CRYSTAL HILL, BUNG 4

CRYSTAL HILL, BUNG 4
💱Recap
Joani message tur chu a type leh zung zunga "naktuk chu khawiah mah kal bo lovin, i room ah inkawm mai mai zawk ang hmiang" tih chu a tawp nan tum nei ranin a send leha, Joani'n a lo delever veleh chuan, a zangthal zawngin a Khumah chuan a let phei thaka a maimitchhing zui ta vang vang a.
.
Llpa rokhum//Room tukverha dak vang vang chung chuan a sir ding lama ding Joani chu Rafela chuan a han melh zauhva "i search hmuh tawhsa kha print rawh le" a han ti zawi sap a.
Joani chuan Rafela thil duh chu a ngaihna a hriat tawh loh em avang chuan, Mizoram leh Myanmar state boundary a save sa zawng zawng Computer file-a a dah luhsa chu a han print thuai thuai a, chutia a phet buai laih laih lai chuan chung map te chu engatan nge a tih!? tih chu a zawt awl lo bawk a.
mahse, chung a zawhna zawng zawng chu Rafela kâ aṭang chuan chhanna a dawng chuang tlat lo! 
thil dang daih a ngaihtuah tih hrat zeta Rafela ngawi reng lai chu a rawn hawi phei zauhva,
"ṭhian hovin ram dangah sum tuaka kal ve kan tum a sin" 
a thu rawn sawi teh daih chu Joani chuan a hrethiam chiah lo tih hriat zetin Rafela chu a mit meng mawi zet chuan a han melh kala, a thil tih lai chawl meuha ṭhut ṭhat sauh paha a thawk a lak hak hnu chuan "in thil tum chu i Pi peh Pu te'n an rem tihpui dawn che em ni"!? a ti ta sap a.
.
Joani hian a thlahlel hle tih hi Rafela hian a hai hauh lo!
a ngaihzawng hlui tam ber te aiin ani pawh hian a ngainain hmelṭha a ti bik hliah hliaha, a mize nu zâm mai leh a pian nalh zet, siamtuin duhtawka a duan ang maia a lian lai tur leh a vawng lai tur vawng taih mai te, a kawh lai tur kawh lah mai te leh a fêk lai tur siam chawpa zût mam leh hlarh ang maia fêk rât te, a vun ngo no paw phek mai leh a sam sei dum hlap mai te hi a mizia nen hian a inchawih zia a hai bik hauh lo. a mithmul er sei sang mai chawih zeta a mitmeng nalh zet leh a hnar sang vehvawh thlawp chawih em ema a kareh mawi zet ti itawm zual tur tinga a hmui sen vam hiam mai te, Lasi te zinga tualchai ṭhin niawm fahrana mawi Joani ngei hi a vei ber a ni tih hi Rafela hian a inhai ngai hauh lo. "mipa fa chuan, mawhphurhna sang zet kan neia i la hrethiam ve mai ang" tih zawih sap paha Joani a han melh leh ran lai chuan, Joani chuan a thinlung chhung ril zet aṭanga a rilru no rawn tawt up up thup tum ve hram hram chung chuan, "engmah ka duh lo" a ti sep a hnuai lam a bih ta vat a.
.
Rafela chuan Joani thu sawi tum mah se a sawi leh ngam tak loh chu a lo man thiam leh hman veka, nui sak chunga Joani chu a pan hnaih hnu-ah hnai zeta inringtawk zet chung chuan enin "in chhungkua hian mamawh dang in nei hauh lo. 
kei erawh chuan hmabak ka ngah a ni" a han ti leh a.
chutah meuh chuan, Joani chuan a thinlung chhunga a mah rawn tur tawt ap ap tu chu a thup hlen thei ta ngang lo "pawisa chiah hi i hlimna em ni Rafel" a ṭah a chhuak tawh ngang bawka a 'aw' pawh a no nalh zual kher mai!
"mahni nupui man tur pawh nei zo lo ka nih hi i hria tiraw!?
mipa chuan, kawppui a neih hmain a mah intodelh a tum hmasa tur a ni" Rafela'n a rawn tih leh lai te chuan, a mit meng mawi zet phena a mittui rawn hnam ṭiam ṭiam chu Joani chuan Rafela'n a hmuh hlau tak chuan lehlam hawiin a hru fap fap a.
.
Eng ang pawhin dan tum dawn mah se, Rafela zawng mipa luhlul leh Sehhel a ni tlat tih hi Joani hian a hai hauh si lo, kum an inzui tling tawh chung pawh hian amah a hmangaih thu leh a duh thu lah a sawi rik duh loh chu thuhran, ani lah tleirawl zakzum rual lek nita chu a duh ngawih ngawih a ni tih te, a vei em ema a nunphung thlengin a buai phah fo tih te hi a sawi ngam teuh si lo!
an inkawm laia Rafela'n hmeichhe dang a message lai te hian thinrim em emin a lo insawh nasa thei hle a.
mahse, chutia a insawh tau ve nghang nghang lai te chu Rafela chuan hre awm pawhin a lang ngai bawk si lo, a lungawi loh em em lai pawha Rafela'n nuih sak paha a han biak hi chuan a rilru a hlim chawpchilh leh thuaia a nui leh seih seih lo thei ṭhin lo a ni.
.
Mahse, tun ṭuma Rafela'n a thil mamawh tih tir chunga ram danga hna zawng tura a kal tur thu a sawi zet hi chu, Joani hian a dawngsawng thiam lo hle tih chu a awm danah hian a lang chiang hle a. inthup duh si ni dang zawnga a tauh ruk ṭhinna aia thu danglam a nih avang erawh chuan inthup a har a ti ṭalh ṭalh hle tih hriatzetin, "nakin hun aiin tun hun hi ka ngaihtuah daih zawk" Joani chuan a ti zawi leh sap a.
Rafela chuan Joani awm dan chu a hmuh ruk khiau avang chuan, rilru dam zawka an inthlah theih nan enge maw tak tih sak chu a ṭha viau tih a hriat avangin "tuesday ah hian dinner kan ei dun dawn nia. tun atan chuan, kan thil tih lai hi i zo thuai teh ang" tih leh Computer hma a ṭhut chu rualin hmanhmawh zet zetin a map mamawh tur awm dang la awm thei tur chu a search leh ta zung zung a.
.
An ṭhian hova dinner an ei ho fona ṭhin Aizawl tlak lam hmun thengthaw zeta Spot pakhat, open air pool in a hual chhuah chiata couple te te a hmun tina dinner kil fir fer te zingah chuan, tlak lam bera ṭhu dun rawlthar leh tleirawl hmel ṭha dun zet leh inhmeh em em te chu tupawh chuan an melh bing ngun hle a. midang zawngin an en leh zauh zauh ṭhin tih chu anni pahnih chuan ngaihtuah lek lo chuan, ngawi rengin an ei in tur inchhawp hrang hrang te chu an spoon ken lai chuan an ei mial mial a, an chezia ah chuan helhkamtu enge maw an nei ve ve tih chu hai rual a ni lo! mipa zawk chuan a bula soup a han lem khalh hnu chuan a hma a ṭhu chu fiah zetin a han en a "mamawh i neih chuan sawi zel rawh aw" tih zawih sap pahin a spoon bawk chu a ban leh nghal zat a.
.
An ei kham thleng chuan Joani chuan Rafela zawhna chu a rul tawk baka a chhan lem loh avang chuan, Rafela meuh pawh a hrilhhai ve lek lek tih hriat zetin Joani dara kuah chung chuan a kal ngawi ve hmiah hmiah mai a.
mahse, chulai hmun aṭanga an inphurh chhuah hnu khua a tlai chhiat hma a, a chhungte ngaihdan a nih loh palh hlau zeta ama room a Ni tlak ruala a thlenpui leh hnu chuan, "ka sawi reng kha, ka dinhmun hi a laklawh viau a, mahni intum chawpa mipa chu chhuah ve reng reng a ṭha ka ti, ka rilru ka thlak thei tawh lo" tia phun sap sap chungin Joani room verandah thlang lam railling ngheng chuan a ding awn deuh da a.
Joani chuan a zahzumna zawng zawng chu dah bovin a thinlung chhung ril zet chu phawrh vek law law chu duh viau mah se, mipa ah pawh rilru luhlul Rafela lung chu a kuai thei chuangin a ring silo!
a tum ṭhulh tir thei chu engmah a awm dawn lo tih a hriat chian avang chuan, ṭah chhuak zet chungin a insum hram hrama khawi rama kal nge a duh tih te chu a zawt thei ta hram a.
chu zawhna kher kher chu Rafela chuan thudika chhan chi a ni hauh lo tih a hre chiang bawk a, a kal duhna ram chu tu hriat chi a ni lo ti a ngaihṭha lo zeta siam ai chuan tiin "Mumbai thlen phawta chuta ṭanga ram hrang hrang job tender list en mai chu ṭha-in kan hria. flight ticket lak chu ka ui deuhva Train in bul kan ṭan mai ang chu" a han ti liam puat a.
.
A rilru chhung rilah Joani laka a inpha kual chu inthiam lo zet mah se, tun atan chuan chutia tih bak kawng dang a awm lo tih chu Rafela chuan a hre chiang si! a hlauh ang ngeiin Joani'n train a kal ai chuan flight tricket lak sak a duh thu leh a mamawh zat pawisa chu sawi tura a nawr zui takah meuh chuan, a rilruah hmeichhe sum hmanga inlek kual duh reng reng lo chi a nihna chu a rawn lian zual thuta "ka nei ve a lawm, ka han fiamthu mai mai a nih kha flight tricket pawh ka la fel tawh e" tia a phat leh zauh hnu ah "kum 3 bak kan thang lovang, ṭhian ṭha chu kan inhmu leh nge nge tho tho dawn a lawm le" a ti awlsam leh ta êt a.
.
Ni 27 zirtawp ni tlai lam a ni a, Rafela chuan a phone-ah zawi raiha ṭawng chung chuan, a Pu chu dam ṭhat thu leh a tuk zing takah an ṭhian thuma an chhuah tawh tur thu chu a hrilh zung zung a.
a Pu chuan rem ti chiah lo mah se, Rafela sawi chu thu ho mai mai a ni ngai lo tih a hriat avangin ṭha taka kal tluang tura a duh thu te, khawiah pawh awm se Pathian malsawmna leh venna a Pi nen ṭawngṭaina ah an lo dilpui reng tur thu te chu a rawn hrilh let sar sar a.
Phone a dah hnu chuan Rafela chuan a vawikhat nan, a Pi leh Pu te chu dawt a hrilh tak avang chuan nuam lo tihna enge maw tak chu a nei tih a hmelah chuan a hriat theih hial a. mahse, a ruahmanna chu a ti lo a nih chuan, thing tlang lamah a Pi leh Pu te chu a fin anga an tan harsatna a siam zual ting dawn tih te, a mamawh ber Tiger brain lah chu a tan a harsa zual ting dawn tih te chu a hre chiang a, chung te avang chuan a thil tum chu chhungte tana harsatna a vai kian sak theihna ṭha ber nia a hriat avanga ti a nih thu te chu hre nawn lehin, ani tan lah hnianghnar zawka a thil duh ber a hmuhna tur a lo nibawk nen, thil dang ngaihtuah tawh hauh lova a tumna chu rilru nuam taka ti tura a inbuatsaih sauh sauh chu a tan a ṭha zawk tihah chuan a innghat fel ta thlap a.
.
Zanlaiah chuan, an ṭhian thum chuan an chhungte ṭheuh an hmin fel tawh bawka tiin Bibi-a room ah an inkalh khung sauh sauhva, an tana thil pawimawh ber khawchhak lama Mizoram state boundary map chu an study ho leh ta a.
.
Map ah chuan, mizoram rawn hnaih ber myanmar ram chhunga khaw lian ve deuh chin awm te chu an han en ho leh a, Tonzang leh Falam bakah Hakka leh Thantlang te chuan ril deuh zawk aṭangin an rawn ep viau tih chu an hre chiang viauva.
South west lamah Mantupi leh Paletwa te chu ei tur chhek tur lam nan a rem dawn riau tih an hre chung chuan, myanmar ram lai taka tan tlang ruah tu Luipui lian em em irrawddy luipui leh chung khaw hnih te inkara khua te chu a inhnaih hlawm viau tih an hre tlat mai a!
hei vang hian chhak lama awm Tonzang khawpui lam hnaiha luh chu ṭha a an hriat tlan hnu chuan, irrawddy luipui dung chhim lama khawpui pahnih Kalemyo leh Mandalay pawh chu Tonzang nena kar tawn nan chuan tawk tiu teu viaua an hriat avangin, he khaw thum hi an awm hmun khuar tumna state boundary lai chiah aṭanga hla lutuk lo vek a nih avang hian, a ṭul changa kar tawn kual nan a ṭha hle dawn tih an hriat avangin an duhna hmun tak chu an ṭhian thum chuan an lung tlukpui viau a ni.
.
An awm hmun khuar duhna hmun hi chhak lam aṭanga an thil duh rawn tawlhna kawngpui ber a nih tlat avangin, Rafela thluak ṭha zet hian an mamawh tur chu a lo lam khawm rang kher mai a.
ruihhlo an rawn tawlh luhna kawngpui kal dan chin nen lam a hriat chian avang hian kawng dangah tawlh tho mah se, tuna an inkhuar tumna lai hi khan ṭha ber a ni tih a hre thiam tlat mai a.
Irrawddy luipui chhak lam aṭangin irrawddy luipui dungah zanlaiah te Lawngte-in an rawn tawlh thla a, hmar lam an rawn luh thui fe hnu ah Tonzing leh a chhehvel khaw ṭhenkhata an agent te lo delever leh turin vau kamah uppet ho chuan an vawrh phawta, chuta ṭangin irrawddy luipui dungah vek chuan an let chho leh ta ṭhin a ni tih te pawh Rafela hian a hre chiang hle a ni.
.
An ruahmanna fing zet chu a tawpna an rel fel thawkhat bawka, zing lam dar 2:00am velah an chhing seka dar 4:20am velah tha tho zetin an tho leh vek a.
Bibi-a leh Zela te chuan an Bag ah Dagger ṭha zet zet an dah ṭhat khiau bakah, Rafela chuan a Pu Pistol Cz75B chu a peihsa at bawka.
an chhungte ṭheuhin an insawi anga kal tak tak tur emaw an tih avanga pawisa tlem chhe lo tak an pai ṭheuh nen, a hma fe aṭanga an lo inlam lawk Savuna siam lam thuamhnaw lum a tam thei ang ber nen mahni Bag ṭheuhva inbeng puar alh chung chuan Airport lam pan tum niawm taka tukṭhuan ei kham dar 10:00am vela an chhuah hnu ah, Aizawl hmar lama Rental office pakhatah an lut diaka an Motor hman duh an la fel vat a khawchhak lam panin chak zetin an tlan liam ta a.
.
Mizoram assembly boruak inlumleh dan chu a sosang nasa hle tih hriat zetin, house member za ah sawm pawh tling phalo Lusei pa pali, LPW party oppose lama ṭhu zinga Lusei ze hum tuma ṭan khawh reng ṭhin Pu Ronghaka, Pu Siamliana leh Pu Zosanga te chuan, CM mizo leh Hindu thisenin a din Chandra leh a ui pa rual a tam zawk Lusei leh chi dang inpawlh thisenin a hrin te duh dan, Mizoram hmar lam thingtlang khuate chu a tam zawk khaw khat rem chang deuh laia pem khawm tir leh, an hmun hlui chu an ram chhunga rawn luh dil hnam dang ral tlan leh hnam te zawkte tana awm hmun khuar nana dah chu an hnial nâ ṭhak ṭhak hle a.
mahse, state ho tu lu pahnih CM leh Governor Gautam te chu chi khat an nih piah lamah Lusei ho ram nawk ral vek duh mi ve ve an ni si!
Lusei pa tan chuan an thu chai lai chu hneh a harsa chho tulh tulh dawn tih chu a lang chiang hle tawh a.
chu an thu khel khirh zet tih tlang tum chuan, CM Chandra phei chu a rak nasa-in "hamaradesh ah hian hnam hrang hrang kan zalen tur a ni a, state bil chhunga hnam bil tia inlak hran hi Danpui kalh a ni" ti ngul ngul chungin Danpui tlawh chhanin Central a lo hmin daih tawh tih a thusawi duhdan aṭang ngawt pawh chuan a lang chiang viau mai a.
ṭhutkhawm an han ṭin hnua Pu Ronghaka'n rilru nâ zeta Lusei ram tlu hlum lek lek tawh chungchang ngaihtuah reng chunga kawtthlera hnam dang leh thlah pawlh inthlahrung lo zet maia an lo zi hut hut lai a thlir vang vang laia, "kan rorelna fung vuantu hmasate sum bawihah an tang rei lua a ni e. hun tam tak an neia, kan ram leh kan hnam humhalh aiin mahni pumpui chhah hnawh puarna tur ngawt an zawnga, hnam dangte laka kan ram chhung ngeia Lusei hnam te thisen a luan pawhin kâ ṭhui pin sak ang maiin an ṭhu ngawi hle hle ṭhin si!
kil tinah hnam dangin an rawn nek sawr chang lahin an beng dar a kêh ta emaw tihturin an bengngawng hawi mai mai a, khuavang ramri kham chin pawh sât thar ngam reng reng va awm suh!
an chutih laiin, hmun changkang zawka zirna leh thiamna bel kan Nula hmelṭha ṭha te'n hnam hnukpui tan a pawi em em a ni tih ngaihtuah duh hlek lovin, thisenin hnam chi an lo pawlh dal nasa telh telh mai bawk si a. kan tlangval thâ chak tak tak te'n ruihhlo ngaih ban tikni nei lovin, an thlah keini ho tana ram leh hnam lo vauh lawk thei khawpa chakna hi nei bik bawk hek suh le!
tunah meuh zawng, kan rorelna Inpui sang ber pawh ralin an hneha, Lusei Lu la hnam chu tih tlawmin kan awm chiang ta bal tih hi kan vawiin hun hian a va hril chiang tak em" tia Pu Zosanga kûn ngâih hmelah chuan lungchhiatna nasa em em hmel a chhiar theih ta hial chu a en ngawih ngawih mai a.
.
Ani lah taka, sawi tawh angin he ram tereuhte a chhunga cheng hnam duhawm zet rinawmna, tlawmngaihna, huaisenna te'n an pi pute hun lai aṭang tawha an lo cheimawi hi kum 2070 an han chuan chhuah zet chuan, hnam tia chhiar tham an awm tawh mang loh nachhan hi a inṭanna a ril em em a.
an pi pute chu hnam huaisen Lu la hnam ti a chhal ni mah se, hmelma lakah lo chuan nunze mawi leh huaisen em em Khawvelah pawh Tuipral thlenga vun ngo ho pawhin an hrilhfak khawpa hnam ze mawi an ni a.
an History ah te reng pawh Khawvel hruaitu huaisena chhiar Hitler te, Nepoleon bonaparte te ai pawha pa rothap Lal leh Pasalṭha nei an nih zia te a chuang keu kuau a, ral lu an lak mai duhtawk lovin riam takin an han lâm khum zui ta mai ṭhin te chu hnam huaisen tia an chhiar hnam kawlh dangte zingah ching an awm ve mang tlat lo! Khawvela hnam kawlh bera an chhiar Apache Indian te ai pawha mahni hnam leh ram humhalhna kawnga hnam kawlh leh huaisen ni ṭhin kha, ṭhangthar zel te'n an pi pute hnu an thlawp loh a leiah an thlâh zel te chu heti khawp hian an lo chêp ta a ni.
.
Rafela te ṭhian thum chuan an map leh compass chu an hmang thiam bawka, mi dai loh lam tura an rin Champhai district hmar chhak Khuangphah khua aṭanga state boundary hrul ram pilrila an han luh meuh chuan, mipa pawh nise ram ril la dai ngai lo an nihna chu an chetze zawi ṭan riauah chuan a lang ṭan hle a.
mahse, an thluak bur Rafela erawh chu a boruak tawn a zira mihring inthunun thiam leh zei thlep thlawp a nihna chuan a ti tha tho telh telh tih hriat zetin an ram luh chin ngawpui pil dur thim mup mai te chuan tha rilru leh thâ chakna a pe zual telh telh tih hriat zetin a vei theuh theuh mai a.
Bibi leh Zela te erawh chu an chauh a nâ telh telha, "helai hi riah nan i hmang mai ang u" tia Zela'n kal zel tawh rih loh a rawt nawn leh takah chuan, "khua pawh a tlai tawh viau a nih dawn hi, chawl hahdam ila a ṭha lo maw"!? tia Bibia'n a rawn rawt ve tak avangin Rafela pawh chuan an thlen chin en fiaha map bih vang vang chung chuan riahna hmun tur zawn a ṭul hmasak ber thu chu a sawi ve ta a.
.
Chulai ngawpui hnuaia zan khat an riah hnu chuan, a tuk varṭian rualin khaw chhak hawiin an kal leh nghal ngat ngat a, an thlen chin ram pawh Ni sa boruak lum luh pawh theih mang lohna khawpa ngawpui chhah leh thim dur a lo ni ta!
an chawlh a piang chuan, Rafela chuan khua emaw kawngpui emaw a la hnai em tih en reng reng chuan a map zial bawk chu a phelh vat zela, a duh ang taka pil ril leh chet awlsam tur si erawh chu an la pawh lo tih a hriat avangin chumi ni pawh chu an vak nileng leh ta ṭhaka.
a tukah pawh ni tla leh tla lo pawh hriat thiam har tawh khawpa ngawpui duk thim mup mai hnuaia an vah leh fe pawh chuan, a target point duh lai chu an la pawh lo nia a hriat avangin Rafela chuan a ṭhiante pahnih chau lek lek tawh chu a la fuih sauh sauh a.
mahse, chumi tuk leh lama an han chhuah leh hnu chawhnu lamah chuan, ngawpui ruam thuk zet hnuaia Lungpui lian zet zet, In lian pangngai tiat tiat insir bawk khep khup hnuai Puk kaw kel biru zet zet te chu an Buk ruk nghet atan Rafela chuan a thlang fel ta a. chung lungpui hnuai kaw riak ruak te chu tuihna ṭha zetin a sir zai zaiah a luan khung her her deuh vek avangin mihring chen nan chuan a tlak thawkhat tih chu a chiang hle a.
mahse, Ni eng erawh a luh mang loh avangin chhunah pawh meichher chhit titih ngai khawpin chung Lungpui hnuai puk te chu a thim tlat mai a. chuvang chuan, mei khu a chhuah pawha chulai ngawpui hmun tina a rim a chhuah loh theih dan ber chu an zawn a ngai ta a ni!
.
Puk kawkel hrang hrang an fan vek hnu chuan, a kaw zau ber lai chu an thian fai te te a, a kawkel dangin a rawn pawh tamna lai berah chuan mei chhehna lai tur chu an han siam ta a.
chumi hnu chuan, chung lamah an vak chhuaka an Buk chung lam Lungpui lian tak tak insir khep khup kara Thingtuluang kawrawng Ui pum rual vela lian, hlam sawm dawna sei bawk zan chu hnuai lama an meichhehna tur zawnah chuan nghet zetin an sawh tlang thla ta a.
chu an thing kawrawng sawh phun bul lam chu hnuai lam aṭang chuan an hawlh kaw chho leha meikhu hip thei ang ber turin lungtumin an sawh hual leh ta a.
.
An hlauhthawn ber an mei rim paih bona an siamfel tawh bawka, meipui an chhep sauh sauhva an ei tur pai te chu an thuk phum hlarh hlarh mai a.
chutia meipui kil chung chuan, an pathum chuan boundary map bawk chu mei êngah chuan an han bih leh ṭhapa, an duh dan chiahin myanmar puppet ho kawngpui pawh an Buk aṭang chuan chawhma kal vel chiaha hla a ni ta chiah bawk a. mahse, a tuk lam hna atan chu kawngpui en fiah chu an rel thlu thuaia, an pum an hnawh puar te te hnu ah mahni thuamhnaw lum ṭha ṭheuh inbelin tui zetin an muhil ta siai siai a.
.
An awm hmun an khuar fel aṭanga Thla hnih a liam chiah tiha myanmar puppet ho an han lambun ṭan chiah aṭang chuan, an Puk Thla de tir ang deuh hleka kawkel kual raih chawia 'moon gate' tia a hming ruk an phuah chhungah chuan, Tiger brain chu an chheprelh tam ta hle a. chuti khawpa hrat laka che chho ta na na na chu a ni telin an nun pawh a rawng chhovin, myanmar puppet ho talh chu timna nei lo lekin ngaiah an nei a ni ta der mai a. kum a ral dawnah meuh phei chuan, an Pawl hming atan chuan an thu ruk rel ṭan kum chawiin 'Agent71' tih an invuah sauh sauhva, mi paliin an pawl chu an rawn zawm ve ta bawk nen, State boundary hnaiha Myanmar khaw ṭhenkhat leh Mizo khua thleng chuan an chet dan rawva zet chu a darh ta nge nge.
mahse, heti khawp hian che rawngra mah se anni ho hi tuman tute nge an nih an hre hauh lo!
Myanmar puppet te zinga Mizo tel ve te nen lam an dah ṭhat hmiah hmiah zel avang hian, ruihhlo tawlh pawl lian tak tak te hian burmese tho an nih te an rin chang a tam phah mai bakah, an lo lambun apianga thih ṭih hlek lova an che mai ṭhin leh an inbeih buai laia inbiak nan ṭawng hmang miah lova, Code hrang hrang an hmang daih ṭhin te chu an bo phah map map hle a ni.
.
2073.13.8 zing lam a ni a, Agent71 te pawhin an thluak bur Rafela ralrel dan chu a vawihnih nan an chai ho leh laih laih tawh a.
"vawiin atan chuan, Kalayam khan an rawn zawh dawna a lan avangin, kawngpui chhuah hma Kham khawkrawk hmunah khan Bibi leh Puia leh Nuna leh Chacha te kha in lo tawm anga, keinin in target point chhunga rawn hnawh luh tumin hma lam Far hmun kha kan lo luh khalh ang.
an rawn lan hun tur hi hriat lawk a nih loh avangin, ei tur leh tui kha pai sa u la. kan mithar pawh a vawikhat nan a che zia kan en ang chu" tih ram hmak pah chuan Rafela chuan an pawl rawn zawm tu thar ber, fiahna a paltlang hram hnua tawrhchhelna nei tura an hrual hrep Kimtea chu a han melh khâih a.
an chet chhuah hma chuan an zavai chuan tunṭum an chetna hmun tur hi chu, Kham leh hmun chhengchhia a nih dawn avangin che fimkhur viau tura an inchah hnu ah, vawi enge maw zat an lo lambun tawhna lama an lak sak myanmar puppet ho Silai zinga a ṭha ṭha keng far chung chuan, an vai chuan Kalayam khan pan chuan an chhuak ta a.
.
Kalayam khan awmna hi Ngawpui khuh thim mup leh kawng ruk em em a nih avang hian, puppet ho pawh hian tam tham deuh an tawlh dawn ṭum chauh lovah chuan he khan hi an zawh duh lem lova. he khan an zawh ṭum hi chuan, him taka an kal theih nan assasin leh Silai kah thiam tak tak an hruai tel ngei ngeia vawikhatmah he khanah hian an la che sual ngai hauh lo reng a. tun ṭumah hian, khan danga an tawlh apiang deuhthawa mak tak maia State boundary lai vela an mi tirhte chin hriat mang lohva an bo duak ṭhin leh, an ruang hmuh kim mang lohva bo hlen ta fo te avangin Shooter ṭha leh hriam chelek thiam rual tam zawk hruaia hmun khata kal tlang pui duaka Ṭiau mawng lama vawrh darh leh an tum a ni.
.
Myanmar puppet pawl lian pathum Taunggyi Cat, Lion leh Pathein Gun te hi inngeih lo viau mah se, an pawl ruihhlo tawlh lo phil bo ṭhin tu an awm aṭang hian an inbe rem chho hle a.
a tirah chuan, heng pawl pathumte hi an inringhlelh tawn ṭheuhva a khat tawka buaina tenau an neih fo piah lamah Gang fight a chhuah tak hial bakah, an pawl thum member nilo Civil Customer thlengin an buaina avang hian an thih phah nual a. mahse, hun a kal hret hreta, Boundary fighter ho hi anni pawl thum innghirnghona avang emawa rawn inrawlh eng pawl ber emaw an ni hauh lo tih hi an hre chhuak hnuhnawha, chu chuan an pawl thum inkarah inremna a hring thuaia an pawl thum hian Kalayam khanah hian a huhova ruihhlo tawlh mai hi him taka an kal theihna ani zawk dawna an hriat avangin an rawt ho ta a ni.
.
Ngawpui hnuaia nun inthlak thawka kawsa an nih achin an thil duh la tura nunchan an han zir tak tak aṭang hi chuan, kum thum a han ral leh meuh chuan mahni nunna thapa mihring tawrawt tak tak hmachhawn leh nun ralṭi reng renga khawsa an ni ta bawka, sawi tawh angin Rafela te ṭhian thum hian insual, Silai kah, ralrel leh hmelma bum hi chu duhthusamin an thiam hi a ni hawt tawh a.
a bikin, mihring danglam Rafela ngat phei chu Bibi leh Zela te aia rilru chak leh tha ngah a nihna te hian a chungnun tir zui zela, an pawl rawn zawm an awm nual hnu hi chuan hotu chan a chang titih der tawh a.
mahse, Rafela hian a ralrel hi midang ho hian zawmin zah ru riau mah se, hotu ber awma awm chunga awl mai mai emaw, myanmar puppet ho an phil changa ral muanna lai laia lo tawm sen mai mai hi a duh der lo!
a hmatawngah ngat ṭan hmun siam hmasa ber a nih zat zat bakah, ṭhiante thlawpa thih huama che nâ berah a ṭan ziah chu sawi loh, chet dan tur him zawk zawng chunga a ṭhiante ṭan hmun en kual zat zat tu ah a ṭang ngei ngei ṭhin a.
hei vang hian vawitam Silaia kah hliam a tawka, myanmar puppet hovin an sual rawn chang lah a tam.
a hmaifang ṭha zet pawh tunah meuh chuan a lang hriam lek lek tawhin, chutia a cher ta deuh hlek leh a khabe veilam ser kal raih te chuan, a hmelṭhatna erawh chu a belh sauh thung emaw tih tur a ni thung a.
a han inchei danglama, an a ṭhiante ngawt ring mai lova Paletwa leh Mantupia a an eitur lama a kal chang te chuan, chung lai khua leh a chhehvela Historical place tlawh Tourist Ram dang Nula leh tualchhung Nula duhawm tak tak lo zi hut hut ṭhin te chuan, a pian sang ria nalh zet leh a hmel pa hrak te chu an lo en duh theiin, Pa til chêh tak chu nise zan khat Ar thau anga tlâk cher rawih na tham Nula chen tur chu a hmu awl lo ang tih chu an melh dan aṭang chuan a hriat ṭhin hle a.
mahse, Joani a ngaihtuah reng ṭhin tih lohvah chuan, a tihtur hmabak piah lamah hmanrua atan a la ṭangkai mahna ti-a a thlun beh Thailand tleirawl duhawm zet, nungcha chi hrang hrang tamna ngawpui epa awm Paletwa a biological science a master digree neih tuma Research ti mek, sang thlerh thlawrh ngo no paw phek mai leh sam ngil mitmeng mawi zet, a hmelṭhatna piah lama a pian mipa hip zet Apinya inkhuarna White star Hotel room no 703, privatise zeta cheibawl zau zet leh changkang zet chu Paletwa a kal apiangin a tlawh hmaih ngai hauh thung lo.
.
An luhna a ril ta bawka, Kalayam khan pawh an hma lawk tlang dung tluanin a lo inkhawh phei zui tawh a.
an ralrel lawk ang ngeiin Kalayam khan ngawpui inṭanna an han luh chuan, "Far hmun kan luh saw chuan, nangni chuan in position tur in thlang fel diam tawh turah ka ngai" tia zawi sapa Rafela'n an thutawpna a sawi lai chuan, Bibi leh a hruai hran tur ho midang te chu a han en kual a. Bibi chuan Rafela thusawi chu rang taka a lo buk khum nghat hnu chuan, "Silai kan rawn hmeh puah tawh chuan, puppet ho hnung chu rawn dawl zawm lovin in theih ang angin per san vat vat zel ula a ṭha ang" tiin fimkhur thulhah inkah palh a hlauh thu a sawi zawi ve ta sap a.
.
An inthlah fel tihah chuan Chacha chuan "kan khan chan hi rawn zawh zawm lovin bibo ta vek se engtia chet lak nge ṭha ta ang le"!? tiin Rafela chu chu zawhna chhang tur chuan a phut deuh bik tih hriat zetin a han melh deuh ran a.
boruak vawt hik chuai mai hipa vanvadãk vang vang chunga, an chung lam ngawpui kar la en chho ran chunga thawk la khu hlat hlat chung chuan a lukhum lum chu a khum ṭhat malh malh hnu ah, "kalayam tlang dung tluan chhuah lam hi Kham sang zet zet inchhuang thla thluah vek niin a lang a, khi Kham pangah khian hnim leh Thing reng reng a ṭo mang lo ang.
khing kham sang zet zeta tlak liam ai chuan, khan chhuah lam tlang dung pang awih thla ngawpui hnuai khi an bel ngei anga, awlsamte-in kan chhuk veh thla tawh mai ang chu" tih leh a hma lam hnim tawn bawrh bawrh chunga luh bo chu Rafela chuan a rual zui ta a.
.
Rafela leh Zela leh Hruaisanga te an liam hnu chuan, Bibi te pali pawhin an position tur zawngin khan tawp lo inṭanna laia Lung khawkrawk zet zet inchhuang kawkalh ki ber bur hmun chu an en kual uluk hle hlawm a.
a inhnaih berah hlam sawm aia hnaia awm lo tura Bibi chuan a hrilh ṭheuh avangin mipa inringtawk ṭhe ṭhaw an ni bawka Chacha, Puia leh Kimtea te pawh an che buai rei lo kher mai!
ngawpui thim duk dur mup mai hnuai khan khawkrawk zet karah chuan, Lusei tlangval rual leh Myanmar puppet pawl thum infin te chu thihna-in thla a zar hnan ṭan ta tih hria niawm takin, Kalayam ngawpui bawmtu Nungcha hram zawng zawng te chu thawklehkhatah thehmeh reh takin an reh ta duak mai a.
.
Thim hmulin myanmar puppet ho an lo channa ngawpui hnuai a bawh thim zual mup tawh tiha, Rafela te lamin Far upa zet zet kar hnuai hmun hrang hranga lungpui kara ṭanhmun an siam rem fel awr chauh tihah chuan, an beisei loh zetin zan rei nghak hauh lovin puppet ho chuan Kalayam tlang dung hnuai khanpui ber aṭanga km30 vela hla a, kawngpuia boundary hulum lai hel nana hman an tum Motor ruat lawksa man thuai tuma kea an rawn kal thawm chu an hre ta mai a!
Rafela chuan an mi chan te an hnai tih hriat nana code an hman ṭhin, 55pp' tih chu a piah hlam sarih vela hnaia Zela tawm lai hmuh tur ngei chuan boruakah a kutzungchal chuan a thai kual zauhva, Zela pawhin a lo receive tih entir nan a kutzungpui chu a lo ti kawh nghal vã a.
.
Reiloteah puppet ho chuan kawng zim lai an rawn luta lungpui insir khup kar thim lai an luh veleh chuan, Rafela Cz75B chu a de zawka puppet ho kal lai mi sawmhnih dawn zinga a hnuhnung ber chu a tukkhum dawm chungin a tlu ṭhuai mai a!
midang rawn lehhawi mek chu Zela Silai mu chuan a brass phei leh ṭhawta, Hruaisanga pawhin a Rifle ken chu a hmet puak rang dat dat hle mai le!
Puppet ho chuan an zinga pathum lai tlu tawh chu ngaihsak lo lek chuan an darh huka, a ṭhen hma lamah an tlana position lak tumin lungpui phen thim lai lai bel chuan an au ṭhat ṭhat hlawm a.
ralkhel dar a ri tak tak ta, Lusei val te nge khawchhak sakawlh rual ho chu chan ṭha zawk dawn a hriat ta loh!
.
Puppet ho tawm khawmna aṭang chuan Silai puak rang zet zet a rawn ri tuarh tuarha, Zela leh Rafela te tawmna lungpui chung lam chu a rawn khem ta ṭhawt ṭhawt mai a.
mahse, chuti chung pawh chuan Rafela leh Zela te chuan an ṭanhmun chu sawn duh lek lo chuan, an kun hniam te te a lei hrulhah puppet ho tawmna hawi chuan an han hmet de leh ta zawk zawk a.
ṭe ṭhawt ṭhawt thawm a rawn chhuak thuta, khawchhak ṭawng dik taka au ri leh Silai riin Kalayam ngawpui hnuai thim ruih mai chu a luah leh thuta tlan ri khip khup riin chu thawm chu a zui nghal zat a.
Rafela chuan an tlanchhe thawm chu ngaithla ran chung chuan, an thawm a reh veleh chuan Zela tawmna lam hawi chuan Code113 a han thai kual leh zauhva, Zela chuan Rafela code thawn chu bawh a bawh zui thuaia, rang taka Rafela chu a fin phei hnu ah Hruaisanga chu sir lama lungpui phen chung zela kal tura an hrilh hnu chuan, anni pawh chu inṭhenin a lai takah Rafela a lut pheia ding lamah Zela chu a lut thla ve thuai a.
mahse, an tum angin puppet ho chu an va pawh mai theih tak loh avang chuan, hlam sawmli vel an mahni hma zawn ṭheuhva an kal hnu chuan inhnaih deuh zawkin an kal ta a.
.
Chutia an kal khawm deuh hlek hnu, pen sawmhnih vela thui an kal leh chiah tihah chuan, an hma lam hla deuh fe aṭang chuan rang zet zetin Silai a rawn puak ṭhawt ṭhawta Bibi leh a ṭhiante an che ve chiah tih hai rual lohvin khawchhak ṭawnga au nâtuar au thawmin Silai puak ṭhawt ṭhawt thawm chu a rawn zui zat bawk a.
.
Chuveleh Rafela te pathum chuan, an ralrel lawk kha hre rengin an hual phei zelna khan chu rang zetin sir lam lungpui khawkrawk zet zet karah chuan an per luh san thuaia, an rawn tlan let tur chang chuan position pawh an la fel nghal thuai a.
mahse, an beisei ang zanin an chet dan chu an bawh zui tluan thei ta bik tlat lo!
thawm ngaithla a an han pil leh hlek lai chuan, Hruaisanga tawmna aṭang chuan tisa ri no chawrh chawrh thawm a rawn chhuak thuta, Hruaisanga rum kawk ri leh mipakhat ṭê ṭhawt riin chu thawm chu a rawn zui ta tlat mai a!
.
Rafela chuan chu thawm chu thinrim sa pup pup chung chuan a ngaithla chiang te te a, a Pistol lek vâ chung chuan Hruaisanga tawmna lam a thlang vei lam hlam sawm hnih dawna hla a lungpui leh thingtuluang bawk ṭhiang thim mup lam chu a pan thla chher chher mai a.
mahse, thui a kal hma chuan, a luh lehna tur chiah lungpui ko thim zet hnuai aṭang chuan, a dum hlanga inthuam China sword sei zet keng rawn lawr thut chuan a dar dinglam chu a rawn vai thawi fua a, Rafela tan pawh chu mihring che rang em em laka a him hman hlauh chu vanneihna sang tak a ni tlat mai le!
a Pistol erawh chupa-in a rawn vai ruala a tluk thlawrh rual chuan, a tum loh zetin a thlauh avangin a tan chuan a khel sir veilama a pai a Dagger sei zen zawn chiah chu inven nana a hman theih awmchhun chu a ni ta!
.
Chupa veha a han insiam rem vat lai chuan, an hma lam Silai rikna hmun ngai bawk aṭang khan Silai a rawn puak leh ṭhawt ṭhawta, patling ṭê thawm leh khat deuh hleka Silai puak zui riin a rawn zui leh a, chu Silai rikna lai an chian avang chuan Bibi leh midang chu an hima an position a la dik hle tih a lang chiang viau a.
mahse, Rafela te ṭhian thum erawh chu puppet ho mi rawih fighter paliin an rawn luh chilh tak avangin thih leh dam inkar a zim ta hle tih hriat zetin, Zela pawh mi pahnihin a tawmna lungpui kar thim hnuaiah an pet tlu hnawk hnawk mai a!
Hruaisanga lah a tumpuipa chuan kut a thlak ngun zawk tial tiala, rei lovah Thingtuluangah nem betin a Dagger ken chuan vih tumin a nawr bet ta tlat mai a!
mahse, thih thâ a ṭang a nih bakah hlauhna nei eih lo Hruaisanga chuan chupa Dagger tle var mai chu a lak leu sak zel avang chuan, chupa chuan a duh ang takin a finish thei bik hauh lo!
a chhak lawka patling ṭê ṭhawt a hriat ruala Rafela rum ngal ngal thawm a hriat thut veleh chuan, chupa Dagger humna kut dinglam banrek chu a elh thuta, nâ zeta lak kual nghal vat pah chuan ama Dagger ken ngei chu chupa Nâk thawlah chuan Hruaisanga chuan a chum lut ta ngheng mai a.
.
Rafela chuan, a bitum pa hmai a vai thler sak peh duai mai chu thim hmul phe ruai karah chuan chiang zeta en ran chung chuan, a ban veilam vunpui chat hmawk khawpa thler hawk aṭanga thisen rawn baw par par chu a han thlek zauhva.
chutia a rilru peng zauh chu a bitum pa chuan a rawn bawh zui thuta, zei zet leh rang zetin a rawn zuan fua-a a Sword vai thawm pawh a fiak ziau ṭha kher mai!
Rafela lo per sawn zauh nak dinglam zawnah chuan a vai tlang puata, chutia a Sword vai tlang kun lai insiam rem leh tur chu Rafela chuan a hnungzangah chuan nâ zetin a nghawk thaw hawka, chutih rual deuhthaw chuan a kê chu invawr ṭhawh khawpin a han pet sak nghal nghek mai bawk a.
.
A bawkkhup zawnga a tluk veleh chuan Rafela chuan chu pa Sword kenna a ban dinglam banrek chu rah beh sak chung chuan, a Dagger chuan vih tumin a han vai thla fua-a a tum a fuh hma chuan chu pa chu mak zetin a rawn inlet hman tlat mai a.
a taksa a vih ai chuan ti niawm taka a kutphah-a Dagger zum lam a rawn dan rual chuan, Rafela chuan tim eihna nei hauh lovin chupa kutphah chu a vit tlang thla zawka, a ban lehlam a rahbehna a tal chhuah veleha chupa-in a Dagger kenna lam rawn man beh leh tuma nâtuar rum kawk kawk chunga a rawn ban leh lai chuan, a chu pa kuta a Dagger tlang thla rung chu Rafela chuan a phih phawi zawka a hâm hawng hawk khawpa thuk chuan chupa awmah chuan a Dagger chu rang em emin a han vit lut ta hrâwih a.
.
A duhtawka thukah a vit fuh chat chat bawka, chupa ka aṭanga thisen lar zet rawn phuan chhuak bawrh bawrh leh a 'aw' chhuah tum ṭang khur ngat ngat lai chu a Dagger kar herh sawk sawk pah chuan, vawithum lai a nawr thuk luih leh salh salh hnuah Rafela chuan a Dagger chu a phawi zawka a thlang lam Hruaisanga awmna lam chu thinrim meng sen ram chung chuan a pan thla nghal vat a.
.
A mi thah chil chhak ṭhat ṭhat chunga Hruaisanga kal sawn tum mek lai chu Rafela chuan "Zela khawnge"!? tia zawh sap pah chuan, an thlang lam lung lian tak tak insir khep khup lam chu thim zingah chuan a hawi thla ruai a.
"hmanhmawh a hun viau, a thawm a rehna a rei riau mai" tia Hruaisanga'n a lo chhan lai chuan, a Pistol thlauh pawh chu ngaihsak ta lo chuan Rafela chuan an thlang lam chu chak zetin a pan thla nghal vat a.
.
Rei an zawn hma chuan, mi pahnihin Zela tlu reng lai lung lian zet zet chawi chunga den hlum tuma an lo din chilh lai chu an zuk hmu thuta, bihruk kuala veh ṭhat lehna hun a awm tawh lo tih chu Rafela leh Hruaisanga te chuan an hre rang kher mai!
Rafela Dagger chu a thlawk chhuak zawka chutih rual chuan Hruaisanga pawhin Zela tlukna chu a thleng phei chawpchilha, pakhat zawk nen an inkeuh nghal ṭhuai ṭhuai lai chuan pakhat zawk awma a Dagger bur vu dim lo zeta phawi pah chuan, a vir thuta Hruaisanga keuh bet mektu pa chu Rafela chuan a Dagger vai fua pah chuan a han ṭum chilh zui ngheng mai a.
.
A kawng chung chiaha Rafela Dagger lut thawih chu chupa tan chuan thihpui loh chi ziazang a ni lo!
Hruaisanga rawn tho chhuak chuan "a thâ a fei kher mai! rawn che zui lo la chuan min rek hlum hman hialin ka ring a ni" tia a nghawng tuai vat vat chung chuan Zela la tlu zawi reng chu a pan phei thuai a.
.
Zan a thim chhah viau tawh hnua fimkhur zeta thawm ngaithla chung zela Zela hliampui tuar an tawm bopui lai chuan, an thlang lam hret aṭang chuan thum zeta a sawi hriat mang si lohva rawn phun bul bul thawm an han hria a. Rafela chuan mumal awm miah lova phun sup sup chungin a lo chhawn ve vata rei lovah Bibi chuan a rawn fin chho thuai a, a hnungah chuan Chacha leh Kimtea leh Nuna pawh an rawn lang nghal zat a.
.
"Zela chu a ngaihtuahawm lutuk lo ang chu maw?
paruk chu chiang zetin kan thata, a dang zawng chu um zui hman loh khawpin an tlan bo hman tlat mai.
an Bag erawh chu kan lak sak deuh vekin ka hria a, Silai pawh min rawn ken sak ṭha viauin ka hria" Bibi chuan a han ti sap a.
Rafela chuan Zela chuan thisen a hlauh hnem deuh thu leh an chet dan a phuai lek lek thu te a sawi hnu chuan, an vai chuan moon gate luhna khan hnai zawh chuan thawm dim zetin an pil bo ta diak a.