THALFANG LEH MILU, BUNG 19

THALFANG LEH MILU, BUNG 19 NA
.
Chalvunga chuan Parchhingpuii leh a Nu a phuarna a phelh sak hnu chuan, "hmelma lo tur hmelma a insiam chu a nghawng a nâ ṭhin. ka farnu thla chu a muang ve tawh ngei ang le" ti sap chungin Parchhingpuii Nu chu a han melh zauhva. 
Parchhingpuii Nu chuan Chalvunga chu tim dai chungin a lo en let a, "taitea hi kan innghahna a ni a sin" tiin mittui tla zawih zawih chungin a pasal khumpui lama phuar khirh tlat chu a han en phei a.
Raldawla chuan a nupui leh fanu te lungchhe vankai chu ngawi renga a rawn melh ve ran ran hnu chuan "khawi khaw Lal nen mah inral nawra innawr lo tur kan ni teh a sin maw!
ka chi keu meuhvin hmeichhia a ral thah mai hi ka la ringhlel rum rum mai e" tia rilru nâ tih hriat zeta a rum deuh hap hnu ah Chalvunga ding ngawi reng lai chu fiah zetin a han melh leh hram a.
.
Chalvunga chuan Ralthuma pa chu mitmeng dam taka lo en let thuaiin, a phuarna chu a phelh sak sawt sawt a "khua hi ka chhuah san theih nan, Silai nen hian ka khirh che anga Dai lama kan liam hnu ah i let leh mai a niang chu" tia khua a chhuah san dan tur a hrilh hnu chuan, Raldawla pawh chuan a ruahmanna chu ṭha a tih thu leh an khua chu rawn hawi leh tawh lo tura a duh thu a hrilh ve sap bawk a.
.
Chutihlai chuan, pawn lama mipui pung khawm ho chuan an Lal fapa Raldawla In hnuai dap kar aṭanga thisen la rawn dir thla tlak tlak chu phawk hru chungin an inkawh hmuha, hlau hlawp zeta an rak nuai nuaina karah chuan Lal Khawluta meuh pawh a zam chhe hle tih hriat zetin a hawi ruai mai a.
In chhung lam thawm lah hriat tur awm tawh silo, In hnuai lama thisen rawn far tlak tlak reng chu an inbih chhawk chhen ringawt tawh mai a.
.
Chutia an buai viau lai chuan, khaw dai tlak lam aṭang chuan han en reng reng pawha hliampui tuar chau tih hriat zet, a bek vela thi khawn kai lei luai pa valai tak rawn bawkvak chho rawk rawk chu an han hmu a, chupa chuan Lal mual chu mangang zetin a rawn pan chhova "Sialbuan khau te u inpuih kan ngai e" tiin thâm chhâlin a rawn au chho lauh lauh zel bawk a.
.
Lal mual a rawn luh hnu chuan, buaina thuah hnihin a rawn tlak buak ta tih chu an Lal Khawluta hmelah chuan hai rual a ni ta lo, "Lalpa, kan khua an hâl filh chu la duhtawk mai suh le! Kan Lal leh a nupui fanaute chu salah an hruaia, nunau leh tar, hmeichhia chenin Zadeng Lal leh a chekawite chuan ral sal hruaiin an hruai chhuak vek a ni" tia an hun tawn rapthlak zet a sawi nawn leh lai phei chuan, Lal Khawluta leh mualkilte mai bakah mipui zawng zawng te chuan zam rukna ril tak an nei tih hai rual lohvin an ding sai hlak hlak hlawm mai a.
.
Chupa-in anni Sialbuan khaw tan pawh chung ral ho chu an hnawk thei renga a hriat thu sawi zui zel chunga, a thu rawn ken a ala sawi mek lai chuan, Lal fapa Raldawla kawngkapui tlengrel chu a rawn insawn hawng rap a, Raldawla luhrum ziala ṭham bet tlat chunga rawlthar hleitling zet leh hmel hmai tlang pâ hrâk maiin Raldawla a rawn chhawm chhuak lai chu an hmu thut mai bawk nen, luhkapui an rawn rah laia a nâka Silaia a hawlh ṭhen chawk chawk lai an han hmuh meuh phei chuan, "kan ral sal tâp rawlai pa chet dan mai mai chu e!
nang hi maw lo ni a, kan buaina rawn thlen leh tu chu" tih leh a bula pasalṭha pakhat Silai chuh chu Lal Khawluta chuan a rual ta mai a.
mahse, Silai a tin kawh dawn chiah tihah chuan "Lalpa, kan chan khân a fuh lo ve, i fapa khi i ngaihtuah hmasa teh ang khai" tia mualkil pakhat rawn aû ṭhawt thawm avang chuan, a Silai lek lai chu a paih ṭhuaia a fapa Raldawla nâk thawla Silai ngul inhawlh run mai chu thaw sek sek chungin a han melh kuau a.
.
Chalvunga chuan Parchhingpui pa ṭham bet tlat chunga luhkapui aṭanga leia a chhuk hnu chuan, "ka bul hnaia rawn kal apiang chu Lal fapa nunna zah lo tu ah ka ngai ang" tih leh Dai lam pana  Raldawla hnuh thlâk chu a han rual nghal a.
.
Chutah meuh chuan, Lal Khawluta leh a pasalṭha te chuan tih theih an nei rih hauh lo tih chu an hre chiang bawk a, chet la tura inmitmeiin awmzia a nei lo tih hriat zetin Chalvunga lah chuan, an awm hmun sawna che hlek an awm apiang chuan tupawh chu a hmu kim biai emaw tih turin Lal fapa chu Silai chuan a nawr rum hawk zel mai bawk si! 
"dai a luh pila, kan Lal fapa khu a thlah veleh a rualin bawh thlâk huk tur" tiin Sialbuan pasalṭha leh tlangval te chuan hmui phunin chet dan tur an inhrilh sup sup hlawm a.
mahse, Chalvunga'n an pil hnu deuh lawka an Lal fapa a rawn chhuah hnua, an thu reh ruk anga an han bawh thlak huka rei fe an zawn pawh chuan, tumah reng reng chuan Chalvunga hmel leh thawm chu an zuk hmu zui tlat lo!
chumi ni nilenga a tlak luhna awma an rin lofing sarih ngawta thui an chhui thla fê chung pawh chuan, a hniak awm takngial pawh an hmuh zui loh avangin khaw thimah beidawngin an let leh ta ringawt a.
.
Chalvunga chuan thim hmul chhelh chhulh tawh laia, an khaw dai pana Sialbuan pasalṭha leh tlangval te rawn let leh thawm chu a tawmna aṭang chuan chiang takin hre mah se, tumah chu kut lo thlak tum tawh lovin a duh ber a ti tawh bawka a ralmuan chinah khaw chhim lam pana pût bo chu a rilruk a. mahse, eng an ti hlawm nge ni!!? khua an rawn kai chauh tihah chuan, a tawmna bul lawk lawk dai vel chu a rual rualin Silai leh Fei nen pasalṭha leh tlangval te'n chet chhuahna hun awm thei lek lovin an rawn hrût ta zeuh zeuhva, an ralkhel ru tih hriat zetin an che vel reng reng chu an fimkhur hle mai bawk nen,  zan a han rei chhova, khuantevîk kawl eng hmasa rawn inṭamin vanlaizawl a rawn kai pêt iarh tawh lai te chuan, dai tam hrût ho chu reh a hnekin midangin an rawn belh ta sauh sauh mai a.
.
Chutah zet chuan Chalvunga meuh pawhin a bikbo zui dan tur ruahman har a ti ve ta!
Ralthuma pa hawlh chilh chunga an inchhawm chhuah lai khan, a ngaihtuahna-in a hriat hmaih loh avangin dai tâm an luh hnua Ralthuma pa a chhuah rual khan, Sialbuan pasalṭha te khan an rawn bawh thla mai dawn tih kha a ngaihtuah tel tlat mai a.
kha vang khan, fimkhur thulhah khua a kai chhohna hnuaia Saphu khur bir zet zawnah khan Ralthuma pa pawh kha dai lam a panpui ta kha a ni a.
a rin ang ngeiin an rawn bawh ngei renga, ani pawh a lo ruahman lawk ang chiahin Saphu khurah a lut vata, dai tâm hnai taka la tawm a nih avang erawh chuan zan rei nghakin a beisei ang hun erawh a her chhuak dawn ta lo a ang ta hle mai.
.
Sialbuan pasalṭha leh tlangval ho an mu eih lo tih a hriat chian tawh avang chuan, eng an ti teh chêk nge ni amah an chang nge tih la Chalvunga chuan hre tawh hek suh!
heti hrim zawngin thih huama khaw dai chhim lam chu khaw ên chian hma ngeia a pan ruak mai a ṭul dawn tho tho tih a hre chiang ta viau a.
.
Hun remchang a han melha, Ni lu zung rawn langin tlang leh ruam a bawh ên ṭan ruai tawh lai chuan, Sialbuan dai hrût pawl ṭhuang hmasa mi sawm chuang an liam hnua an hnu rawn dawm zat tu tur ṭhuang dangin an rawn tlâk chhilh leh hma a chet chhuah chu tumin, a tawmna Saphu khur kotlanga Phaipheng buk inphan phui chût chu Chalvunga chuan a han keu da da a. 
mahse, a dâk chhuak dawn chiah tihah chuan, a tawmna dai ep chho aṭanga hmar lawi hret, a han hmuh phak maia hnai Lungdawh lamah chuan ral bawh hla chham ri leh Silai ri a rawn inrawn thum ta dur dur a!
.
Chuta ṭanga reilote ah Sialbuan khaw chung zawna meikhu dum ngen ngun invial chho tup tup leh meipui inhlap sen zuai zuai chu a hmu zui thuai a, chu meipui rawn ṭang ur kai thum hlurh hlurh thawm chu nunau nâtuar mangang au thawm leh patling inhrosa thawm khêk ruai ruaiin a rawn pawlh bawk!
a tawmna dai tam hawia patling leh patling Chem sen nen rawn in um liam thla zut zut chunga, indimna tel hlek lova an intawn chin china an rawn insât sen thla puat puat te chu Chalvunga tan chuan lo hmuh hmaih chi ziazang a ni ta lo.
chu achhapah, khaw la thim chhulh hnuaia Sialbuan khaw kang mek khu tur dum chho ngun kara, mautlawn thum dawn dawna sanga meipui zang khauh inhlap sen lar chho huam huam mai te chu a puk chak chho ziai ziai bawka, Sialbuan khua chuan a ral lo hmachhawn chu a hneh dawn hauh lo tih pawh Chalvunga chuan a hmu chiang ta hle a.
.
Chutah chiah chuan, a mah thâh chak buaia buai, nun zalen lo taka nawr tlat tu Sialbuan khua ral kuta a tlukna ni chu lawm taka bawp khai meuhva a lam khumna nitur a ni tih chu Chalvunga chuan a ngaihtuah kai ve ta hial a.
chu angaihtuahna chu zalen zeta liam san thuai tura a rilru siam chunga, a tawmna Saphu khur aṭanga a han vah chhuah hnu chuan, a thlang lam Ngawpui duk ril zawk Sialbuan khaw kang sen rûm maiin a ên sen thlak ruih lam chu a pan thla ta thauh thauhva.
.
Mahse, pen sawm hnih vela thui a liam thla hlawt tiha a liam mekna dai rawn ep chiaha hmeichhe ṭap raih râih ri avang chuan, Chalvunga chu a ding chata a thisenzam leh a thlîng thlenga a mah fan hik chuai tu chu hmeichhe 'aw' nû hnap chu a hai hauh silo!
rum deuh nghat chungin hma lam pana kal luih tum chuan a han pen thla leh dawn rawka, pen khat pawh pen thei lovin Chalvunga meuh pawhin chakna tha hrui a tlachham ta em ni tih turin, a bula rawchang vuan chuan a ding sai ta dat dat mai a.
.
Hun rei nghah chi a ni ta lo!
khaw chhung thawm rapthlak zet kara nâtuara tlu hlum ve tur atan chuan a pamhmai lu lo maw....!??
"Parchhingpui" tia a phun sap hnuah chak mangkhengin khaw chhung lam panin a dûk chho pur pura, dai tam a thlen rual chuan tuma dan rual loh khawpin Ngawpui fachuam Chalvunga'n khaw tualah ngei a vawikhat nan ral a nawr ve ta!
.
A Silai vawikhat a puah rual chuan, a mah rawn hnaih hmasa ber tu chu a hlawm nawlha, a Silai a paih hnu ah a Kawlhnam chu nâ zet zeta vai puat puatin a hma chu a su kaw chak zet mai!
tual zawng zawnga thisen luang zêih zûih leh ruang tlu kawkalh thliah thluah te chu Chalvunga chuan fiah zet zeta en pah zel chung chuan, hliam tuar bawkvak ṭawk ṭawk te chu tunge an nih a fiah phei zel bawk a.
thil dang tum nei lova tlan ni mah se, khawilai mai pawha ral innawr ṭê ruaih ruaih chunga insat ṭhu hnawk hnawk mai te chu a tan an hlauhawm vek tih a hriat avang chuan, a sir hlat lova lo innawr mekte chu dimna tel hauh lovin a sât phei hmiah hmiah mai a.
chutihlaiin a kawng dâl zawnga rawn inrawlhte lah lu tla nawlh nawlh khawpa nâ a a vaihma phei hmiah hmiah theih zel avang chuan, a hma ah tumah ding zo an awm loh chu achhapah, ṭhenkhat te phei chu an lo tlanchhe titih fo mai tih pawh a hre chiang viau a.
chuta chinah chuan, a kawng pawh a lo kaw zau tawh deuh bawka, a hma ni thim hlima a chhuah san tak In bawk chu rei lovah a tlan thleng a, rang zeta In chhung a han luh chuan chhuatlaia Parchhingpuii pa lo let reng chu a han hmu a.
.
Lal fapa Raldawla chuan Chalvunga hmel a lo hmuh veleh chuan, a kut chuan thei leh thei lova lo huiin a hmui bula Chalvunga'n a beng a han dawh hnaih veleh chuan "chemteii leh a nu te chu kha lamah khan an hruai ta a nih kha" tia chau thâm chhâl chunga a lo phun sap hnu ah thlamuan hmel zetin Chalvunga chu a han en a.
Chalvunga chuan chutia lawm hmel zeta Parchhingpuii pa-in a en reng lai chu tawrh har a ti ve hle tih hriat zetin a lu chu a han kuai thlè hreta "vawikhat chiah sawi leh hram teh, khawi ral nge ni an nih le"!? a han ti a.
"Lal Dengphunga" tih bak Parchhingpuii pa chuan sawi thei ta hek lo le!
a nupui leh a fanu te tan dama a va hmuh hlauh takin tih a ngaihtuah kai ve a ni tih hriat zeta, thuchah duh la neih hmel zeta a rawn melh leh hram lai chuan "ka lo enkawl dawn nia" tiin Chalvunga chuan 'aw' dam zetin a thlah ta a.
.
Parchhingpuii pa a chah hnu chuan, a tihtur hmabak la awm chu hlen chhuah vat a ngai tih ngaihtuah reng chung chuan, tha tho zet leh thinrim ru zetin Chalvunga chuan kawngkapui lam chu chak zetin a pan thuai a.
Lal muala a chhuah laite chuan, a farnu Hliappuii pu, amah thlahtu Lal Dengphunga leh Sialbuan Lal chhungkaw inkarah chuan a ding ta tih a inhre chiang bawka, thu ṭha lakai tura thupui vai turin a kum bih a la tam tawk lo chu pawi a ti ṭan kher mai!
Lal Dengphunga pasalṭha te chu be pawp thei pawh nise, ani chu tuman an rawn hre ve dawn lo tih leh Parchhingpuii te nufa lak let phei chu a tan thil harsa tak a ni thei dawn tih te chu a hre chiang si.
chutia a him chin zela tlan chunga Parchhingpuii te nufa zawnga a buai hle lai chuan, a pu pasalṭha te chuan an lo nawr let anih chuan Parchhingpuii te nufa tan chuan thih pawh huama hriam lek tur chuan a rilru a siam ta a.
.
Ni lu a rawn langa, chhim daiah fanai Lal Dengphunga pasalṭha te pawh an sal hruai te khalh khawmin an chawl ṭhuap a.
chutihlai chuan, khua a Ṭhi leh Dar ro ṭha zawnga la tâp pasalṭha leh tlangval ṭhenkhat te pawh an rawn thleng khawma, Lal Khawluta te chhungkua leh Sialbuan pasalṭha ṭhenkhat te leh mualkil chhungkaw thum vel chu an tlanchhe hman a ni tih te chu an sawi sap sap hlawm a.
chuveleh an hruaitu pasalṭha pali te chu inrawn kualin, chung tlanchhe ho chu enge maw chen tal va um zui tur insiam an han rawt a.
an rel ang chuan an hotute zinga pasalṭha pahnih chuan, tlangval sawm hruaiin Sialbuan Lal leh a chekawite bibo chu zawn tumin an chhuak ta nghal a.
.
Chung ho an liam chauh tihah chuan, an thlang khaw dai tlak lam aṭang chuan rawlthar lian thelh thawlh, sam dar vaw nghuau mai hi a rawn lang thuta "ral ka ni lova, Lalpa Dengphunga thlâh zing a mi ka ni e" tia rawn ṭawng zawi sap chunga rawn pen hnai zelin chu rawlthar chuan an hotute biak a duh thu a rawn sawi zui zat bawk a.
.
Dengphunga pasalṭha Ralchhema chuan, chu rawlthar chu ral ho nen Lal muala an innawr nât hle laia a hma rawn su awng fur fur tu, a lo chhin chhiah ruk ngei kha a ni tih a hre chiang ta kher mai!
mahse, kha tih lai khan mak tak maiin he rawlthar hian a khawi lam ve ve pawh kha a bitum hmiah hmiah tih a hriat chian avang khan, khawi Lal khaw pasalṭha nge a nih tih kha a hre thei hauh lo kha a ni a.
hetia an Lal Dengphunga chi keu zing a mi nia a rawn inchhâl mai phei hi chu ngaihtuah chian fe hnua thupui lakpui chi chauh niin a hre ta tlat a.
"kan Lal chi chhuah keu zingah i inchhâl mai hi tu khawkha pawm tlak va ni suh! Sialbuan Lal muala i chet lai khan, i pu pasalṭha te chu i thah nual si kha maw"!? a han tih èl deuh ngat a.
.
Chalvunga chuan chupa ṭawng duhdan aṭang chuan, an buai zual laia a hma a ding tur ngeia a lo veh lawk ho pawh an kiang leh duak ṭhin kha a hrethiam ta deuh kuarh a.
"rem i tih chuan, biak fal lawk che ka duh e" tia Ralchhema chu thupui sawipui tura a sawm hnu chuan, "ni ang hmiang, kan naute pathum chu i kut zâlah an tluk avangin kan Lal leh keini a khaw pasalṭha daido te hian ṭhian ṭha thlahin kan thlah liam mai che chuan ring suh khai" la ti ngal ngal chungin pasalṭha Buanthanga chu Ralchhema chuan a hui zauh hnu ah an awm khawmna piah Lungpui lian tak tak insir khupa na hmun chu an pan phei ta a.
.
Lungpui Thlam aia lian lian pahthum insir khup hnuai puk ruih mai a, mipathum ṭhu khawm te chu an thu khel a ril bawka an ṭawng pawh zawi sat sat hle mai!
"Satluaia chu kan Lal Dengphunga hringtu Hrangruma chi keu zing ami a ni a, Satluaia chi keu leh chhawng chu i hre chêk ang maw"!? tia Buanthanga'n zawhna a pek takah chuan, "ka pa pu Hrangchhinga chu in Lal chi zawm a ni" a han ti khauhva.
.
Chu rawltharin an Lal te chi kual dan a lo hre thui em em mai chu Buanthanga leh Ralchhema te chuan mak an tih em avang chuan "i khualpang zin thu bawl ngawt zawng va ni teh chek lo se, kan Lal chuan chu lo chu fiahna la phût cheu ta se i insawi fiah thei ang maw"? tiin la ring zo mang lo tih hriat zetin Ralchhema chuan a han zawt leh a.
Chalvunga chuan inseh ruh deuh rât chung chuan lungawi chiah tawh lo tih hriat zeta a rum deuh nghat hnu ah, "ka farnu Hliappuii kha fanai ho kut aṭangin ka ka hruai chhuaka" tia bul a ṭan leh lai chuan a kut chu Buanthanga leh Ralchhema te chuan a rawn en rang hle a.
.
An Lal tunu Darhliappuii Dar dawhkilh an han hmuh meuh chuan, phawk zeta meng bial kawk kawk chungin Chalvunga chu Buanthanga leh Ralchhema te chuan an melh ngun dun hle a.
an ngawih ṭhap hnu chuan Chalvunga bawk chuan an la ringhlel cheu a nih chuan, fiahna dang a la hriat thu sawi lehin fanai Lal leh a chekawite hming a hriat ang ang chu a han sawi leh ta a.
chuta chinah chuan, Lal Dengphunga pasalṭha te chuan Chalvunga chu rinhlel chi rualah an dah ngam ta lo!
an naute zing ami a thah nual nachhan erawh chu an zawh leh zauh hnu ah pawh, "ka tih makmawh ka ti ah ngai ula, ka pu hnenah chuan ngaihdam ka dil nang e.
chu lo chu thil pakhat chiah ka pu chu ka dil duha" a han ti leh a.
.
Pasalṭha pahnih te chuan, an thu chu a inhmuh tawh thu leh a pu tan chuan a ngaihdam dilna chu pawm harsa anih an rin loh thu te, a thil duh chu a pek mai an rin thu te chu an sawi ta a.
chumi hnu chuan Chalvunga chuan rilru zangkhai takin "in sal hruai Sialbuan Lal tunu leh a nu te hi chu keiman ka veng a nge" tia a dilna pawh chu Buanthanga leh Ralchhema te chuan rem an tihsak ta a.
.
Parchhingpuii leh a nu te'n Chalvunga hmel an han hmuh chuan, an lawm a ni tih chu hai rual lohvin a rawn lang chhuaka an mittui kara lawmna chu Chalvunga tan pawh hai rual a ni lo.
"kei ka awm chhung chuan, nang leh i nu hi in him ang" tia Chalvunga'n Parchhingpuii en ran chunga an tan innghahna tlak a nih zia inringtawk taka a sawi sap lai phei chuan, Parchhingpuii te nufa chu kûn ngaih chungin an insut fap fap mai a.
.
Zadeng Lal Dengphunga leh a tupa Chalvunga te titi dun chu an thutak dun hle tih a hriat hle a.
an sir kil khumpuia Lalnu Darlaii leh Parchhingpuii te nufa pawhin anni putu inbia, kha chen inhre lova awm tawh, mak tak maia inral nawrna aṭanga inchhar chhuak tlat te chu mittui tla ṭeuhin an lo thlir lo thei lo!
"taite, Ṭiau ral hun hnu kal tawh kha chu a liam zo tawha, Zadeng Lal kan ding chang ta ber a lawm maw.
i pute ho leh i pite ho pawh tunah meuh zawng pialralah inngeih takin an lawi thei tawh anga, ngaihdam an dilna 'aw ká' hi kan thlah tute thlengin thlarau chawlh nan an hmang kumkhua tawh ang..kan thu dang a lai chuan, a eng chu maw ka hnena i ngen dawn tak chu"!?
Lal Dengphunga chuan a han ti a.
Chalvunga chuan, a puin a thil ngen duh a piin a hrilh thawi a lo ngaipawimawh hle chu a zah phah deuh viau mah se, tun hi sawi hun tak a ni tih a hai hauh lo, "Sialbuanah khan ka farnu phuba lama kai mai ka ni a. duh se la chuan, an sal man ka nih lai khan an Lal fapa i sal Parchhingpuii pa hian min that thei reng tih a chiang viau a.
ka chunga zahngaihna a neihna kha rulh ka duh a ni ka pu" a han ti a. Lal Dengphunga chuan a ṭawng chhung tawite ah khan a tupa leh khumpui kawma ṭhu a sal tleirawl hmelṭha zet Parchhingpuii te chu a lo melh hmaih bik tlat lo, "pakchhaih khah, keimah zadeng tupa Chalhuaisena ti la, i duh ang tak chuan Sialbuan Lal tunu leh a nu te chu va be tawh khai.
an hmakhua chu i kutah ka hlan e Taite" tih leh a Seki zupeng tlak chu a han rual a.
.
"nang ka nunna chunga thu neitu i ni, i sal ka ni chung hian i tan hna ka thawk dawn lo em ni"!? Parchhingpuii'n a tih zawih sap lai chuan, "sal chuan a pu chu a sal let a nih tak ber hi"! tih leh a kutzunglai chang ti kawm zauh chunga Parchhingpuii chala dim zeta tuk kauh chu Chalvunga chuan a han rual a.
.
Chuveleh a pu Dengphunga leh a pi Darlaii te pahnih an Se no nei thar ena chhuak ta daih kha an rawn lut thuta, "ka tupa Chalvunga chuan, a nun chhan nan huaisen taka THALFANG LEH MILU a châr chat chat hnu ah, hmar lawi Setê rang nalh zet a dan chêp ve tak hial chu" tia nui huah huah chungin a pu Lal Dengphunga chuan a pi Lalnu Darlaii chu a han kiai zuk zuk a.

                                       THE END


TUN AṬANGA REILOTEAH FUTURE NOVEL DANGLAM TAK LEH NGAIHNAWM, A KALPHUNG MIZO NOVEL A LA AWM NGAILO UPLOAD A NI THUAI DAWN. LINK SHARE DARH LAMAH ṬAN LO LA VE LA NASA TAKIN HE BLOG WRITER HI I PUIIN I TI CHAK SAUH SAUH DAWN TIHNA A NI.