neih reng thu chu a tupa bulah chuan a chham awl ngai lova. mahse, an beisei erawh a thleng mai dawn lo tih hriat zetin Rafela chuan, ruahmanna mak tak tak neiin an lungngaihna tur leilawt lamah a hnuk thuk tulh tulh a ni tih an hre hauh si lo!
"thingtlang lama kan insawn hunah chuan, kei chu Bibi te Inah enge maw chen chu ka awm rih ang ka Pu" tia zanriah an kil ho laia Rafela'n an a sawi te chu "a ṭhat phahna ai a ni maithei a sin, Bibi-a Pa Pu Sangmawia saw keini ai pawha a zah a nih avangin ani zilhna chu a zawm zawk ngei anga, rei loteah nun pangngai takin a rawn haw ve mai thei a sin" tiin a Pi phei chu a lawm ru viau mai a.
.
A Khum bawha a leh tap tap lai chuan, a Pi leh Pu te beiseina nena inpersan em em a ruhman rukna bawk chu Rafela chuan a ngaihtuah ngun leh nasa tawh hle a.
chutihlai chuan, a message rawn lut zeuh zeuh reng chu en tumin a Phone chu a han bana, "naktuk chu faith hotel ah ka lo nghak ngei ngei dawn che nia.." tih thu an veng tleirawl chhelo zet, a kawm ruk ve ṭhin Joani message lo intlar thla tuarh chu a seen zung zunga "kan ngaihtuah ṭha dawn nia" tih thu-a a reply hnu ah a ngaihtuahna ngai bawk chu Rafela chuan a kawm zui leh ta reuh reuh a.
.
Myanmar puppet te lo rêk zeuh zeuh tute chu tute nge an nih tih hre silova, an bum kual hrep hnu pawha ṭhenkhat phei chu an thi leh nawlh ṭhin chu ruihhlo tawlh ru pawl lian tak tak pathum te chuan, an ngaimawh em em tawh a ni tih chu Rafela hian a hre chiang tawh kher mai a.
chuvang chuan, heti hrim hrim chuan an ṭhian thum hi an la rawn chhui fuh anga, an pathum hian an tual thi mai thei dawn tih pawh a ngaihtuah kai fova.
myanmar puppet zing ami hi pathum lai chiang zet zeta a thâh tawh avang leh, Bibi leh Zela te pawhin pakhat ve ve chu an dahbo ve tawh avangin an tan sa him taka chet zui zel ti har turin myanmar puppet ho hian enthla tu an dah thluah tawh mai tihte nen lam a hriat rukna a rei tawh viau a. chutak mai chu lo checkmate let nghauh ngauh thei tura ruahmanna ṭha zawnga a ngaihtuahna a hmang nasa hle hi thil dang ngaihtuah san hman a ni hauh lo reng a. 
.
Chu a thil vei ruk a ngaihtuah leh vang vang lai chuan hemi zan hian checkmate dan tur ngei chu a hre chhuak ta hlawl mai! thla 3 hnu ah chuan Thingtlang lamah a Pi leh Pu te an insuan chhuak tawh anga, a ruahmanna ang chiahin ani chu Bibi-a te Inah a inpu lut ang.
chuta ṭang chuan, State boundary map zawng zawng a fawm khawm anga, chiang taka a zir fiah vek hnu ah a duhna hmun tak ram pilrilah map hmang chuan a ṭhiante pahnih nen chuan an lut anga, chutah chuan ramhnuai rorelna a ṭan anga, an pawl zawm duh an awm chuan fiahna leh rinawmna palzam theih hauh loh dan ama siam ngei hmangin lak luh an ni anga, a dan siam laka rinawm lo chu tu pawh nise thâh zel tur an ni anga, an pawl aṭanga a ruka tlanbo an awm pawhin mual daih chhung an um anga an that ngei ngei tur a ni. myanmar puppet ho lambun leh an ruihhlo tawlh lo chhuhsak chu an hna ber a nih dawn avangin mihring thluak ṭha leh thâ ngah, pianah pawh patawk tak an nih loh chuan a pawl siam chu zawm theih a ni lovang.
.
Hun reife aṭanga alo ngaihtuah ruk reng tawh leh a ruahman ruk final na tur, hmun khata fing zeta a ngaihtuah khawm fel ta nalh chu Rafela tan chuan a hlimawm viau ang le!
a hmui pet sawi nang nang chung chuan a han nui saka, a tuk lama State boundary map hrang hrang lak khawm dan tur chu a han ngaihtuah leh a, google aṭang chuan a hmuh theih chin chin chu a han search ngal zung zung a.
Mahse, goole ngawt chu a taka a duhna hmun thleng tura hruai tu a tan chuan a hman tlak dawn hauh lo tih a hre chiang a, Network wm lohna hmun a luhpui hun a tam dawn tih a hriat reng avangin Paper map leh Compass hmanga a duhna hmun chu a chhui zawn zel a ngai dawn tlat.
Rafela thluak fing lutuk zawng rei tak a buai ngai tlat lo!
a Phone chu rang zetin a han la a, Joani message tur chu a type leh zung zunga "naktuk chu khawiah mah kal bo lovin, i room ah inkawm mai mai zawk ang hmiang" tih chu a tawp nan tum nei ranin a send leha, Joani'n a lo delever veleh chuan, a zangthal zawngin a Khumah chuan a let phei thaka a maimitchhing zui ta vang vang a.

CRYSTAL HILL, BUNG 2

CRYSTAL HILL BUNG 2 NA

Llpa rokhum// "i tlai chhe lutuk bik lo ve"
 Bibi-a lo nûr nang chu Rafela chuan nghawk zauh pah chuan a han rum khum nghat a.

"nimin chu ka Pu nen thing tlang lamah In hmun zawngin kan kal a"

"e nge Putu a zin ngai ta chu ni tiin, i Pu meuh i zui hnak hnak tur chu kan lo nuihpui viau a"

Chu thu sawi chunga Bibi-a nui deuh vawr chu Rafela chuan rum deuh taka melh zauh chung chuan, "jokes lem lo viau, khawi maw i Pen ka lo hmang lawk ang chu" tih leh Bibi-a T-shirt nghawnga Ball pen inthiat phawi sak chu a han rual a.
.
An ṭhian thuma an awm khawmna piah deuh hleka Car dah ṭawl phena a luh hnu chuan, Pen chhin chu zawi te-in Rafela chuan a han herh hawnga a chhunga Tiger brain (no4 fîr) lo inthun khat ṭan chu muangchanga a duhtawk a bun chhuah hnu ah, Alluminium foil-in uluk zetin a thleh hnan ta mial mial a.
.
Rafela a let leh hnu chuan, Bibi-a leh Chhuanzela te chuan lo la nui dun var var chung chuan, Tiger brain chu renchem taka hit a ṭul tawh thu te, a rawn luhna kawngpui an check uluk telh telh avanga an la buai vat an rin thu te chu an lo sawi dun sap sap a.
a ṭhiante an buai ru viau tawh tih chu hre mah se, ngaihtuahna fing tak nei leh buluk, a hmel leh pian a dik ang bawka tum tawh chu kal tlangpui rap rap ṭhin Rafela chu a la nui sak duh chauh mai!

"zanin chu khawimah peng lovin aw"
a han ti sap a.
Bibi-a leh Zela te chuan, Rafela rawtna avang chuan Mission veng tleirawl chhelo zet zet te nena Party throw tuma an lo intiam tawhna chu ṭhulh ngei a ngai dawn tih chu an hre chiang viau a.
mahse, an hnial theih hloh chuan tiin "nang berin i ṭhulh lehsi chuan, Bibi nen hian kan va kal ang maw!?
nang ber hi kawm nela lampui an chak ber i ni si a, zak chung chungin rawn sawm ngei ngei rawh u tiin min chah ve a, Fiara tui ah chuan Thla êng kan va lawm zawk ang maw"!? tia Rafela thlêk deuh hâ pah chuan, Zela chuan an ṭhian thuma Thla bial zan apianga an thil duh ber pai ṭan chunga zan khua deuhthawa nuam an tawlna ṭhin, Aizawl dai chhim km 15 vela hla kawngpui chung lam tlang thengthaw fe thing hmun dai duk hnuaia, Lungpui insir khup kara Tui fim vawt raih mai lo luang chhuak awmna hmun 'Fiara tui' tia an ṭhian thuma a hming ruk atan an phuah hmuna Rafela'n kal a rawt tlat na chu hnial thlak a tum ve hle a.
.
Rafela chuan Zela chu hnai set sawta rawn din chilh pah chuan, "thil dang aia ngaih pawimawh ka nei ṭhianpa" a tih zawih sât hnu chuan, Bibi-a chu a melh leh zauhva muangchangin an thlang lam kawngpui pawh tum chuan, step chu ngawi rengin a zawh thla ta chhat chhat a.
.
Chumi zan zing lama Rafela haw chu a Pi leh Pute chuan sitting room ah an lo la nghak tlat mai!
zan dangah chuan nise, an room ve ve aṭangin an rawn chhuak anga a room ah an rawn luh chilh leh ngei anga, hemi zan erawh hi chuan an sitting room ah an lo la ṭhut dun reng avangin Rafela pawh a hrilhhai letling deuh tih a hriat hle a.
.
Pu Lianzuala chuan a tupa Remruatfela (Rafela) chu fiah zeta a lo melh ran lai chuan, a Nupui Pi Zolianpari pawh chuan thaw deuh dêp dêpin a lo ên ve khiau bawk a.
engmah sawi lova a room pana stepa chhoh tlang mai a tum lai chuan, "mamte, lo ṭhu ve rih teh khai. hei dar thum a pel a ni titih tawha, a khat tawka hetia i tlaivar deuh lek lek fo mai hi i pi nen hian ṭha kan va ti chiah lo em aw" a Pu chuan a han ti dam dap a.
a Pu chhan tuma a rawn ân ziau lai chuan, "ni e mamte, heti chen chen i vak mai hi tawh sual i tawh hlauhna thlengin min man phah fo a nia..! kan neih chhun, kan innghahna i nih hi hre reng la chuan i Pu nen hian kan hahdam ni mai tur" tiin a Pi chuan mittui tlâ ṭeuh chung chuan a lo zilh ve a. 
.
Rafela chuan a Pi leh Pu te chu ning ru leh viau tawh mah se, he mi zan hi chuan a room lam a pan san ngam mai bik tlat lo!
"ṭhian te nen Cave moon ah dinner kan eia, Thla êng kan lawm rei ta deuh a ni" tiin a chhang ve ta nge nge a.
mahse, a chhanna chuan a Pu chu a la ti lawm hran lo tih hriat zetin, "khawi lo i kala i thang rei deuh dawn reng rengin In lam phone hmasak tur a ni ngai..i Pi hi a phi ruai zan khua ṭhin tih i hriat kha mamte" a Pu chuan a rawn ti zâwi leh sap a.
.
Rafela chuan a Pu leh Pi te chu nui lui san san chunga va pan pah chuan, "pi, tlangval ka nih ve hi, mahni inveng thei tur chuan ka huai ve a nia" tih leh a Pi kuah chu a han rual a.
an boruak rawn ṭha ta chu Pu Zuala leh Pi Parteii te nupa tan chuan a hlimawm hle ang le! "zan dangah chuan, ka rawn hrilh zel tawh ang che ka tihpalh a ni pi" Rafela'n a tih zui leh sap lai phei chuan, Pu Zuala pawh a khi suk suka a Nupui biang rawn sen ser ser chu a hmuh lohna a rei tawh bawka a hlimpui kher mai. "umm, tun ang hun hi kum tam kan tawng tawh si lova, khawfingchah dawn dawnah kan nui ker ker a nih tak ber hi..ti teh mamtea lu chunga kut nghat hian i ṭawngṭai teh ang" tiin a nupui chu nui sang chungin a han melh zauhva.
a Pu rawtna chu Rafela chuan a tei hlei thei leh tlat lo! hnial hreh si, tha tho hran lo zet chuan a Pi leh Pu te hmaah chuan hmui pet ru nâng nâng chungin a ṭhingṭhi ta nge nge a.
.
Pu Lianzuala leh Pi Zolianpari te hian Fanu pakhat Zochampuii an neih hnu ah fa dang nei thei lovin pi Parteii chhul hi a îp zui tlat mai a! mahse, Pathian ṭih mi tih takah fa dang an neih loh hi an nupa hian hlim loh phah nan hmang lovin, engkim hi Pathian ruat a ni e' an ti dam hiai thei a. an beisei angin Champuii chuan a Pa lehkhathiam Education dept-a officer nibawk chu a chhun fuh bawka, lehkha pawh a rawn thiam zar zar hle a. kum 25 a han nih meuh chuan a Pa ang chiah chuan, Sawrkar officer lian tak nih theihna khawp thiamna a rawn nei thuai a.
mahse, Mizoram state rorelna Inpui kal dan inthlaknain dikna awp behna te, Duhlian chi tih dazâtna te an hun hma lam aṭanga a lo vulh len fe tawhna avangin Champuii chuan intervew a face apiangin  a che fuh thei reng reng lo mai a.
chutihlai chuan, Shillong lama chhungkua a kum tam tak lo inbengbel tawh Pu Sangliana leh Pi Thansangi te fapa, a tleirawl chhuahpui Chhuansanga chuan inneih a lo rawt ve tawh bawk nen, an inbiak rem hnu ah Shillong lamah an zu inkutsuih ta nge nge a.
.
An inneih aṭanga Kum 3na tur an kai ve chiah tiha, Nupa inngeih leh induh tak ni a hun an hman lai, an fapa Remruatfela pawh kum 2 a nih ve tawh lai chuan, Champuii te nupa chu an Car-in an chesuala an kâ pawh chhawn lohvin an boral ta mai a!
chumi hnu chuan Rafela chu Mizoram lama a Pi leh Pu te chuan "a Ni te pahnih lah lehkha zira la buai an ni si a..a pu lah natna benvawn neia enkawl ngai a ni si" tiin Shillong lama Rafela Pi leh Pu te chu, anni aia an la tlawng-âwl zawk thu te tih tak zeta hrilhin Rafela chu Mizoram lamah an hawpui ta a. kum 2 mi lek nita chu, Rafela chuan Mizoram lama a Pi leh Pu te chu Nu leh Pa ang maia a ngaih zui hnu ah Shillong lam chu a hre zui ta lo vang vang a.
mahse, a han rawlthar chhova, Collage te a han rah ve meuh chuan, Mizoram State Chi invauh bikna awm hlei thei tawh loin a hrin chhuah, hnam tin tih theih deuhthaw an zalen hulh hulhna hun leh nawm chenna zalen em em te, ruihhlo kal tlang zung zung theihna khawpa sualna sang em em te chuan ṭhian tâl ṭha duh lo zet zet te zui duhna bawihah a hnuk luta, chu chuan reiloteah ruihhlo bâwihah a tan tir zui ta a.
mahse, Rafela hian ṭhian kawp bik pahnih a neih hnu hian, hriat ngai loh kawm leh ruihpui mai mai chu a bansan hret hreta, a tawpah chuan Bibi-a leh Zela te pahnih nen hian thisena inzawmna nei ang maiin an inkawp nghet ta em em mai a ni.
.
Khua a êng lek lek tawh tih chu hre mah se, a Khum bula Sofa a ṭhu mu titih chung chuan, Rafela chuan karleh lama an thil tihtur chumi zana an ṭhian thuma an rel ruk chu muhil hlei thei lovin a ngaihtuah vang vang reng mai a.
Myanmar nen an inri na State boundary-ah Sawrkar security te an khauh thar thuta, Tiger brain (no 4 fir) rate chu namai lovin a sang chho zawt zawt mai tih an hre chiang si, anni ṭhian thum tan chuan ti lo lova awm hlei thei ta silo chu, an pawisa vawm khawmin an zan khat ruihna a daih lo thuai anga, mahni chhungte ṭheuh sum bawm vau chhuah a ngai thuai tawh dawn.
.
Rafela thluak fing zet hian, he hun rawn thleng thuai tawh tur hi a ngaihtuah lawk diam tawh avangin he mi zan hian a ṭhiante rawtna hi kalh ngatin, Fiara tui' a ral phiar hi a ṭul hle tih a hre chiang tlat reng a.
a duh ang taka an ralrel ruk ang hian an che thei a nih phawt chuan, Tiger brain' hi thla khat emaw thla hnih emaw tlâ zak chu an neih phah ngei dawn tih a hre chianga, a tum pawh tih hlawhtlin ngeia an hnu pawr zawng zawng pawh thup leh diak a ngai dawn tih chu a hre chiang hle a.
chung zawng zawng ngaihtuaha rilru vak kual leh an chet dan tur ngaihtuah chunga thluak chawl ta lo chu, dar 5:00am a rik ṭhak hnu ah pawh a kiu lehlam lehlam chu a khupa nghat chunga a tukkhuma a kut suih ran chung chuan a la thaw hap hap mai a.
.
Ni a chhiar nghauh nghauhva, an hun tiam a thlen hma chu Inah a awm tam ve bawka a Pi leh Pu te pawh an hlim ve ngang mai.
zan lamah pawh rei tak chhuak lovin an ṭhian thuma an kick zeuh hnu ah, mahni In lam panin rang takin an haw diaka an tihtur hmabak chu an mahni ṭheuhvin an ruahman nasa thei hle a.
Rafela hian a ṭhiante hi an che phuai a nih vaih chuan, an chet zui leh zel na tur kawng a ping hmuk thei tih a hriat chian avangin a mah ber chu a inrintawk hle a ngai tih a hre chiang telh telh a.
chuvang chuan, an hun neih dan um zui dan tur pawh amah vek chuan a ruat fel diam loh chuan, an thil tih tur chuan an dam chhungin a nghawng khawlo thei dawn tih thlengin a ngaihtuah ngun viau a ni.
.
An ni tiam a rawn thlenga, tlai lam boruak vawt vin tuk mai chuan Aizawl khawpui pawh a tuam chhuak hneh bawka, tlai dang zawng aiin khawpui chhung kawngpui pawh a thawl viau a.
khawthlangah Ni a liama, Ṭiau chhumin Chite ruam leh Sairang kawng thla te pawh a bawh zing chuai a, pawna chhuah hlek chuan Hnap a dawk emaw tih turin hnar kua tuai vut vut mai a awl hle ang tih khawpin a vawt zual ta viau a.
.
Chutihlai chuan, Figo 2061 model dum la thar zet hi Aizawl chhim lam dai panin a tawlh zâl zâla, a Registration plate chu Ṭiau chhum zing deuh chiai avang chuan, a pel zawnga Motor dang rawn tlan reng reng chuan siam chawp a ni tih an hre hauh lo! 
Kulikawn a thleng pheia, left indicator a dê zeuh zeuhva Ngaizel road ah a peng zauhva, chuta chin chu a hma aia chakin a dûk phei ta par par a.
.
Enge maw chen a tlan par par hnu chuan, kawng sir veilam zawl deuh laiah a peng thuta, hnim buk kar border phah bumboh zetah km 1 dawna thui a luh thlak hnu chuan, hmun zawl deuh dep dawpah a zu tlan kual pap papa head light a thim tak hmak rual chuan "kan hun tiam ila ûm pha ve zel e" tia rawn phun sap ri chuan Car khalh tupa chhuak mek lai chu a ti nui deuh hâk a.
.
"Ka Pa Car ka rawn ru chhuak tawp mai nih hi. body hi tih rân awih hauh loh aw" ti a Bibi-a'n a Car dinna bula an Bike chunga Rafela leh Zela te la ṭhu reng chu thim ruai karah chuan a han thlek tawn leh zauh zauhva.

"i Pa chu rei kan hman dawn loh thu i hrilh mai lo a nih chu le" Zela'n nuih hâk paha a rawn tih zui lai chuan, "ngawi mai mai teh, i tih tur hmabak a ko a nia" tiin Bibi-a chuan Zela chu a han khak hlak a.
.
Amah aia kum khat ve vea u ni mah se, a ṭhiante pahnih leh a rilru ngaihtuahna hi a inchen chiah lo tih hi Rafela hian a hre chiang bawka, hei vang hian hemi zana an thil tih tum pawh hi a ṭhulhpui hman lek lek a.
mahse, an kick (no 4 hip) mamawh râk a nât ṭhin zia leh an thin a ram mai ṭhin zia te a hre chianga, reiloteah an mamawh tak Tiger brain chu sale rate a sang em em dawn tih lah a hre chiang si!
"dar khat leh minute sawm chiah chiahah kan che chhuak ang" ti a zawi sata an chet hun tur a sawi leh hnu chuan, he thil, ti duh tur pawha a lo inngaih ngai loh, loh theih lohva a tih ngai ta tlat hi nuam lo tih rukna nei lek lek chung chungin thim zing hmun tin chu Rafela chuan a thlek kual zauh zauhva.
.
A banreka a Sana rawn vibrate dar dar chu Rafela chuan a han tuai zauhva, Zela chu Car khalh turin a hrilh vata Bibi-a pawh a tihtur hre takin Car front seat ah a lut nghal zat bawk.
.
Chumi hnu chuan, chak takin Aizawl khawpui chhung panin an tlan par para, Kulikawn aṭang chuan speed pangai taka khawpui hmar lam an pan hnu ah, dar 2:00pm vel chiahah Tuirial peng thlang deuh hleka, kawng kawi khat inṭan lehna laia tlak lam hawia link road lo pengah chuan an tawlh lut ta a.
.
Lung phah bumboh zet zim bawk si a meter 200 dawn an tlan hnu chuan, Zela chuan Car chu muang te te a khalhin an hma lama Thing tuai ding insir thim phei mup, a hnuai hnahthel ro inchap phei deuh zui zawl ang rengah chuan a tlan lut ta a.
zawl dinglam sir deuhva an inher luh hnu chuan, an beisei aia hmain an tlan luhna kawng lam aṭanga Motor rawn lut êng zeuh zeuh chu an hmu thuai a, chutah meuh chuan an tiril pawh a khur ṭang ta at at hlawm hle mai!
Car seat hnunga bawk khup tlat chung chuan Rafela chuan, "game chikhatah ngai rawh u" tia a ṭhiante pahnih chu a fuih zauh hnu ah a Pu-in a Officer nih laia inven nan tia a kawl Cz75B semi automatic 9mm Pistol kah nâ zet a ruk chhuah chu, a hnung lam Kawnghren kar aṭang chuan a phawi ta zâl zâl a.

CRYSTAL HILL, BUNG 1

- Llpa rokhum//Tlâk palh vaih zawngin, a hnuai zuk thlen hmain vawi tam kan thla a zuang chhuak hman mai awm mang e' tih tur khawpa Tui khâwh thla sang em em mai ko tlang, Lungpui Patêk nâl pulh chungah chuan, Tlangval la naupang zet, sang ria hmai tlang hriam pa hrâk leh mitmeng pa hrek hrâwk Hnar ngul sang veh vawh, a hmelṭhatna ai maha a hmel pà hrâk mai leh a pian hlei tling leh nalh zet avanga a mah pel tu te'n an thlir let fo leh, han en reng reng pawha Zu leh Sá tlan puar ṭhang tih hriat zet, a chi rawn keu chhuahna lamah Duhlian thisen pawlh dal tu a awm ngei tih hriat zeta, hmai tlang hmul bawm ngah zet te chu thisen bual deuh zuih chungin inthah tum tih hriat zetin an inhnek ṭhuai ṭhuaia an ṭan a phet chang changin an inkeuh miah miah bawk a.
vawi li nga an han inkeuh ṭhuai ṭhuai hnu ah phei chuan, chu Tui khawhthla sang em em mai ko tlang Lungpher nâl zual lai chu an hnaih zela, an chung lama Ṭek rawn tla dê zuai zuai kara Ruah mal lian zet zet rawn tlâ phuar phuar avang chuan huh zawr hnep tawh chunga insual an ni chung chuan, Tui khawhthla luang thum hlurh hlur mai ko tlang dâk zuau zuau khawpa an han innuai chinah phei chuan, an Jacket hak windproof chhungah te chuan tui a luh bawrh bawrh tak avangin an ṭuan a fum ta deuha, rei lovah phei chuan Tui khawhthla khauh zet chuan an pahnih chuan hnuai lam pan chuan a lâ ta vawn vawn a.

              Kum 2070, December ni 7 a ni a, Aizawl Zotlang veng tlak lam deuha concreat In pakhat tê fel ren rawn chhawng hniha sak, a chung zawk room bathlar zau zeta Slab a zar hliap Railling tun kual vek nghenga Tlangval chhuak hlawt kum 22 mi, hleitling leh pian nalh zet, a khabe phir kalh mai tawn tawna khabe hmul tlem nei, hmai tlang pâ hrâk mai leh mitmeng nalh zet, hnar ngul sang ve vaw ngo dan tawk tak ruih nei tih hriat zeta hnuai lam kawngpuia Motor insûl zut zut biha a ding ngawi reng lai chu, Pa tar lam kum 65 awm bawr vel, hmaifang la ṭha zet bek sam var vau tawh hian a pan phei chhat chhat a.

                Tlangval dinna a thlen phei chuan, a tupa chu zawi sapin a han kova chhanna erawh a dawng lem lo "mamtê, engah nge i lo tih leh ṭhin ni aw..! i Pi nen hian kan neih chhun i ni tawh a sin..i Nu leh Pate zawng damin hmuh tik ni kan nei tawh dawn lo!
nang hi i Nu leh Pa te'n min hnutchhiah leia kan ro hlu ber i ni tawh a, i rilru han siam là'ngin i Pi nena kan hlimna tur hian han nung ve leh tawh khai.
Nausen chum biang buang thianghlimnain a thuam tlat i ni ṭhin kha a ni a, i lo leikanga heti mai hian i tâl tak si a le"!?
a han ti sap sap a.

             A Pu thusawi ning niawm tak chuan a rum khum nghata, a piah deuhva a tawlh sawn san hnu chuan, a Jacket iptê chu a zen rak raka cigarette bawm a phawrh nalha pakhat a pawh chhuah hnu ah a ṭan kai te te a, an In hnuai kawngpui lam bih bawka hawi thla leh veng veng chung chuan a híp ta zauh zauhva.
mahse, chutia a inthiar fihlim hnu pawh chuan a Pu chuan a pan phei leh a, mitmeng zaidam zeta melh chunga a dar va vawn sak pah chuan, "mamtè, i hnena ka thu sawi zawmna kha ka hrilh zawm leh ang che chu tiin, i rawn haw um zui che-in i room ka rawn thleng chho leh nge nge a nih hi. Inah i awm tam si lova, i awm chhun ka chuh loh zawngin ka ti a ni" 
Tlangval chuan a Pu chu meng dul raih chung chuan a han ena, a Sigarette pêh lai muangchanga a kut veilama a lak thlâk hnu chuan "ka tan ṭangkaina a nei em ni"!?
tih sap pahin a room kawngka lam chu a pan san ta daih a.

              A tupa a room-a a lut ta daih chu inpet fana railling ngheng chunga a en zui hnu chuan, minute hnih vel lei lam biha a inngaihtuah vang vang hnu ah room ah chuan a va luh chilh leh ta nge nge a.

              A Pu-in a la rawn um zui ta fo chu ani tan chuan an ngaihtuah lam a in ang lem lo bawk nen, ngaih theih lohna lian tak a nei tih hriat zetin a lo melh tûr deuh khâih a, "zanin chu ka rawn haw lo ang" tih leh a Khum sira Shoe rack- a Sneacker lak chu a han rual a.

               A Sneacker lei hnuaia a hrui a bilh luh mawlh mawlh lai chuan, "nawmsip bawlna hian rah ṭha tak a chhuah ngai lo ve mamté, kan In hmun hi reilote-ah kan State Sawrkar hian office hmun atan min lei luih sak dawn a. chu hun hnu lamah chuan, kan chhungkua hi Thing tlang lamah kan input chhuah a ngai dawn.
naktukah kan putu a Thingtlang lama In hmun zawnga kan kal a ngaih dawn avangin zing firah kan chhuah a ngai dawna riak bo lo hram ta che". a Pu thu rawn sawi chhuah chuan a rilru a luh nâ ta deuh tih hriat zetin, Sneaker khing lehlam buna a kûn ngar lai chu a rawn dak chhuak zawka, a Pu chu chiang taka a en vang vang hnu ah "heng zawng zawng inṭanna hi eng vang nge ni"!?? tiin a Pu chu zawhna a han pe ta chat a.

               Lusei ho chuan, hlim taka an chen ve na Ṭiau Luipui chhak khaw nuam tak tak te chu an zinga hnam chak deuh ho kut an tawrh ngun tak deuh avangin an rauh sana, Ṭiau Luipui chu kanin a khua khuain thlang an rawn tlà thlâ ta zeuh zeuhva.
a nawlpuiin chutia Ṭiau an kan hnu chuan, a ṭhen te chu ram pilril zawkah an luta, mahni sa himna ngawt lo chu zawn theih ni tawh hek suh le! a tam ber chuan tlang ram sik leh sâ nuam tak awmna hmun ṭha an belh ngheh hnu ah, chi ṭhenkhatte chu kan thlang State Tripura thleng khuan an luta, kir leh ta erawh anni chu tun thlengin an awm ta lo!
Lusei hote chuan chu an ram thar luh chu an chei hnûma, mei mit lova rei tak an khawsak takah chuan, an chhak Ṭiau Luipui ral aṭanga an mahni rawn ûm thla tu Ral rawn lian zui zel te pawh chu huaisen takin, thih ngam lu pu-in an lo dang kir thei ta hial a.

              An hun kal zelah chuan, Lusei hote chu hnam huaisen Sa leh Ralah tlanchhe ngai lo, tlawmngaihna-in a thuam, ṭampui mitthi ah pawh a huhova indawm kang tel tel ṭhin, aia upa te zah thiama chawimawi ṭhin hnam zê mawi em em, Khawvel Hnam dang te'n an neih ve loh nun ze mawi neitu hnam ropui an lo ni ta a. reilote ah an ram chu chhak leh thlangah an sât zau zela, an zinga Lal chak zual apiang chuan, an chheh vela hnam dang nek sawra an ram sah zau hna chu an kutah an dah zui ta zel a. Lal Bengkhuaia phei chuan hmar phaiah, "heti chin hi kan ram a ni e" tiin Perh a zuk zep hial a.

                Chuti khawp chuan, an chenna ram bial chhung chu an Keipui ram hauh nghuta, khawi hnam mahin Lusei ho chu an rawn nêk ngam ta lo!hun a kal hret hreta, chhim thlang East Pakistan aṭanga rawn lut leh Tipera aṭanga rawn lut hnam dang te chu sal tirh koh kal berah an nei chhova, an awmna chin bik tur erawh an ram bial luah hawh tir chin bak chu sawn thei lo lekin an khuahkhirh mai bakah, an lakah ram luah hawh man chhiah an lak sak hmiah hmiah mai a.
mahse, hetih lai hian, an chi peng ṭhenkhat thlang tla thui lova, chhim biala inbengbel ṭhenkhat te leh thlang lam bawh zel hote chuan, an inchi zawmna an hái ta lek lek nge ni!? inral melh lek lek chunga inngur an ching ta riauva, an chi khat nihna ril takin a zawm tlat avang erawh chuan thu chhe tawp erawh an nei duh lo ve ve a. 

              Kum a kal chho zela Sakhuana dik Kristianna-in Lusei hote ram chu a rawn luh thleng a, ngilneihna, dawhtheihna, in unauna te'n an mizia leh nunphung chu a rawn luah ṭan ta a.
chuta chinah chuan, an Ram leh Hnam pawh a changkang chak ta em em a, an Culture-a hmun pawimawh tak tak lo luah ṭhin tu tam tak pawh an hnawl ta a. 

              Hriamhrei aiah Bible an lek ta zawka, an Lusei thuam hlui aiah Tuipui ral Savun ṭha mi leh Silk puan nêm tak tak te an inbel a, thifahnukchata an thawhrah ei leh in tur aiah sum hmangin ram dang Thlai leh Sa chitin an chaw lut zut zut renga, Di leh Dâp, Thilthek chih chhunga awm tawh lovin Lung ang maia nghet leh ṭha, an In sak ropui tak tak chhungah an cheng ta a.

               Chuti khawpa Sakhuana êngin a rawn luh chinah chuan, an ṭhalai Lehkhathiam hmelṭha tak tak te pawhin Khawvel ram chin an dai zau zela, an inchei dan leh an nun dan chenin Lusei hnam an ni tih hriat hran theih loh khawpin an changkang ta!
mahse, hetih lai hian, an chhehvel hnam dang an Sal tirhkah mai mai ni ṭhinte chuan an hriat loh ral aṭangin an Ram sah hêk sak tumin kua an rawn hreuhva, chumi piah lamah, an Ram chin chhunga Sumdawng leh hnathawka rawn lut hnam ṭhenkhat te'n chhung lam aṭanga beiin, Hriamhrei leh Ralthuam ropui tak tak aia hriam leh hlauhawm zawk 'Chi' leh 'Thisen' hmangin an rún ta hem hem mai a.

               Rei lovah Khawvel ram dangte anga an inrelbawlna, Lal khua nei hrang tawh lova rorelna khat hnuaia an luan khawm tawhna Sawrkar pawh chuan rahbi a dai pial hlek hleka, an Pi Pu te zê mawi tak leh Culture chu a rim a râ pawh hriat tur a awm ta lo!
chutia an ram inrelbawlna kalsiam a tleu telh telh lai chuan, chu an inrelbawlna Inpuiah chuan, 'Indona a zawnga hneh lo tu nih hlauhawm ber mai 'Chi nihna siamtu Thisen' hmanga run an tawh mekna chuan 'hlet' a rawn hreuh lut thuaia, Lusei thisen kai nisi hnam dang chi hming koh nisi te chuan an inrelbawlna Inpui ngei chu "ka ta" tiin an rawn kai ta hial a!

              Chutah zet chuan, an Sakhaw vawn ber Kristianna Lung inphumna Biak In hmunah te chuan, Hnam dangte Biak In a dinga, zing ṭawngṭai thawm leh Dar ri aiah Hnam dangte Pathian biakna hla chhammi Loud speaker hmanga lak rin thawm a lo ri ta chuah chuaha, an khawpui ber phei chu hmun dang zawng aiin hnam dangte Pathian fakna thawm chuan a luah hnêh ta!

              Khaw tinah Lusei hote tual chhung inrelbawlna fawng pawh Chi thlah dang thisen kai te'n an chelh chho zela, a ram neitu Lusei hote chu rahbeh tuarin an awm ta tak zet ta!
Lusei hote Ram chuan hliampui a tuara, tuma'n "keiin ka tuam dam nang e" ti tawh hek suh!
an mahni Ram ngeiah Hnam huaisen thlah Lusei hote chu tihduhdah tuarin an kûn ta tlawk tlawk a.

              Chuti khawpa nêk chêp an ni tawh chung chuan, Lusei hnamte zinga pamhamna-in a bual ât mihausa zawng zawng deuhthaw leh Lusei pa ṭhenkhatte chuan, an Ram neih chhun chu lainat a hnekin, hnam hrang thisen kai mipate hnena an Fanu te neih tir chu an hreh chuang hauh lo! Sumpaiin a awm chuan khawilai pawh ka Khawvelah ka siam thei' tih rilru pu an lo ni zo ta emaw tihturin Sum lipuiin Lusei hnamte zinga a tam zawk chu a chiah pil zo titih tawha, chung Lusei hnam chu keini hi kan ni a, kan hnam hi a ral titih tawha a Lusei hnam rilru pu la awm chhun te tan hian, Chi peng inlak bing emaw in ên hran chi a ni ta lul lo ve.

              A Pu titi a ngaihthlak zawh hnu chuan, a hmuh theih chin zawng zawnga a Pu thusawi dik zia a lo chhut ngai hlek loh chu a mitthla ah chuan a indawtin a rawn lang zut zuta. chutih rual chuan, a dawi ât ruihna vaih zet thlahlela a tal mai mai laiin, In leh lo pawh nei lova an lo awm teuh tawh zia te chu a ngaihtuah nasa ve hle tih a hmelah chuan a rawn lang chhuak ta hial a.
A hmui pet fan chunga chhuat a bih ran lai chuan, a Pu chuan a dara ben thak thak pah chuan "ka thu hrilh che kha hre rengin, zanin chu leng chhuak lo phawt la. zing takah kan awm hmun tur zawnga zin kan ngaih kha maw, nêk chepin kan awm ta tak zet tih ti fiahtu chu hei ngei hi a ni. ti rawh le, i Pi paw'n zanriah a rel fel tawh awm a sin, In hnuai lamah i chhuk teh ang" zawi sapa a tih leh hnu chuan, an Putu chuan phur loh hmel zetin In hnuai Step ah chuan an chhuk dun ta a.

THALFANG LEH MILU, BUNG 19

THALFANG LEH MILU, BUNG 19 NA
.
Chalvunga chuan Parchhingpuii leh a Nu a phuarna a phelh sak hnu chuan, "hmelma lo tur hmelma a insiam chu a nghawng a nâ ṭhin. ka farnu thla chu a muang ve tawh ngei ang le" ti sap chungin Parchhingpuii Nu chu a han melh zauhva. 
Parchhingpuii Nu chuan Chalvunga chu tim dai chungin a lo en let a, "taitea hi kan innghahna a ni a sin" tiin mittui tla zawih zawih chungin a pasal khumpui lama phuar khirh tlat chu a han en phei a.
Raldawla chuan a nupui leh fanu te lungchhe vankai chu ngawi renga a rawn melh ve ran ran hnu chuan "khawi khaw Lal nen mah inral nawra innawr lo tur kan ni teh a sin maw!
ka chi keu meuhvin hmeichhia a ral thah mai hi ka la ringhlel rum rum mai e" tia rilru nâ tih hriat zeta a rum deuh hap hnu ah Chalvunga ding ngawi reng lai chu fiah zetin a han melh leh hram a.
.
Chalvunga chuan Ralthuma pa chu mitmeng dam taka lo en let thuaiin, a phuarna chu a phelh sak sawt sawt a "khua hi ka chhuah san theih nan, Silai nen hian ka khirh che anga Dai lama kan liam hnu ah i let leh mai a niang chu" tia khua a chhuah san dan tur a hrilh hnu chuan, Raldawla pawh chuan a ruahmanna chu ṭha a tih thu leh an khua chu rawn hawi leh tawh lo tura a duh thu a hrilh ve sap bawk a.
.
Chutihlai chuan, pawn lama mipui pung khawm ho chuan an Lal fapa Raldawla In hnuai dap kar aṭanga thisen la rawn dir thla tlak tlak chu phawk hru chungin an inkawh hmuha, hlau hlawp zeta an rak nuai nuaina karah chuan Lal Khawluta meuh pawh a zam chhe hle tih hriat zetin a hawi ruai mai a.
In chhung lam thawm lah hriat tur awm tawh silo, In hnuai lama thisen rawn far tlak tlak reng chu an inbih chhawk chhen ringawt tawh mai a.
.
Chutia an buai viau lai chuan, khaw dai tlak lam aṭang chuan han en reng reng pawha hliampui tuar chau tih hriat zet, a bek vela thi khawn kai lei luai pa valai tak rawn bawkvak chho rawk rawk chu an han hmu a, chupa chuan Lal mual chu mangang zetin a rawn pan chhova "Sialbuan khau te u inpuih kan ngai e" tiin thâm chhâlin a rawn au chho lauh lauh zel bawk a.
.
Lal mual a rawn luh hnu chuan, buaina thuah hnihin a rawn tlak buak ta tih chu an Lal Khawluta hmelah chuan hai rual a ni ta lo, "Lalpa, kan khua an hâl filh chu la duhtawk mai suh le! Kan Lal leh a nupui fanaute chu salah an hruaia, nunau leh tar, hmeichhia chenin Zadeng Lal leh a chekawite chuan ral sal hruaiin an hruai chhuak vek a ni" tia an hun tawn rapthlak zet a sawi nawn leh lai phei chuan, Lal Khawluta leh mualkilte mai bakah mipui zawng zawng te chuan zam rukna ril tak an nei tih hai rual lohvin an ding sai hlak hlak hlawm mai a.
.
Chupa-in anni Sialbuan khaw tan pawh chung ral ho chu an hnawk thei renga a hriat thu sawi zui zel chunga, a thu rawn ken a ala sawi mek lai chuan, Lal fapa Raldawla kawngkapui tlengrel chu a rawn insawn hawng rap a, Raldawla luhrum ziala ṭham bet tlat chunga rawlthar hleitling zet leh hmel hmai tlang pâ hrâk maiin Raldawla a rawn chhawm chhuak lai chu an hmu thut mai bawk nen, luhkapui an rawn rah laia a nâka Silaia a hawlh ṭhen chawk chawk lai an han hmuh meuh phei chuan, "kan ral sal tâp rawlai pa chet dan mai mai chu e!
nang hi maw lo ni a, kan buaina rawn thlen leh tu chu" tih leh a bula pasalṭha pakhat Silai chuh chu Lal Khawluta chuan a rual ta mai a.
mahse, Silai a tin kawh dawn chiah tihah chuan "Lalpa, kan chan khân a fuh lo ve, i fapa khi i ngaihtuah hmasa teh ang khai" tia mualkil pakhat rawn aû ṭhawt thawm avang chuan, a Silai lek lai chu a paih ṭhuaia a fapa Raldawla nâk thawla Silai ngul inhawlh run mai chu thaw sek sek chungin a han melh kuau a.
.
Chalvunga chuan Parchhingpui pa ṭham bet tlat chunga luhkapui aṭanga leia a chhuk hnu chuan, "ka bul hnaia rawn kal apiang chu Lal fapa nunna zah lo tu ah ka ngai ang" tih leh Dai lam pana  Raldawla hnuh thlâk chu a han rual nghal a.
.
Chutah meuh chuan, Lal Khawluta leh a pasalṭha te chuan tih theih an nei rih hauh lo tih chu an hre chiang bawk a, chet la tura inmitmeiin awmzia a nei lo tih hriat zetin Chalvunga lah chuan, an awm hmun sawna che hlek an awm apiang chuan tupawh chu a hmu kim biai emaw tih turin Lal fapa chu Silai chuan a nawr rum hawk zel mai bawk si! 
"dai a luh pila, kan Lal fapa khu a thlah veleh a rualin bawh thlâk huk tur" tiin Sialbuan pasalṭha leh tlangval te chuan hmui phunin chet dan tur an inhrilh sup sup hlawm a.
mahse, Chalvunga'n an pil hnu deuh lawka an Lal fapa a rawn chhuah hnua, an thu reh ruk anga an han bawh thlak huka rei fe an zawn pawh chuan, tumah reng reng chuan Chalvunga hmel leh thawm chu an zuk hmu zui tlat lo!
chumi ni nilenga a tlak luhna awma an rin lofing sarih ngawta thui an chhui thla fê chung pawh chuan, a hniak awm takngial pawh an hmuh zui loh avangin khaw thimah beidawngin an let leh ta ringawt a.
.
Chalvunga chuan thim hmul chhelh chhulh tawh laia, an khaw dai pana Sialbuan pasalṭha leh tlangval te rawn let leh thawm chu a tawmna aṭang chuan chiang takin hre mah se, tumah chu kut lo thlak tum tawh lovin a duh ber a ti tawh bawka a ralmuan chinah khaw chhim lam pana pût bo chu a rilruk a. mahse, eng an ti hlawm nge ni!!? khua an rawn kai chauh tihah chuan, a tawmna bul lawk lawk dai vel chu a rual rualin Silai leh Fei nen pasalṭha leh tlangval te'n chet chhuahna hun awm thei lek lovin an rawn hrût ta zeuh zeuhva, an ralkhel ru tih hriat zetin an che vel reng reng chu an fimkhur hle mai bawk nen,  zan a han rei chhova, khuantevîk kawl eng hmasa rawn inṭamin vanlaizawl a rawn kai pêt iarh tawh lai te chuan, dai tam hrût ho chu reh a hnekin midangin an rawn belh ta sauh sauh mai a.
.
Chutah zet chuan Chalvunga meuh pawhin a bikbo zui dan tur ruahman har a ti ve ta!
Ralthuma pa hawlh chilh chunga an inchhawm chhuah lai khan, a ngaihtuahna-in a hriat hmaih loh avangin dai tâm an luh hnua Ralthuma pa a chhuah rual khan, Sialbuan pasalṭha te khan an rawn bawh thla mai dawn tih kha a ngaihtuah tel tlat mai a.
kha vang khan, fimkhur thulhah khua a kai chhohna hnuaia Saphu khur bir zet zawnah khan Ralthuma pa pawh kha dai lam a panpui ta kha a ni a.
a rin ang ngeiin an rawn bawh ngei renga, ani pawh a lo ruahman lawk ang chiahin Saphu khurah a lut vata, dai tâm hnai taka la tawm a nih avang erawh chuan zan rei nghakin a beisei ang hun erawh a her chhuak dawn ta lo a ang ta hle mai.
.
Sialbuan pasalṭha leh tlangval ho an mu eih lo tih a hriat chian tawh avang chuan, eng an ti teh chêk nge ni amah an chang nge tih la Chalvunga chuan hre tawh hek suh!
heti hrim zawngin thih huama khaw dai chhim lam chu khaw ên chian hma ngeia a pan ruak mai a ṭul dawn tho tho tih a hre chiang ta viau a.
.
Hun remchang a han melha, Ni lu zung rawn langin tlang leh ruam a bawh ên ṭan ruai tawh lai chuan, Sialbuan dai hrût pawl ṭhuang hmasa mi sawm chuang an liam hnua an hnu rawn dawm zat tu tur ṭhuang dangin an rawn tlâk chhilh leh hma a chet chhuah chu tumin, a tawmna Saphu khur kotlanga Phaipheng buk inphan phui chût chu Chalvunga chuan a han keu da da a. 
mahse, a dâk chhuak dawn chiah tihah chuan, a tawmna dai ep chho aṭanga hmar lawi hret, a han hmuh phak maia hnai Lungdawh lamah chuan ral bawh hla chham ri leh Silai ri a rawn inrawn thum ta dur dur a!
.
Chuta ṭanga reilote ah Sialbuan khaw chung zawna meikhu dum ngen ngun invial chho tup tup leh meipui inhlap sen zuai zuai chu a hmu zui thuai a, chu meipui rawn ṭang ur kai thum hlurh hlurh thawm chu nunau nâtuar mangang au thawm leh patling inhrosa thawm khêk ruai ruaiin a rawn pawlh bawk!
a tawmna dai tam hawia patling leh patling Chem sen nen rawn in um liam thla zut zut chunga, indimna tel hlek lova an intawn chin china an rawn insât sen thla puat puat te chu Chalvunga tan chuan lo hmuh hmaih chi ziazang a ni ta lo.
chu achhapah, khaw la thim chhulh hnuaia Sialbuan khaw kang mek khu tur dum chho ngun kara, mautlawn thum dawn dawna sanga meipui zang khauh inhlap sen lar chho huam huam mai te chu a puk chak chho ziai ziai bawka, Sialbuan khua chuan a ral lo hmachhawn chu a hneh dawn hauh lo tih pawh Chalvunga chuan a hmu chiang ta hle a.
.
Chutah chiah chuan, a mah thâh chak buaia buai, nun zalen lo taka nawr tlat tu Sialbuan khua ral kuta a tlukna ni chu lawm taka bawp khai meuhva a lam khumna nitur a ni tih chu Chalvunga chuan a ngaihtuah kai ve ta hial a.
chu angaihtuahna chu zalen zeta liam san thuai tura a rilru siam chunga, a tawmna Saphu khur aṭanga a han vah chhuah hnu chuan, a thlang lam Ngawpui duk ril zawk Sialbuan khaw kang sen rûm maiin a ên sen thlak ruih lam chu a pan thla ta thauh thauhva.
.
Mahse, pen sawm hnih vela thui a liam thla hlawt tiha a liam mekna dai rawn ep chiaha hmeichhe ṭap raih râih ri avang chuan, Chalvunga chu a ding chata a thisenzam leh a thlîng thlenga a mah fan hik chuai tu chu hmeichhe 'aw' nû hnap chu a hai hauh silo!
rum deuh nghat chungin hma lam pana kal luih tum chuan a han pen thla leh dawn rawka, pen khat pawh pen thei lovin Chalvunga meuh pawhin chakna tha hrui a tlachham ta em ni tih turin, a bula rawchang vuan chuan a ding sai ta dat dat mai a.
.
Hun rei nghah chi a ni ta lo!
khaw chhung thawm rapthlak zet kara nâtuara tlu hlum ve tur atan chuan a pamhmai lu lo maw....!??
"Parchhingpui" tia a phun sap hnuah chak mangkhengin khaw chhung lam panin a dûk chho pur pura, dai tam a thlen rual chuan tuma dan rual loh khawpin Ngawpui fachuam Chalvunga'n khaw tualah ngei a vawikhat nan ral a nawr ve ta!
.
A Silai vawikhat a puah rual chuan, a mah rawn hnaih hmasa ber tu chu a hlawm nawlha, a Silai a paih hnu ah a Kawlhnam chu nâ zet zeta vai puat puatin a hma chu a su kaw chak zet mai!
tual zawng zawnga thisen luang zêih zûih leh ruang tlu kawkalh thliah thluah te chu Chalvunga chuan fiah zet zeta en pah zel chung chuan, hliam tuar bawkvak ṭawk ṭawk te chu tunge an nih a fiah phei zel bawk a.
thil dang tum nei lova tlan ni mah se, khawilai mai pawha ral innawr ṭê ruaih ruaih chunga insat ṭhu hnawk hnawk mai te chu a tan an hlauhawm vek tih a hriat avang chuan, a sir hlat lova lo innawr mekte chu dimna tel hauh lovin a sât phei hmiah hmiah mai a.
chutihlaiin a kawng dâl zawnga rawn inrawlhte lah lu tla nawlh nawlh khawpa nâ a a vaihma phei hmiah hmiah theih zel avang chuan, a hma ah tumah ding zo an awm loh chu achhapah, ṭhenkhat te phei chu an lo tlanchhe titih fo mai tih pawh a hre chiang viau a.
chuta chinah chuan, a kawng pawh a lo kaw zau tawh deuh bawka, a hma ni thim hlima a chhuah san tak In bawk chu rei lovah a tlan thleng a, rang zeta In chhung a han luh chuan chhuatlaia Parchhingpuii pa lo let reng chu a han hmu a.
.
Lal fapa Raldawla chuan Chalvunga hmel a lo hmuh veleh chuan, a kut chuan thei leh thei lova lo huiin a hmui bula Chalvunga'n a beng a han dawh hnaih veleh chuan "chemteii leh a nu te chu kha lamah khan an hruai ta a nih kha" tia chau thâm chhâl chunga a lo phun sap hnu ah thlamuan hmel zetin Chalvunga chu a han en a.
Chalvunga chuan chutia lawm hmel zeta Parchhingpuii pa-in a en reng lai chu tawrh har a ti ve hle tih hriat zetin a lu chu a han kuai thlè hreta "vawikhat chiah sawi leh hram teh, khawi ral nge ni an nih le"!? a han ti a.
"Lal Dengphunga" tih bak Parchhingpuii pa chuan sawi thei ta hek lo le!
a nupui leh a fanu te tan dama a va hmuh hlauh takin tih a ngaihtuah kai ve a ni tih hriat zeta, thuchah duh la neih hmel zeta a rawn melh leh hram lai chuan "ka lo enkawl dawn nia" tiin Chalvunga chuan 'aw' dam zetin a thlah ta a.
.
Parchhingpuii pa a chah hnu chuan, a tihtur hmabak la awm chu hlen chhuah vat a ngai tih ngaihtuah reng chung chuan, tha tho zet leh thinrim ru zetin Chalvunga chuan kawngkapui lam chu chak zetin a pan thuai a.
Lal muala a chhuah laite chuan, a farnu Hliappuii pu, amah thlahtu Lal Dengphunga leh Sialbuan Lal chhungkaw inkarah chuan a ding ta tih a inhre chiang bawka, thu ṭha lakai tura thupui vai turin a kum bih a la tam tawk lo chu pawi a ti ṭan kher mai!
Lal Dengphunga pasalṭha te chu be pawp thei pawh nise, ani chu tuman an rawn hre ve dawn lo tih leh Parchhingpuii te nufa lak let phei chu a tan thil harsa tak a ni thei dawn tih te chu a hre chiang si.
chutia a him chin zela tlan chunga Parchhingpuii te nufa zawnga a buai hle lai chuan, a pu pasalṭha te chuan an lo nawr let anih chuan Parchhingpuii te nufa tan chuan thih pawh huama hriam lek tur chuan a rilru a siam ta a.
.
Ni lu a rawn langa, chhim daiah fanai Lal Dengphunga pasalṭha te pawh an sal hruai te khalh khawmin an chawl ṭhuap a.
chutihlai chuan, khua a Ṭhi leh Dar ro ṭha zawnga la tâp pasalṭha leh tlangval ṭhenkhat te pawh an rawn thleng khawma, Lal Khawluta te chhungkua leh Sialbuan pasalṭha ṭhenkhat te leh mualkil chhungkaw thum vel chu an tlanchhe hman a ni tih te chu an sawi sap sap hlawm a.
chuveleh an hruaitu pasalṭha pali te chu inrawn kualin, chung tlanchhe ho chu enge maw chen tal va um zui tur insiam an han rawt a.
an rel ang chuan an hotute zinga pasalṭha pahnih chuan, tlangval sawm hruaiin Sialbuan Lal leh a chekawite bibo chu zawn tumin an chhuak ta nghal a.
.
Chung ho an liam chauh tihah chuan, an thlang khaw dai tlak lam aṭang chuan rawlthar lian thelh thawlh, sam dar vaw nghuau mai hi a rawn lang thuta "ral ka ni lova, Lalpa Dengphunga thlâh zing a mi ka ni e" tia rawn ṭawng zawi sap chunga rawn pen hnai zelin chu rawlthar chuan an hotute biak a duh thu a rawn sawi zui zat bawk a.
.
Dengphunga pasalṭha Ralchhema chuan, chu rawlthar chu ral ho nen Lal muala an innawr nât hle laia a hma rawn su awng fur fur tu, a lo chhin chhiah ruk ngei kha a ni tih a hre chiang ta kher mai!
mahse, kha tih lai khan mak tak maiin he rawlthar hian a khawi lam ve ve pawh kha a bitum hmiah hmiah tih a hriat chian avang khan, khawi Lal khaw pasalṭha nge a nih tih kha a hre thei hauh lo kha a ni a.
hetia an Lal Dengphunga chi keu zing a mi nia a rawn inchhâl mai phei hi chu ngaihtuah chian fe hnua thupui lakpui chi chauh niin a hre ta tlat a.
"kan Lal chi chhuah keu zingah i inchhâl mai hi tu khawkha pawm tlak va ni suh! Sialbuan Lal muala i chet lai khan, i pu pasalṭha te chu i thah nual si kha maw"!? a han tih èl deuh ngat a.
.
Chalvunga chuan chupa ṭawng duhdan aṭang chuan, an buai zual laia a hma a ding tur ngeia a lo veh lawk ho pawh an kiang leh duak ṭhin kha a hrethiam ta deuh kuarh a.
"rem i tih chuan, biak fal lawk che ka duh e" tia Ralchhema chu thupui sawipui tura a sawm hnu chuan, "ni ang hmiang, kan naute pathum chu i kut zâlah an tluk avangin kan Lal leh keini a khaw pasalṭha daido te hian ṭhian ṭha thlahin kan thlah liam mai che chuan ring suh khai" la ti ngal ngal chungin pasalṭha Buanthanga chu Ralchhema chuan a hui zauh hnu ah an awm khawmna piah Lungpui lian tak tak insir khupa na hmun chu an pan phei ta a.
.
Lungpui Thlam aia lian lian pahthum insir khup hnuai puk ruih mai a, mipathum ṭhu khawm te chu an thu khel a ril bawka an ṭawng pawh zawi sat sat hle mai!
"Satluaia chu kan Lal Dengphunga hringtu Hrangruma chi keu zing ami a ni a, Satluaia chi keu leh chhawng chu i hre chêk ang maw"!? tia Buanthanga'n zawhna a pek takah chuan, "ka pa pu Hrangchhinga chu in Lal chi zawm a ni" a han ti khauhva.
.
Chu rawltharin an Lal te chi kual dan a lo hre thui em em mai chu Buanthanga leh Ralchhema te chuan mak an tih em avang chuan "i khualpang zin thu bawl ngawt zawng va ni teh chek lo se, kan Lal chuan chu lo chu fiahna la phût cheu ta se i insawi fiah thei ang maw"? tiin la ring zo mang lo tih hriat zetin Ralchhema chuan a han zawt leh a.
Chalvunga chuan inseh ruh deuh rât chung chuan lungawi chiah tawh lo tih hriat zeta a rum deuh nghat hnu ah, "ka farnu Hliappuii kha fanai ho kut aṭangin ka ka hruai chhuaka" tia bul a ṭan leh lai chuan a kut chu Buanthanga leh Ralchhema te chuan a rawn en rang hle a.
.
An Lal tunu Darhliappuii Dar dawhkilh an han hmuh meuh chuan, phawk zeta meng bial kawk kawk chungin Chalvunga chu Buanthanga leh Ralchhema te chuan an melh ngun dun hle a.
an ngawih ṭhap hnu chuan Chalvunga bawk chuan an la ringhlel cheu a nih chuan, fiahna dang a la hriat thu sawi lehin fanai Lal leh a chekawite hming a hriat ang ang chu a han sawi leh ta a.
chuta chinah chuan, Lal Dengphunga pasalṭha te chuan Chalvunga chu rinhlel chi rualah an dah ngam ta lo!
an naute zing ami a thah nual nachhan erawh chu an zawh leh zauh hnu ah pawh, "ka tih makmawh ka ti ah ngai ula, ka pu hnenah chuan ngaihdam ka dil nang e.
chu lo chu thil pakhat chiah ka pu chu ka dil duha" a han ti leh a.
.
Pasalṭha pahnih te chuan, an thu chu a inhmuh tawh thu leh a pu tan chuan a ngaihdam dilna chu pawm harsa anih an rin loh thu te, a thil duh chu a pek mai an rin thu te chu an sawi ta a.
chumi hnu chuan Chalvunga chuan rilru zangkhai takin "in sal hruai Sialbuan Lal tunu leh a nu te hi chu keiman ka veng a nge" tia a dilna pawh chu Buanthanga leh Ralchhema te chuan rem an tihsak ta a.
.
Parchhingpuii leh a nu te'n Chalvunga hmel an han hmuh chuan, an lawm a ni tih chu hai rual lohvin a rawn lang chhuaka an mittui kara lawmna chu Chalvunga tan pawh hai rual a ni lo.
"kei ka awm chhung chuan, nang leh i nu hi in him ang" tia Chalvunga'n Parchhingpuii en ran chunga an tan innghahna tlak a nih zia inringtawk taka a sawi sap lai phei chuan, Parchhingpuii te nufa chu kûn ngaih chungin an insut fap fap mai a.
.
Zadeng Lal Dengphunga leh a tupa Chalvunga te titi dun chu an thutak dun hle tih a hriat hle a.
an sir kil khumpuia Lalnu Darlaii leh Parchhingpuii te nufa pawhin anni putu inbia, kha chen inhre lova awm tawh, mak tak maia inral nawrna aṭanga inchhar chhuak tlat te chu mittui tla ṭeuhin an lo thlir lo thei lo!
"taite, Ṭiau ral hun hnu kal tawh kha chu a liam zo tawha, Zadeng Lal kan ding chang ta ber a lawm maw.
i pute ho leh i pite ho pawh tunah meuh zawng pialralah inngeih takin an lawi thei tawh anga, ngaihdam an dilna 'aw ká' hi kan thlah tute thlengin thlarau chawlh nan an hmang kumkhua tawh ang..kan thu dang a lai chuan, a eng chu maw ka hnena i ngen dawn tak chu"!?
Lal Dengphunga chuan a han ti a.
Chalvunga chuan, a puin a thil ngen duh a piin a hrilh thawi a lo ngaipawimawh hle chu a zah phah deuh viau mah se, tun hi sawi hun tak a ni tih a hai hauh lo, "Sialbuanah khan ka farnu phuba lama kai mai ka ni a. duh se la chuan, an sal man ka nih lai khan an Lal fapa i sal Parchhingpuii pa hian min that thei reng tih a chiang viau a.
ka chunga zahngaihna a neihna kha rulh ka duh a ni ka pu" a han ti a. Lal Dengphunga chuan a ṭawng chhung tawite ah khan a tupa leh khumpui kawma ṭhu a sal tleirawl hmelṭha zet Parchhingpuii te chu a lo melh hmaih bik tlat lo, "pakchhaih khah, keimah zadeng tupa Chalhuaisena ti la, i duh ang tak chuan Sialbuan Lal tunu leh a nu te chu va be tawh khai.
an hmakhua chu i kutah ka hlan e Taite" tih leh a Seki zupeng tlak chu a han rual a.
.
"nang ka nunna chunga thu neitu i ni, i sal ka ni chung hian i tan hna ka thawk dawn lo em ni"!? Parchhingpuii'n a tih zawih sap lai chuan, "sal chuan a pu chu a sal let a nih tak ber hi"! tih leh a kutzunglai chang ti kawm zauh chunga Parchhingpuii chala dim zeta tuk kauh chu Chalvunga chuan a han rual a.
.
Chuveleh a pu Dengphunga leh a pi Darlaii te pahnih an Se no nei thar ena chhuak ta daih kha an rawn lut thuta, "ka tupa Chalvunga chuan, a nun chhan nan huaisen taka THALFANG LEH MILU a châr chat chat hnu ah, hmar lawi Setê rang nalh zet a dan chêp ve tak hial chu" tia nui huah huah chungin a pu Lal Dengphunga chuan a pi Lalnu Darlaii chu a han kiai zuk zuk a.

                                       THE END


TUN AṬANGA REILOTEAH FUTURE NOVEL DANGLAM TAK LEH NGAIHNAWM, A KALPHUNG MIZO NOVEL A LA AWM NGAILO UPLOAD A NI THUAI DAWN. LINK SHARE DARH LAMAH ṬAN LO LA VE LA NASA TAKIN HE BLOG WRITER HI I PUIIN I TI CHAK SAUH SAUH DAWN TIHNA A NI.