THALFANG LEH MILU, BUNG 18

Llpa rokhum//Zanlai a pel chhova, zing Ni chhuak tur zung thlâr kawl rawn var ṭan mek pawhin Sialbuan dai chu a rawn luh lang riai ruai tawh a.
chutih lai chuan, chu zan hahchawlh nana hmanga tui zeta muhil mekte ang lo zeta, a hmabak hlen tura a ralrel valh pawh per tuma chhin khat pawh la chhing lo, Ngawpui fachuam Chalvunga pawhin Sialbuan Mualkil Raldawla Sumhmun a kai fel der tawh a.
.
Reiloteah kawl a rawn eng chianga, a tawmna In khumpui awmna lama patling hnar tlak tlak thawm pawh a ri khat ta pharh a, hmeichhe zi ṭiah ṭiah thawm a hriat zui zauh zauh hnu chuan, a tawmna sumhmuna Ar chhiar  thla zap ri phurh ṭhin chu a Pa khuang vin ṭhak maiin a rawn chhawn ta zauh zauh bawk a.
.
Chutah meuh chuan, a mi chan chuan Zawlbuk aṭang hian ṭhiante hnukhawiah In a pan ve chauh ṭhin em nita ang!? tihte chu a ngaihtuah kai lo thei ta lo!
Lal mual zawn chhova Zawlbuk aṭanga tlangval ṭhen khat te an In lam pana an rawn chhuak leh da da ṭhin chu hmuh hmaih ngai hek suh. Ralthuma thawm erawh khua a en chian riau tawh thleng pawh chuan hriat tur a awm loh chu achhapah, In chhung lama Nu ber zing rawn tho thawm avang chuan Chalvunga chuan a dinhmun chu a ralṭi tak zet ta tih a man  fiah ta kher mai!
a mi duh Ralthuma laka hriam lek a duh ut ut na chuan, a nawr nat tawh em avangin an intawn ngei ngei theihna hmun tur, Ralthuma te sumhmunah Ralthuma a lo hmuak ngat a ni a. mahse, a beisei anga hma-in ani lah a rawn lang ta hauh silo!
a thinrim ngawltawt tlat tawhna-in Ralthuma rawn lan hun nghak thleng turin a nawr tlat tawhsi avanga, khaw eng lan chian hnu tleng pawha Dai lama a püt bo ta mai lo chu a tih sual lian tak a ni dawn dawn ta tih pawh a hre chiang ta hle a.
.
A duh aia thuk a inbarh ta ngei tih chu khaw eng chiang ta lutuk chuan a rawn hril thuaia, In ṭhen khat aṭanga nau ṭap thawm leh Ar khuang te, Vawkpu no chawm laiin tual an rawn luh chhuah ri leh ṭak ṭak ṭhin avang te chuan, a tan Sialbuan khua chu aqlsam taka pût bo san theih a ni ta lo!
Ralthuma te In hi chhim lawi dai hnaihna laia awm ni mah se, Mualkil ta fam chu, an In rawn thlawp zawnga thlang lama In dang dai tama ding te  aṭang chuan, Patling leh Nutling zing tho thawm a hriat chian avangin a liam tur chu tu emaw ber chuan an hmu dawn tih chu Chalvunga chuan a hre chiang viau a ni.
.
Duhthlan leh chuang tur a awm loh chu thuhran, an khaw pasalṭha Zatuaka a thah achin kha chu Sialbuan ho hi an ralkhel atalangin, a mala dai ril deuh lut an awm mang tawh tlat lo tih hi Chalvunga hian a hriat avangin Ralthuma nen hian chuti maiin an intawng mai mai tawh dawn tih a hre chiang si!
chawchah atana a hman ber a farnu lah an lak tawh a hnu hmanah, ani a pût bo zuia ram pilrilah ṭan la-in an pasalṭha Zatuaka a lo that ta mai bawk si te kha an ṭit zual phah ta riau bawka.
an chutih tak si ah chuan, a tum a hlenna tur a nih chuan tiin, Ralthuma chu an tual ngeia luhkhunga thih chilh rap pawh pawisa lova a laka hriam lak hi Chalvunga hian a thlang ta hial reng a ni.
mahse, a enga mah hma a bawh ngawt lovin tuna a ralrel dan zui hian veh hmasaka, a Zawlbuk riak rawn haw hi a lu lo laka thimṭin var chian hma tak taka dai lam pan leh nghal a tum viau a.
chutih laiin, a tum dan leh ralrel erawh Ralthuma rawn haw thei ta mai lo hian a bawh buai zo ta si!
khaw chhak tlang dung tluana Nilu rawn mawn tur zung inkhawh sen suar tawh chuan, duhthlan tur pakhat chiah rawn kawh hmuhin, a tan pawn lam chhuah theih a ni tawh hauh lo tih ngaihtuah khiau chung chuan, ruahmanna thar, ngaihtuah nawn ngai miah lo tur khawpa bawh zui par par theih tur chu Chalvunga chuan a zawng nasa ta hle a.
.
Tualah naupang ṭhenkhat an rawn chai chhuak ṭan ta tihah chuan, In chhung lamah chuan lutin Ralthuma Nu mei lo nun mek chu Chalvunga chuan ngawi rengin a kâ a hnawh sak hnu ah sut banah a khirh bet ta hmiah a.
chutihlai chuan Parchhingpuii pawh a rawn harh thuaia, thawh tuma a rawn inbeng kan lai tak chuan, "ka duh ka tih hunah ka chhuah leh mai dawn che nia" zawi sata ti chungin sut banah bawk chuan a khirh bet leh ta a.
Pa ber Ralthuma erawh chu a la chhin siar siar lai a nih avang chuan, khumpui kawm zapuiah chuan nghet zeta a ban pahnihah a zangthal zawnga a phuar beh mawlh mawlh laiin a rawn harh thut a "nang chu, kan ral sal thlun kha i nih hrep hi! a eng tia hetia ka In chhunga min rawn luh chilh ngam mai chu"!!? tia vin ṭhaka rawn au chungin rawn ṭhut chhuah tumin a han tal a.
mahse, chutia a 'aw' a rawn chhuah veleh chuan Chalvunga chuan ṭawng zui hlek lo tura a vau hnu ah, "i In chhungah hian lak duh ka nei e" tia rum zeta melh ran chungin, hneh zeta a ṭhuai beh hnawk hnu ah a ke lam pawh chu khumpui za ah chuan a khirh beh sak ta hmiah a.
.
Chet dan tur ngaihtuah lawk diam chunga che zui a ni bawk a, rei lovah Ralthuma te In chhungah chuan a Nu leh Pa leh a farnu Parchhingpuii te pathum chu sal beh an ni rang kher mai.
sut bana a inthlawpa an ka hnawh sak tlat chunga phuar beh Parchhingpuii leh a Nu te chu Chalvunga chuan hnai zetah a han bih a, "in hnung lama Hnam hrui ka zawm hi in hmu turah ka ngai a, he Hnam hrui hian i Pa mutna khumpui chung zawna Chûm khi a zawn chhova. Chum nen a inkarah khian Sakuh ka thiata, chu Sakuhah chuan he Hnam hrui hmawr hi a insuih leh a ni. Sakuh leh Chum inkarah khian i Pa Muzuk fei hmawr a tang va va a, in tâl eih a nih chuan Sakuh chu a tliak anga, Fei chu i Pa thinhnunah a zuk bur ngei ang le"! tih leh Parchhingpuii lu chu zawitein a a Pa mutna khumpui lam hawia kawih her sak chu a han rual a.
.
Chuta a thil hmuh chuan Parchhingpuii chu a ti hlau nasa hle tih a hriat kher mai!
Chalvunga sawi ang chiah chuan, a Pa mutna zawn Chum aṭanga ama Fei ngei mai inkhai tle vur maiin, dung chen vela sang aṭanga a pa thinhnun a kawk ngil thla ngur mai chu rapthlak ti takin meng â riai chungin a melh ta reng a.
chutia a melh reng lai chuan "ka duh ka lak hun chuan, engmah dang beisei lovin ka kal ang" tia a thu tawp a hrilh nawn leh hnu ah rappui chung sanga Silai bawk zan chu Chalvunga chuan a han pawt phawia, Thul phenah a va tung bo hmasa leh ta phawt a. chumi hnu chuan, Parchhingpuii chu sawi tura a chin bak eng thu mah sawi eih lo turin a hrilh leh te te a a kâ hnawhna chu a phawrh sak ta a.
.
Parchhingpuii chuan dan rual lohva a mitui rawn far zawih zawih chung chuan, "i duh chu ka hria a ni. eng vangin nge ka u hi i huat em em ni le"!? a han ti zawi sap a.
chuveleh Chalvunga chuan, "i lei kha phût eih suh ka ti maw khah"!? ha chang ṭhial rât khawpa thinbutut chhuak thut chunga a tih zawih sap hnu ah a beng bulah chuan hnai zetah a zuk kun zauhva "i u hi ka farnu Hliappuii, hliam let reng pawh zahngaihna tel hlek lova that duh tu a ni e" a ti ta sap a.
.
Chalvunga thu sawi chuan Parchhingpuii chu a deng nâ ta ngang mai!
Chalvunga'n an ṭhenawmte au tura a rawn hrilh lai pawh chuan, eng tih nachang hre lo chuan a en ngai enin a khur der dera, a Nu tal ngam eih lo ṭap fap fap lai a melh zawk hnu chuan khumpuia a Pa che laih laih lai chu a han thlir phei leh a.
.
A ngaihtuahna ata a harh leh zawk lai chuan Chalvunga chuan a hmai si deuhthaw khawp chuan a lo ngur nasa tawhin, "ti tura ka tuk che chu i ti dawn nge? i u anga i lu ka lak ve chu i duh ve ta law law zawk"!? a rawn tih leh lai tak chuan, a lu chu a bu ve nghauha ring fiah zetin "ka pa Ṭhianglut, ralin min luhkhung e..ka u kha lo lut se, mahse, ka pu leh khaw mi tumahin kan In hi rawn hnaih suh se" tiin a au ta a.
.
Vawi thum a au na ah chuan, mualkil Ṭhiangluta Nupui zing Buh deng chuan Parchhingpuii au thawm chu hriain, In chhunga a pasal Tap zawla a ṭhu lai chu a hrilh vat hnu ah an Lal leh mualkil dangte hrilh turin a han tur nghal vat a.
mahse, an Lal tunu au ri chu mualkil dangte pawh chuan an lo hriat ve hlawm avangin ani hrilh chawp chu ngai lovin Lal Mualah chuan a khawnawt chuan an rawn pung khawm thuai a. rei lovah Ralthuma pawh Zawlbuk aṭangin a Kawlhnam vilik chungin a rawn tlan chhuak ve ta a.
.
Ralthuma leh Pasalṭha ṭhen khat te hian hemi zing hian Zawlbuk mei ai khawmuangin, an In a kai ta mai lo hi vanneihna sang tak a chan phaha Chalvunga Chem lakah an mahni sumhmun ngeiah a tlu ta lo hlauh a.
mahse, a tum tawh bawh tlangin a tana mi hlauhawm chuan a vanneihna chu rawn hmeh mih leh vat tumin a lo la veh lui nget nget mai si!
chu hun inman kai chho zelah chuan, a khawnawta an phili zui phah tak chu achhapah, ralin ama In chhung ngeiah a Nu leh pa leh a farnu te khirh betin a lo hmuak ta tho tho tih chu an In kawt a thlir thlak lai chuan a hre fiah ta viau a.
.
An Lalpa Khawluta fahming koh Raldawla kawta mipui pung khawm luih luih te chuan, In chhung lama an Lal fapa te nupa leh an fanu Parchhingpuii te chu engtia chhan tur nge an hre thei tawh tlat lo!
chu ral chu tunge a nih lah tumah chuan hre hlawm tawh hek suh, "eng kan ti ta nge ni!? kan ṭum lak pal a tluang hlei thei ta lo riau ve ka ti.
kan pasalṭha dai doin ral hriam a tawka, tunah lah ka fapa ama In ngeiah khirh behin a awma. anni chhungkaw tlan nan ralin ka tupa a ngen tak tlat hi ka pawm zam ta lo hle e ka ti" ti thum chhur chhur chungin Lal Khawluta chuan a mualkilte chu a melh rulh rulh mai a.
mahse, mualkil te leh khaw pa ho tan pawh an hun tawh chu chin fal mai chi ziazang a ni tlat tawh lo tih hriat zetin, Raldawla bang âwng ilo fahran aṭanga chhung lam bih fiah tuma hnai dêk an awm apiang chuan "ka u tih loh midang rawn hnaih a rem lo ve..khawngaihin, ka thu sawi hi in ngaichang thei lo em ni"!? tia Lal tunu Parchhingpuii'n thlabar zeta In chhung lam aṭanga a rawn au leh ṭhin chuan, chu ral chuan khawi kil pawh chu a mah rawn hnaih tu an awm leh awm loh thu ah a bih fiah kiau kiau hle tih a hriat hle mai si!
.
Tlangval zawng zawng leh pasalṭha te'n an hriam an rawn lek fur chung pawh chuan, chu ral chu a zam eih lo tih hriat zetin In chhung lama a vei thuak thuak ṭhin chu fiah mang lovin an hmu ngun hle a.
Lal Khawluta lahin a tupa chu a luh vaih zawngin phut eih pawh awm lovin Silai mu a tawnga rinna a neih tlat avang chuan, "he ral hi ur chhuah dan ṭha te a awm chek ang, a chet dan zia hriat a nih loh avangin zuk tek luh zawng mahni lu rawlh na mai a ni e" a ti tlat mai si.
.
A tawpah chuan, Ralthuma rawn lut duh ta lo leh a khat tawka an rawn veh chhen mai chu Chalvunga chuan a ngai thei ta bau lo. Parchhingpuii chu a han din hnaih leh a "i pu mualkil tu emaw ber rawn lut se la, i pa dinhmun kha rawn fiah teh se. chumi hnu lam chu tumah hun dang ka pe thei tawh hauh lo. In hi rawn bih hnaih tuma an rawn lawr leh anih chuan, i pa leh leh i Nu lu hi ka la anga, nang hi Silai lek chungin ka hruai chhuak leh bawk ang che" a ti chang ta rât a.
.
Chuta a duh dan Parchhingpuii'n pawn lam a han hrilh leh hnu chuan, a duh ang chiahin mualkil pakhat hi ṭi dei dawiin a rawn luta an Lal fapa te chhungkua, khirh anni tlat chung pawha pa ber chunga Muzuk Fei a lo inkam zum vur mai chu a han hmu a. chutah zet chuan "i phut ang chu kan Lal hnen ka han thlen anga, chumi hma chuan kan Lal fapa leh a nupui fanaute chungah hian zahngai hram tawh khai. i duh i tih chhung chuan, tumahin kan rawn nawr buai lo vang che tih hi ka tiam ni teh se. mah reng reng se, kan Lal fapa leh a nupui leh a fanu te hi an him pial ang tih min tiam thung rawh khai..i tiam thei a nih zawngin kan Lal tupa hi thu ṭha sawipui tur che in kan rawn tir lut ngei ang" hlauthawng khur hlawk hlawk chungin a ti lawi ta rât a.
.
Chalvunga chuan chu mualkil chu rum zeta melh pah chuan, "ka tiam e, in Lal fapa hnuk leh Fei inkar khi zung khat bawk pawh a tling lova, in Lal tupa chu thu pakhat chiah chin felpui ka tum mai a ni e.
chutih chhunga lo inrawlh in awm anih erawh chuan, kei pawh ka thi anga, anni chhungkua pawh hi tumah damin in hmu leh tawh ngai lo vang" a ti chang ta fak a.
.
Mualkil chuan Raldawla dinhmun hlauhawm zia chu a hre chiang bawka, chu achhapah, a Nupui leh a fanu te chu pa ber tan mangkhawng ang mai an nih a hnu hmanah, pawn lam aṭangin Silaiin ral chu kah chilh ta se, anni nufa thlabar chu an buai lo thei dawn lo.
an chet hlek chuan pa ber chu thisa a ni dawn. heng zawng zawng hi a hmu chiang bawka, hlau khur thlan tlâ bawrh bawrh chunga a chhuah hnu ah Chalvunga Thang valh chuan tu ber nge a phih awh dawn!? tih chu amah Chalvunga ngei pawh chuan a hre phak ta mang lo a ni tih hriat zetin, "ka duh anga i awm avangin nang hi chu i him ang" tia Parchhingpuii chu a hrilh leh sap hnu chuan, a Kawlhnam ken dap hriam lam chu a hriam tawk e maw ti niawm tak chuan a han zût pial zalh zalh a.
.
.
Sialbuan khaw mipui leh an pasalṭha te, an Lal Khawluta te'n an mualkil tirh luh Zachhuma pa thu rawn chhuahpui an han hria zet chu an phili nasa ta ngang mai!
"tumah khan in hriam lek hlek suh u khai, a duh ang ngeia a thu kan zui a ngai e.
he ral hi ni tam lo liam ta maia kan ral sal ngei kha a nih avangin, a rawn êr letin thih ṭih hlek lovin min rawn luh khung a ni a. cheka chekah, ka fapa Ralthuma leh a nupui fanaute hi ka lo chan fai vek ta lo chauh a nih chu le! Taitea hi a zuk lut anga, an thu lak a fuh lo ta a nih pawhin, Taitea hian a pang a veng him zo dawn tih ka chiang e. midang zuk inrawlh chu a rem ṭeuh lo hle dawn tih hi kan hriat khiau angai e.
chuti lo zawng, he ral hian a thih chilh mai duh dawn tih a lang reng mai e ka ti" tia a thu a tih tluk hnu chuan, "Lal tupa chuan, invenna hriam a keng duh a nih chuan a Kawlhnam rawn keng rawh se' tiin min chah tak a sin. hriam keng lek lo chuan kan pasalṭha chu zuk lut lo se a ṭha a nge" mualkil Zachhuma pa chuan a rawn ti leh a.
.
Kawlhnam kenga thinrim khur dut dut chunga Ralthuma rawn lut mek chu Chalvunga chuan chiang zeta lo en chung chuan, "Kaihzawl Ngawpui duk hnuaia Kham kar Puka Nula hliampui tuar i thâh tak khan i lu hi la turin min tir a ni.
ka farnu Darhliappuii thlâ aiah i thlâ hi a vakvai ve tawh ang" tih leh a sam sei nghuau kara Dawhkilh chu phawi a han rual a.
.
Ralthuma chuan Chlavunga thusawi a hriat rual chuan, a hma kum kalta a kha Ngawpui hnuaia a Tleirawl thâh ngawt mai kha a hre chhuak rang ta kher mai!
an sutban nghenga an hnung lama kaih khirh tlat a nu leh a farnu te chu melh zuk pah chuan, "a ni tak dawn maw!?
kha tleirawl kha chhan ṭhate neia ral thaha that ta mai ka ni e. kan ral nêk lai Fanai Lal Darrawta tunu a ni miau mai si a, amah hruaitu nang lah khawih phakah i awm loh chu achhapah, i tlatna mual nen lam a zep teh chai a nih kha maw" tiin a nu leh a farnu leh a pa Ralthuma te laka insawi fihlimna zawng pah deuh rûn chung chuan thiam han inchan ta zut zut a. 
.
Chuveleh Chalvunga chuan la insum tak siin a bulukna chu a thup hram hnu chuan, "pi pute danah hmeichhiate chu sal beh bak thâh kher hi thil thiang ani ngai ang maw"!? a ti hman chiaha, khumpuia khirh beh pa ber Raldawla chu a rawn tal phut a "nang hian hmeichhia ah pawh tleirawl, i farnu rual lek lehnghal hliampui tuara tlu zawi reng lai i that a maw!!?
Ralthum, ka chi keu i ni lo tawp ang ka ti!
i chet hnawk zûlin min um pha a, ka Muzuk fei ngeiin hawlh chilhin min tin reng hi en rawh khai. fanai Lal te nen kan kum hma lamah khan tual thu chhia eng ual kan nei lo ve. i pu nen in phiar hnawk rah kan seng lek a nih zaw mah hi" a rawn ti vin tuarh mai a.
.
Ralthuma chuan a Pa Raldawla chu a thu hriat a fuh loh thu a hrilh sup sup lai chuan, nu ber lah a rawn ṭeu ve phata, a kâ hnawhna chu awm lo se a ṭawng ve hial ngei ang tih turin a mittui chu a tla zawih zawih mai a.
chutihlaiin, Parchhingpuii lah a pa lo thlawp turin naupang chhia mai a la ni bawk si, "ka u, ka pa rilru hi i va han hliam nâ ta em" tih bak sawi hlei thei lovin a ṭap zawih zawih reng mai bawk.
pa berin thudik a sawi khum sak sak chinah phei chuan, Rathuma ṭanna chu Ui benga hlin tur awm lo khawpa phêt a ni tih Chalvunga chuan a man chiang ta bawk a, "i nun rawn rah chu i seng ngei ang" tih leh a Kawlhnam fawng vawn ngheh sauh chu a rual ta salh a.
.
Ralthuma tan ṭan han khawh vak ngaihna a awm ta lo. chutih laiin, fate na na na chu che rawngra viau tawh mah se, tu emaw kuta an In chhung ngeia thi tur atan chuan a pa Raldawla chuan a ngaingam ngang lo tih hriat zetin "taite zahngai tawh khai...i farnu nun thleng nan chuan ka Ro, ka Ṭhi leh Dar, ka Sial zawng zawng pawh ka  kal tir mai ta'ng ka ti" a rawn ti thâm ta ṭiak a.
mahse, Ngawpuite Fa duat rawn Chalvunga tan Ro ṭha-in pawimawhna a neih loh chu achhapah, nunna chunga inngaihdam nan eng Ro ṭha mah hi a tling tawk tlat lo! "thisen chuan thisen vek a phût ṭhin' Ralthum, i inpeih maw!? he hun hi ka nghahna a rei ta viau e" tih leh kûn dâh chunga Lal tupa leh chu In neitu fapa chuam Ralthuma veh phei chu a han rual ta a.
.
Lal fapa hming koh a nih bakah mualkilah pawh a filawr ber a nih avanga a In pawh Lal In tiat zeta lian leh zau chhuatpui hnûm phei zur maia, a fapa leh an ral sal chetze hlauhawm zet inveh mekte chu Raldawla tan chuan fate rin a har nen, zam a awl viau ang le!
amah mai bakah a nupui leh a fanu duat ngawih ngawih te'n an In chhung ngeia thisen chhuak an han hmu tur te chu a ngaihtuah pha thawkhat tih hriat zetin "vala, zahngai zahngai...khuanu mit hmuhah meuh pawh a rapthlak lua dawn e.." tia a rawn ṭawng chhuak leh hram pawh chu rawlthar pahnih inveh mek te chuan hria awm pawhin a lang tawh si lo!
Ralthuma lahin a basa ngam atalangin, he an ral sal hi a that anga a pa leh a nu te chu simna thu a tiam liam zui thei mai turah a ngai diam tawh bawka hneh ngei chu a tum ruh hle a.
chu a ngaihtuahna chu ngaihno a bei lehzual theih nan "ka pa, he kan ral sal dawt bawla i tluk teh ei chu le" tiin Chalvunga veh chung chuan a thiam thu chu a han chhak chhuak leh sak a.
.
In chhung lama ṭawng vin zawi zet zet si an hriat rei ruaih lai a ta tawh Uite vawih khum ang maia lo phi cheng Lal leh mualkil te, mipui zawng zawngte chuan, ṭawng ri a reh a khat deuh hnua awmze nei zeta chhuatpui ri kual ṭhiap ṭhiap ṭhin chu phawk hrû leh thaw dep dep chungin an ngaichang lo thei tawh si lo!
an zuk luh ve ngawt dawn chuan, an mualkil Zachhuma pa leh In chhung lama ral thu inremna kha a bawhchhe hmasa tu an ni anga, an Lal fapa Raldawla leh a nupui fanaute chu an thi ngei dawn tih an hre chiang si!
chhuat ri kual ṭhep ṭhep ta mai te chu a tu a mah chuan enge a niha, eng khawsakin nge In chhunga awm te chu an khawsak tih reng an hre ta lo hle mai bawk nen, Phung hmu phawk taka phâwkin hun lo kal tur chu an nghak tawp mai a.
.
Rei lovah chu an hun nghah chu a fiahna a rawn lang thuta, an rin loh leh an beisei ni miah lovin In chhung aṭang chuan, Kawlhnam inkhak ri ziau puat puat leh mipa inhrosa thawm a rawn chhuak thuta, chu thawm avanga hlauthawng zeta an au tuarh tuarh laia Kawlhnam inkhak ri vawihnih an hriat leh hnu a vawithumna a rik leh puat rual chuan, an Lal fapa Raldawla kawngkapui nam tawlh insawn phui tlat chu a rawn ri tuarha Kawlhnam a rawn lawr tlê nghal puat mai a!
Chutah zet phei chuan, In chhungah chuan hai rual lohvin an Lal tupa Ralthuma leh a chhungte sal khirh tlat tu chu an inbitum ta ngei tih chu tumah chuan an hai ta lo kher mai!
rei loteah phei chuan, khawilai bang mai aṭang pawh chuan, Kawlhnam chu a rawn lawr zing tulh tulha chhuatpui te chu a inphawk zui ûr ûr ta mai a.
a karlakah an Lal tunu Parchhingpuii ṭê thawm khawngaihthlak zet leh thlabar em em ri a rawn chhuak bawk, rawlthar pahnihte invau thawm pawh a ring vin ta ṭhak ṭhak hle a.
.
Chalvunga chuan bangrel tlawh chhana inperh auh pah chuan, Ralthuma Kawlhnam rawn vai phei lai chu hnung zawnga a lak leu zawk rual deuhthaw chuan, a Kawlhnam chu Ralthuma kerek chen velah chuan chhuat hrulah a han vai thlawk puat a. Ralthuma chu a lo zuang zauhva a tlak thlak leh hnua tlema a tawlh hnun hret lai chuan, Chalvunga chuan vai fuh ngei tumin rang zetin a bawh phei leha, a duh ang tak erawh chuan a Kawlhnam chu a vai chhuak leh ta bik tlat lo!
Sutban thlawpa Parchhingpuii phuar khawng reng chu a vai fuh ai chuan tiin, a Kawlhnam chu Chalvunga chuan a la lêt thuta chhuata leh vir zauh pah chuan pathlang lam hawi chuan a lum thla ta vat a.
chuveleh Ralthuma chuan "ka In chhungah ngei min rawn lawi khung chu'h" tih leh nâ taka rawn chhuk sâh chu tumin, a rawn chhip thlak ngheng mai a.
chuveleh Chalvunga chuan, Ralthuma Kawlhnam vawnna kut chu a rawn kalna tur zawn  a lo hre thuaia, leh sawnna hman a awm dawn lo tih hrethiamin a nak veilam lo do ṭalh tu Tuium chu rang em ema phawiin, Ralthuma Kawlhnam rawn tle thla puat melh zawk chung chuan hniam zetah a han vai fua a.
.
A Tuium vaiin ná zeta a kerek a hlawi kân ṭhawh ruala chhuat dap auh ri tuarh khawpa chhuatlaia Ralthuma a tluk ṭhuai lai chuan, Chalvunga chuan a Kawlhnam chu ṭhingṭhi ti tiha tawlh chho vat chung chuan, Ralthuma chu chhip thlak fuh tum chuan Chhuat tlang thla zawk zawk khawpa nâ chuan a sât chho hmiah hmiah mai a.
mahse, Ralthuma chu a rilru a la fim tih hriat zetin a lo tawlh chho zela, din chhuahna hun erawh a tan a awm lo tih hriat zetin Chalvunga Kawlhnam chuan a rawn vai zawn thei hle mai si. Dawhthleng thleng rawka an innawr chhoh hnu chuan, duh ang taka che thei ta lo ve ve chu intiam rual niawm takin an ding chhuak rual ṭhawta, chuta insah fuh tuma Tap zau hek hawka an han invai leh zet chu a rapthlak ta kher mai le!
Rappui chungsang chung lama zupui bilh lai bel tam fe te chu an vai kêh chuai chuaia a rel nen lam Rappui chu a chim thla ur ur tawh mai a.
.
Chuti taka inthah ngei tuma ṭanga thinrim vawrtawp chunga innawr an han nih chinah chuan, an rilru fim pawhin tlin loh lek lek chang a nei ṭana Chalvunga ke phêt insiam rem leh chiah ṭan lâ tur chu Ralthuma chuan a nang fuh zauhva, a Kawlhnam a vai rual chuan thisen a per ta chuai a.
.
Chalvunga chuan, a darpheng dinglam thler peh thla hawk chu a ṭuan tifum tu atan hman a rem lo tih a hre chiang bawka, a thâ nawr pawh a fimkhur ta telh telh a.
mahse, Ralthuma chuan a pawnga puiin a rawn bawh zui duh ta tlat lo.
tlema hnung tawlh leh hret chunga a insawn rem leh dawn lai chuan, a tum loh zetin an chhuat sah awng thliah thluah tawhah chuan a tlahawlh zui leh nghal bawk nen, chutia a tluk lek lek laia Ralthuma Kawlhnam rawn vai  phei leh chuan, a lu chu phel phawk khawpin a rawn sât fuh teuhin a sam chhawl leng chhum ṭhawt chu a hmu chiang hle a.
.
Chutah zet chuan, Ralthuma chu a veh dan a thlak vat loh chuan ṭan hmun hniam lamah a êk lo lek lek ṭan tih chu Chalvunga chuan a hrethiam ta riauva, rang taka khumpui ril lam hawia a tawlh zauh hnuah, a ke veilam a theh chhuak leh thuta a rin ang ngeiin chutia a ke a theh chhuak lai chu Ralthuma chuan a rawn zuan ta chat bawk a.
chuveleh Chalvunga chuan, Ralthuma rawn zuang lai chu a piah deuhah a leh phei san thuta bangpuia Thlengpui lian zet intung tlanga a inperh kan zawk hnu chuan, a tlak leh rual chiahin Ralthuma rawn inlet vir phei lai tak zawnah chian a Kawlhnam chu a vai phei ta puat a.
.
Ruh tliak tuarh leh nâ tuar ṭe ṭhawt riin In chhung a luah lai chuan, Parchhingpuii pawh a ṭe tuarha a pa Raldawla lahin lehlam a hawi rang hle mai bawka!
an mahni chhuatpui ngeia a nak kaw huau aṭanga thisen phuan lar zet zet rawn inhawrh chhuak hawk hawk chunga, ama Ril rawn baw chhuak zûih mai Ralthuma'n a pawm khawm ṭu lai chu tumah chuan an en ngam ngang lo!
.
Chalvunga chuan, Ralthuma thih sual la inleng fuih fuih lai chu hnai zeta a zuk bih ngawih ran lai chuan "a tawk viau e" a tih sap hnu ah Parchhingpuii te nufa-in an hmuh loh nan Thul phenah Ralthuma chu a hnuk lut te te a, a chin ṭhan dan bawkin a hapui chu zei zetin a khawn bal sak zauhva a puanven karah chuan a bilh tel ta than a.
chumi hnu chuan, a lu chu tan lehin amah Ralthuma puan ven hmawr lam chu a hlepa chu chuan a fun ta a.