THALFANG LEH MILU, BUNG 16

            - Llpa rokhum//Mualkil Tailera pa-in Lal In a luh thlak leh aṭanga tuibur hmuam thum da vela rei hun a han kal leh chuan, zan pawh a rei dawn dawna Lal In thawm pawh a zuai ṭana rei lovah Lal In aṭang chuan an rawn ṭil phak phak a. Lal muala ṭawng seh chilh deuh naka titi chunga a ṭhen inkuah zawr hnep hnawpa kal chunga an rik leh hak hnu chuan, Lal mual chho chu thehmeh reh takin a reh zui ta vawng vawng a.

Chalvunga chuan a thang valh pawh zih mek chu fim takin a ngaihtuah nawn leh hnu chuan, a chung lama Arsi de tuarh chu a han thlir chho vang vanga, zan a rei huna a thil tih tur lah a hre chiang tawka Sialbuan an inchhawm luh laia dai hnai a lo melh fiah hle te kha a inchhir lo hle a.
khawikipah pawh hetia a la tlat ngai lohna hmun a luh apianga a boruak tawn chin chhui let leh par par thei khawpa khawi hmun leh tlang, ruam leh Lui chena a chhin chhiah hman vek ṭhin hian, a chet lakna ah vawi tam a lo puih fo tawh avangin Sialbuan khaw khan, an luh chhoh na lai a bih chiang leh hman khiau pawh hi mualkil a phih awh rual khan a hman ṭangkai dan tur a lo ruhman fel leh hman vek  a.
a duh ang chiaha a duh na hmun khan lama a hruai kawi thei anih zawngin, khawvar rualin Sialbuan khua chuan lu an sun ngei dawn tih chu a rilru ah chuan a nem nghet tawh hle a.

      Chutia a chet dan tur ruahmana Sialbuan dai ram awm dan te chhui nawn leh par par chunga a beng a chhit khiau lai chuan, mualkil Tailera pa sawi ang chiah chuan a mah veng tute chu midangin an rawn thlaka, a mah veng tu hmasa te pawh an liam fel ta tihah chuan, tui zeta mu ang maiin Chalvunga chuan hmai zangthal meuhin a hnar chu a han tum ri kak kak a.
a mah veng tute pahnih chuan chutia an ral sal tang mutui zet chu inbe ru sur sur chung chuan an rawn bih hnai thuai a, ngawi dun deuh run chunga enge maw chen an rawn kun hnaih hnu chuan, "hetia a huai bak lem lo a nih hrim chuan, thimṭin van var tirah kan rawlthar te kai thovin kan ṭin ve mai thei ang chu maw, zing fimah meuh chuan he kan ral sal lu lamna thuam fam kim inbela ka buai a ngai dawn si a" pakhat chuan a han ti bal bal a.    

       Chu pa 'aw' a han  hriat chuan mualkil Tailera pa nen an ruahmanna kha a hlawhchham titih tih chu Chalvunga chuan a hre chiang ta kher mai!
Sialbuan khaw pasalṭha chhuan tawlawl zinga tel pha Lal tupa ni bawk, thapui ngah leh rilru buluk zet a mah ngei pawhin thlurbing tuma rei fe a lo veh tawh Ralthuma meuh chu Tailera te ṭhian dun kha chuan an ek zal dawn lo tih a hre chiang em em mai si. mualkil Tailera pa hian an zanin ral veng thlak tu turte hi an Lal leh a mualkil te an phusak san lutuk aleiah khan midang ruat turin a rawt hman ta lo tih pawh a hre ta chiang kher mai!
chutih laiin, mualkil Tailera pa chuan a chin a rawn hrilh leh theih tawh loh chu achhapah, a tuk thimṭin rual chuan hun dang nghak khawtlai tawh lovin a ma lu ngei chu lam turin an sahawk ṭan ngei dawn tih lah a hre chiang hle bawk a.
a Thang valh a pawh zih fuh tawh teh reng nen, a pawh zih hnan tur erawh mualkil fapa Tailera leh a ṭhianpa nita lovin Ralthuma leh a kawppui pa chu an nih dawn takah chuan, zanin ngei lo hi chu hun dang chhete mah put bo na tur hun dang a nei tawh lo tih lah a hre chiangin a tuk kawl en rual ruala a lu bung riam tura khaw mipui te inlek puk phur tawh mai bakah Lal leh a mualkil te sahawk tawh zia lah a hre chiang tawk viau bawk si. chung te avang chuan a hun neih chhun chu Chalvunga chuan a bawh tho tho a ngai dawn ta tih chu fim zetin a ngaihtuah nawn leh ngat a.
      

      A ruahman lawk vek tawh leh a lo nghahhlelh hun chu bawh pelh dawn mah se, a lo veh ruk ngat ngat tawh Ralthuma ngei a hmachhawn dawn tih a hriat avang chuan, a tiril zetah a zauthau telh telha, hriam engmah a neih loh avang erawh chuan a chet fim a ngai hle dawn tih a hre chiang viau a. chu achhapah, Ralthuma kawppui pa chuan thih ṭih hlek lovin an Lal tupa chu a thlawp dawn tih a hriat chian bakah an khungna rip chhung a ta chu mualkil Tailera pa nen an ruahman lawk anga awlsama chhuah san theih a ni dawn ta lo tih pawh a ngaihtuah kai thuaia.
an ruahmanna buai ta avang chuan, a hma chu eng anga khirkhan pawh nise a sut awng ngei ngei erawh a ngai tawh dawn tih a hriat chian tluk zetin, a hun tlem chhe zet neih ṭawng ṭawng tawh chu rang taka ṭangkai theih tawpa hman nghal zung zung a ngai nghal tih pawh a hre chiang tawk hle a.

       Thingchangvar hun a han kai chhova, Arsi tam zawk pawh vanlaizawlah an insir khawm eng paw ruih ta tihah chuan, a mah veng tute chu Chalvunga chuan la hnar lui sak sak chung chuan a han melh tawn zauh zauhva, a beisei hun erawh a thleng mai bik tlat lo!
a nghawng an thlunna hrui a phelh ruk fo tawh zing khua a var ruala a nghawnga a thlun leh mai ṭhin chu a han phelh da da a, chutah, kutphah pawh leng mang lo khawpa an rawram a tanna rip bang Thingtuai tun an hawlh kalh phui chut hnua ram hrui kezungpui tiat tiata liana an kaih khirh kual leh vek chu pawh thawl tumin, zan danga a tih ṭhin ang bawkin a veilam kil thim zual laia intung bawk chu a han phih leh salh salh a.
helai kil hi a hma aṭang tawha chhuah ruk nana pawh tawlh tuma a lo pawh ruk fo tawh a nih avangin a beisei aia hma-a a lu tan an tum tak si ah chuan, mualkil Tailera pa nen an ruahmanna a tlawlh tawh bawk nen, zanin chu a huai a hama beih a ngai ta hle tih ngaihtuah ran chungin thawm neilo thei ang berin a pawt nawn sek tawh mai a. 
       
        Chutia a phih nawn sek lai chuan a hun hlu zet rawn bawh buai tur chuan Ralthuma te ṭhian dun chuan a tanna bawm chu an rawn lehhawi leh ngur ngura, chuveleh Chalvunga pawh a hnar ṭan leh chiaha tlemin a hnung lamah a han tawlh hrat bawk a.
mahse, chutia a hun chan khiau an rawn bawhbuai avanga a hna kal lai a chawlh phah det chu a beisei loh zeta a tan chetna hun ṭha rawn pe tu a ni ta hloh a ni tih hai rual lohvin, pakhat zawk chu thim zingah chuan zun ram thiar tum tih hriat zetin a liam vuta, chutihlai chuan pakhat zawk chuan a tanna rip chu a rawn hnaih phei surh surh a, an mi tang mutui lai chu a tanna bang Thingtuai hmaia si deuhthaw chuan a rawn bih ta ngur a.

        Chuveleh a ran rang mangkhengin Ngawpui fachuam Chalvunga chuan chupa hrawkphir chu a kut veilam hrawl zet chuan phui hmak khawpa lo rek ping chaihin, a kut lehlam chuan chupa Kawlhnam paina, a kawng hruihrual hren chu a han dap nghal chat bawk a.
mahse, chupa chuan thih tha nena ṭang sai ngat ngat khawpa a kut a rawn hmer let ve ngut ngut chung chuan, thih tha meuhva a pawh let ve reng avang leh a Kawlhnam chu a tluk ruala a inthiahna hrui hrualah fip zeta a invuak veh ngheh sauh avangin Chalvunga chuan a phawi sak mai thei bik tlat lo!
Ralthuma zunram thiar a rawn let leh hma a engkim a tih fel a ngai tih a hriat chian avangin a hun chhete neih chu bawh pelh ai chuan tiin, chu pa Kawlhnam chhip ki laiah chuan a zuk hmet bet thuaia, tlema a pawh hret hnu ah Thiangtuai inramna hrui hnuai lam chu Kawlhnam lu hriam lai chuan a bitum pa rek bet reng chung chuan a zai thei ta hram a.

   
        Thingtuai ramna hrui hmun hnih ami a han zai chah hnu chuan a dang chu zai leh tawh lo chuan, a saisir zawngin leng leh leng lovin a inzep chhuak thuaia pawna a han put chhuah veleh chuan, a lo phih sawp nawlh ruala chupa in a Muzuk fei a thlauh per an piah deuha tla chu chhar tur nge chhar loh tur tih a han ngaihtuah thuak a.
mahse, a tan hun a tlem, mitkhap kar lekah a hun tawn avang chuan a lu a hloh thei reng tih la hre khiau chung chuan, a mi reh beh pa chu leihah chuan a keuh ṭhingṭhi hnawka a Kawlhnam pai bawk chu a puan ven lip filh thla ṭhuau khawpa na chuan a tanna hrui hrual chawp chuan a han phih ta hrawk a.
chupa Kawlhnam inveh behna a phih chah takah chuan, ani thapui nena lo ṭang ve bawk a nih avanga a reh hlum hleih theih tak bik loh chu a lo la chau chhe bik lo tih hriat zetin a rawn zi ṭhul ṭhula, tham chhulin "ṭhiana, ral sal a put chhuak e" tiin Chalvunga'n a reh hrepna avanga 'aw' la chhuah thei mang lo tih hriat zetin a au chhang ta ṭuak a.

         Mi muttui hun lai anih chu achhapah, Chalvunga'n a reh na avanga a hrawk vung phui nghal vek avang chuan a 'aw' zawi zet chu tumah vakin an hre lo tih hriat zetin a reh ngaiin khua chu a la reh ruih mai a.
mahse, chutih lai chuan Chalvunga erawh chu dai tam panin a put pil hmak tawh si! a han au nawn leh hnu chuan Ralthuma chu chak zetin a rawn tlan phuta ral sal tlan chhuah thu chuan a beng a luh fiah ta hle a.

         Chalvunga chuan a hun neih loh a talangin, a bitum pa pawh that hman lovin a tlan ta mai chu pawi a ti ru viau a.
mahse, a bitum pa hi that ta kher se hriam a lek chhung reilote ah pawh hian Ralthuma kha a rawn thleng hman ang tih hlauh na in a rilru kha khatih lai khan a buai ve hman tlat mai si.
 an mahni khaw tualah lehnhgal mi pahnih a ruala a bitum mai zawngin khua mipui zawng zawng an thawmah an rawn harh anga, ani mal ṭan tan chuan a tlan chhuah chuan awmzia a neih dawn hauh loh chu achhapah, at thlak takin a inrawlh hlum mai ani dawn tih hi Chalvunga hian a hriat reng avangin hun remchang inher chhuah hun nghak leh zawk tura a tawlh kian phawt chu a tan thil fin thlak a ni zawk tih a hai lo viau reng a.

         A chet dan a tisual lo tih ngaihtuah ran chunga a luh thlak leh tumna kawrte thim zual zet a thlek zauh lai chuan a beisei loh zetin a chhak mai mualah chuan, meichher pakhat hi a rawn de thla viai viaia, a han hawi zau leh hlek hnu chuan chu meichher chhak deuh fe, chu meichher detna aṭanga mual thumna vel ngawta hla ni awm tur vela meichher dang rawn de thla chuah chuah chu Chalvunga chuan a hmu zui leh nghal zat bawk a.

         Chutah zet zawng an ral sal put chhuak chu Sialbuan ho chuan chuti maia thlaua pil hlen tir chu an tum lo hle tih Chalvunga chuan a hre thiam thuai a, chu ngaihtuahna a put rual chuan a Ngawpui fa hrap hrek hrawk nihna zepui pawh rang takin a rawn chhuak ta bawka a bul lawka maute chang ṭha rel rawl chemfawng tiat vela lian, hlam hnih dawna sei pahnih chu a han chhawk zawka a piah muala a per kai zauh hnu ah a mau lak pahnih chu a zum ṭha sauh sauh bawk a.
reilovah chu mite pahnih chu an rawn thleng thla thuaia, a rin loh zetin pakhat zawk 'aw' thum bul chu a mi huat ber Ralthuma 'aw' a ni tih Chalvunga chuan a hre chiang ta kher mai!
ami rawn hruai erawh chu a kawppui pa kha a ni tawh lo tih a hre thuaia, hriam pawh an rawn lek kim dun hle tih leh mipui ho thlau ngatin huaisen takin an rawn lut thla hmasa ngat tih nen lam a hre chiang viau bawk a.

         Ralthuma leh an khaw Pasalṭha Zatuaka te che vel chuan, an tlak luh lehna tur zawn thlang lama an hma zawn chhuk thla taka Phaipheng buk ri deuh sat chu mi pangngai tana hriat rual loh khawpa zawi ni mah se, pasalṭha beng fing tih takah chu thawm zawi em em chu an man fuh chat chat kher mai!

        Hmui phuna an inbiak zauh hnu chuan, Zatuaka chuan a meichher ken lai chu a thlang kawrah chuan a han theh thla ṭek chuaia, chutih rual deuhthaw chuan a Silai chu an thlang lam hawi chuan a han kau rap bawk a.
chutih lai chuan Ralthuma pawhin Zatuaka chan loh lam chu luh chhuah tumin, an tlak luhna mual chu an chung Ngawpui dur mup kar awng aṭanga khawfing chat tur van var rawn lut thlarin a Silai tin kawh lai en tle zauh zauh chung chuan, thim zingah chuan chan khan rem zawngin an tap mekna mual chu a tan tlang phei ve mek a.
mahse, an duh aia hmain an ral veh lai chuan an mahni chu a rawn ṭhawng hmasa ta mai a! a dinna hma chiaha Perh kuang leh ram hrui hnawk chuan lo la kawi lo se la zawng Ralthuma chu a hma chiah hlam sawm vel leka hla Ṭhang pik kar aṭanga mau fei rawn leu phei puat mai chuan, a thindpah chiang zetin a thil tur hi a nia a vanneihna-in a um pha ta hloh chu a him phah hram tih pawh a hre chiang ve hle a.


        Chu mau fei thlawk tlang thawmah chuan Zatuaka chuan Ralthuma chu rang takin a rawn zawng thuai a, an han inpawh hnu chuan "he lamah, khu lai khu a tap chin ka lo bih zawn hman thial e" tia phun supin Ralthuma chuan Zatuaka chu chu lam thawm ngai chang tur chuan a han hrilh zuk a.
chutih lai chuan an hnung lama mipui rawn zim thla mek pawh an rawn hnai zela, anni pahnih thlen chin chu an rawn luh pawh ve lek lek tawh avangin Ralthuma chuan lungawi loh hmel zeta phun sup chungin an hnung lama mipui meichher nena rawn de thla noh noh te chu a han bih let leh zuka.

         Chalvunga chuan ami khawh a hlah tih a hriat avang chuan, inpet ruh fip deuh nghat nghat chunga a chhak maia a mah veh tute pahnih rawn luh leh na hmakbak mual zawm thla zel chu mautluk sawm dawn, thawm nei lek lova a tlak khalh hnu ah thui lote a vei lamah a han lut phei det a.
chuta ṭang chuan, tlema a tawlh chhoh lek hlek hnu chuan a bul maia a tawmna mual rawn ep chiaha mualte rawn insirna laia rawpuichang rawn ding awn phei du chu kawih pawk tuarh pahin, chak em emin Ralthuma te pahnih tawmna lam pan chuan a tlan chho ta thuak thuak a.

       A rin ang ngeiin Rathuma te pahnih chuan a mau kalpah pawk rik tuar na lam ngei chu a tlan chho thawm ngaihtuah hman lo lek chuan thim zingah chuan an bawh phei ta ngeia, chuveleh Chalvunga pawh chuan anni pahnih tlan ril thla zel chu an hnung lam aṭangin a leh veh thla rang hle a.
a hma lawka chung lama ṭan hmun siama a phe zeuh changa buai Ralthuma te pahnih a chung tlak achinah chuan, Chalvunga chuan khaw rawn eng ṭan mek pawh chu pawisa tawh lo zet chuan ngun thluk zetin anni pahnih chu a veh thla hnai sawt hle a.
mahse, chutih lai tak chuan a piah mai muala mipui meichher nena rawn lut ve mek te zing aṭang chuan "he lamah thawm ka hria e" tia rawn au chhuak thut thawm chuan Chalvunga chu a tum lawk ni miah lovin che thuai turin a nawr ta tlat mai!
mipui te aia tauh hmasak atana a hual lawk ngat ngat a thlang lama Ralthuma te pahnih tawmna lam pan chuan chak zeta tlan thlain, mautlawn thum vela thui a thleng thla chiah tiha na lua awm lova a mau fei a chhuk khawh thlak puat rual deuhthaw chuan, a khawhna zawn a thlen thlakna chin aṭanga mautluk thum vel awrh tura hla aṭang ngei chuan, patling na tuar au khawk rawih rawih ri a rawn chhuak ṭial ta ruah ruah a. 

        Ralthuma chuan tlu mai lova Zatuaka la ding titih si zangphar deuh dara a rum hap hap chu a han bih hnaia, a han hmuh ruaih hnu chuan Zatuaka tai kiar lai, a puan ven a bilhna tai thler tel hawk khawpa chianga a vaibel lu chung chiaha mau fei lut ngur mai chu hmu leh hmu lo chuan phawi a han tuma. mahse, a phawi dawna a han khawih chet veleh chuan Zatuaka chuan zawi tham chhala a hnung lam en fiah hmasa tura a lo hrilh avang chuan, Ralthuma chuan Zatuaka hnung lam chu a han dap chawp hnuhnawh chuk chuk a. 
chuta a thil han dap fuh chuan Ralthuma meuh pawh chu inthing nur khawpin a nghawng na tih hriat zetin, a taia mau fei inthil tlang thla chuan a thlang maia Farṭuah Ui pum rual vela lianah Zatuaka chu a lo kilh bet vu mai tih a hriat takah phei chuan, chuti khawpa mihring kutthlak nâ chu a mak a ti kher mai a.

          Chutah zet chuan an khaw pasalṭha Zatuaka chu dam chhuak chi ziazang a nilo tih chu Ralthuma chuan a hre thuai a, chuveleh thinrimnain a rawn bual zui bulh bulha "heta hi Rallukuaia ka la awm e, i ngam anih hrim chuan min rawn bitum teh khai" tih leh chak zeta ral sal awmna ni awma a ngaih lam pana tlan chhoh chu a rual zui a.

          Chutia Ralthuma rawn au chho mek thawm a hriat veleh chuan, Chalvunga chuan rang zeta kun hniam nghalin "nang zawk maw ka hlah lek tak chu"!!?  tia phun zui sap chungin a Kawlhnam ken chu hniam zetah a han lek pir zui vaha.
mahse, chutihlai tak chuan mipui a ral lehlama vak ri sun sun ho chu an rawn ṭeh phei huka, Chalvunga tan chuan mipui ho chu Ralthuma laka kut a thlak tur dal tu an ni leh ta tlat mai!
Ralthuma rawn au chhoh leh mekna zawn hnai tawh set sawta tlan thlak ve tuma a in sang mar chiah tihah chuan, a piah lawk aṭang chuan Silai a rawn puak de rual dura loh theih lohva per sawn chu Chalvunga tan chuan a ngai ta tlat a. chuti ni lo se Ralthuma lu hi a khaw mite hian an hmu dawn hauh lo tih chu Chalvunga chet lak leh dan fuh zet hian a ti lang chiang bawka, a vawi hnihna atan Ralthuma chu a him leh ta chu a ni ta phawt a.

         Chalvunga chuan, Ralthuma chu han tlak chilh luih sak la chak zek zek mah se, mipuiin a awmna chin an hre chiang tawk tih hriat zeta a zawn an rawn sai fu chat chu bikbo san leh rih loh chi ni hek lo le!
a tum ang chuan Ralthuma chu zuk bawh fuh hman pawh nise, mipui chuan a tlan thawm an rawn man fu tho tho tawh anga, chu achhapah, khaw rawn engin an inveh mekna Nghawpui hnuai chu a rawn luh eng deuh ru ru tawh nen, Ralthuma chu a zuk bawh fuh hmain mipui Thal thlah tawng fuhin a tan tlukna hun a tam ta lutuk a ni tih hre khiau chung chuan, thinrim zeta Ralthuma la au kuk kuk thawm ngaithla chung chuan, "tun ṭum atan chuan a tawkah ngai ila, i lu la turin Sialbuan erawh ka rawn kai leh nghal dawn e" tia phun sap chungin a thlang Ngawpui thim zawkah chuan mipui leh Ralthuma te'n an rawn man fuh theih hauh loh tur khawpa thawm neilo chuan Chawlvunga chu a tawlh pil thla ta a.