THALFANG LEH MILU, BUNG 15

Llpa rokhum//Chalvunga'n thip deuh rem rawma a han melh apiang chuan Parchhingpuii chuan a hmui sen vam ham mai leh chuktuah tawh a nih rau rau chuan tia thaw lak takngial pawh uiawm tur khawpa dut chakawm tawk chauh, a hnuai lam phir phek leh a biang sum chawih tawk chauhva lian hlar mai chu a pet nang nang a, a mit hmul er tle set leh mit tlangkawm lian tap mai chuan nu dawih dai chungin hnuai lam a melh rang thei hle a.
chuti chung pawh chuan Chalvunga chuan Parchhingpuii bawk rum deuh hap hap chunga a melh leh deuh hrak hnu ah, pa pahnih te lo la inhrosa bawrh bawrh lai chu a tanna Thing bawm kar aṭang chuan rum zetin a han melh tawn zauh zauh a.

Lal Khawluta mualkil Tailera pa chuan an Lal tunu chezia hre lo lek chuan an sal man chu nawmnah zetin "i lu riamna Sial patuai kan pheh thluk hun chuan, a sa serh chu i sam hram zetah khan kan han zep tura! chu Sial patuai chuan i thla chu Pialral thleng rawkin a si liam ngei che anga, mitthi te khua ah chuan i mualpho na ni a sei dawn teh e" tia nui keh hui chungin a bula ṭhu an Lal Khawluta fapa hming koh Parchhingpuii pa Raldawla chu kun du chung chuan a han mitmei vei rulh rulh a.    
 mahse, Parchhingpuii pa hi pa rilru kawi leh a pa Lal Khawluta anga duham leh inlek a ni tlat lo! a fapa Rathuma leh a Pa thu leh hla hi vawi tam a dal fo tawh chu a chhapah, Zadeng ho nawr tuma an ralrel phei kha chu a buk liampui lo hle ṭhin a.
he a rilru ngil zet hi a Pa Lal Khawluta ngei pawh hian a hai lem loh avangin an ralrelna reng rengah pawh a ko khatin, a chang phei chuan "kan Raldawla meuh hi zawng, belrwh mualah sangalkhawng hranga khua sah sakin perh zeh sak pawh ni ila, ka tha do khauh tura lawi pawh awm lovin ral chemah min la barh hlum phiar dah ang ka ti" a ti khur khur fo mai a.
mahse, a tupa Ralthuma a rawn buluk chhoh tak viauah hian, Lal Khawluta chuan "a ni hi zawngin ka tlang meuh pawh hi luah se khawi khaw Lal mahin va nek ngam suh ei! belrawh mualhah pawh tal hrang mah se, a pa ve meuh ai hi chuan a la ropui dawn chek e" tiin inhnem nan tak a hmang ta a.

Chutia an mualkil Tailera pa in an sal man a vau leh khur khur lai chuan, Parchhingpuii pa Raldawla chuan a hma zawnga a vau ve na chu a duhtawk viau tawh laia chutia na zeta Tailera pa ṭawngka rawn chhuah leh chu a ti thei ta riau lo nge ni!?
an sir lama Parchhingpuii la ṭhu ve khiau lai melh zauh chung chuan "chemte ti tawh khai i Nu Buh deng pawh rawn a ngai ta'ng a ti, ka Ar bawm tah lai pawh a chung ka la hawlh phui lo ve i haw"ng dawn teh ang khai" tih leh hnung lam hawia inher chu a rual nghuta Lal mual thlang lama an In pan chuan a kal ta nul nul a.

Parchhingpuii chuan a pa thu meuh han palzam chu ngaingam hek lo le!
Chalvunga hliam laia hnawih atana a tih inṭing leh Aieng leh Sahriat sawh ban a kuta a pir liai pawh chu a hnawih sak theih tak siloh avang chuan lunghnur zetin a pa liam lai chu a zui ta hnak hnak a.

Chutia anni pafa ṭin ta daih chu mualkil Tailera lah chuan nuam lo tia insaseng phah nan hman a tum chuang tlat lo! "i tha thawh dan ze suaksual zet kha i thih phahna ai siamtu tur che a ni dawn tih hi i hre pha turah ka ngai e. khawi Lal khaw mi leh sa nge i nih lah a tu a mah min kam thawt duh hlek lo vei maw!? Sialbuan Pasalṭha te hi cho zam chi an nih loh zia i la hre chek ang le" ti leh bui bui chungin a ner nasa telh telh mai a.
Chalvunga chuan chuti chiama a riamna chu ngaithla awm pawha a lan tak loh chinah meuh phei chuan, mualkil Tailera pa chu a sa zual ta lutuk nge ni "Nau-chahai ka ṭawng ka chhuak hi i i la bih liam mai mai lo chek ang le, mualkil te zingah kan Lalpa beng hi kei hian ka luh thuk  thei cha cha viau tih hi i la hre dawn e, kan Lalpa chu Sechhun chaih taka chaih tur che a thu ka rehpui lohva chekah Tailera pa, Raltaikhera pa ka ni ngai lo'ng e" ti a ang buan buan chungin Chalvunga tanna Thingtuai intung ṭhut chu a hmer ngur ngur mai a.   

Chalvunga chuan chu mualkil ṭawng chu hre lo ang mai a la awm tlat chung chuan, khaw chhak lama Nilu rawn lang mek lawma tual laia Naupang rual hnih rual thum rawn inhawr chhuak map map lai la thir daih chung chuan, "ka pi Ṭhival hrui chu a sei teh a sin le" tih leh mualkil Tailera pa tawlh hnaih sauh chu a han rual a.
"Ṭhival' a khawi lam Ṭhival mah zuk nang hian zuk nei chai suh! i lei kha tlir liam thla zen lo la chuti lo zawng a li nalah khan i tlir liam anga i dang kha kan paslaṭha te'n an pawt hik dah a nge" tih leh a Vaibel dawna Chalvunga tanna Thingtuai tun kik kurh chu a han rual a.
mahse, Chalvunga hian he mualkil mizia hi a ancheh dan aṭang leh a mit memng aṭang hian a lo man hman daih tawh tih a lang chiang telh telh a, a thluak fing zet mai hmang chuan mualkil Tailera pa chak lohna lai chu a man chiang ta kher mai!
mahse, dawi dan tawk a thiam a ngai hle tih erawh a hriat chian tlat avangin tawlh hlat san leh zauh pah chuan, "ka put bo tak leh Sial nufa hnih chu ka la thleng ve ang chu le"! a han ti zawi leh sap a.

Chutah meuh phei chuan Chalvunga pi Ṭhival hrui fual hnelh hnawlh, a nupui Zathluaii'n a awrh lai ngei a lo mitthla hman tawh chuan mualkil Tailera pa chu a ti khur titih ta mai!
"Taite, chu ro ṭhate chu min han kawh hmuh la ka ti, nang lah kan pasalṭha te kutah i tlu anga ro ṭha te hi chuan chulhnum tu a mamawh iak ngai" a han ti a.
a mize mil chiah maia dek kual a ni bawka, mualkil Tailera pa buai chhe titih tawh chu Chalvunga chuan a hre lo der sauh sauhva, a tanna bawm hnung lamah chuan "mut mut te pawh a chhuak mai e ka ti, khaw nge Ni liam ṭhak thlengin ka'n chhing te'ng" tih leh mut chhuak zet ni awm hrima tluk thlak chu a han rual zui a.

Mualkil Tailera pa chuan a vir tawk leka a chel luh thu tem ta tingtang chu, an sal tang chu a han melha koh harh tak nap ut ut chung chuan an dahna Thingtuai ram bawm chu tual lam aṭangin miin an hmuh leh hmuh loh bih ru zuk zuk chung chuan a veh kual ṭhum ṭhum mai a.
Chutih lai chuan, Chalvunga lah chu a rawn hnar thuai a, dak uak chung chuan Van te chu a hnar ri thawma nghawr chim tum ni awm fahran chuan a uar nasa tawh mai si!
a thil sawi hmuh vir laklawh tawh sawi zawmpui tur awm ta silo lung ṭhauh zeta mualkil Tailera pa inpet sawi puih mai chu a hawi sawn apiangin a mit veilam sir de sat ṭhin chuan Chalvunga chuan a hmu chiang thei hle a.
a rawn hawi let leh apiang lah chuan a hmui phe deuh hlurh hlurh khawpa nasa chuan ṭan a han la ṭha leha, a tep chuap chuapa a chilthli hnam zawih khawpin a inlet thaka chutia inleh pah chuan "Sihzang khaw ho chuan ka thuhrukna kha an hre hlei lo'ng e" ha-pui ṭhial chuap chuap chungin a han ti vaih leh chhu chhu a. 

Mualkil Tailera pa chuan, an ral man ro ṭha chu chhuh dan ngaihtuah thuai chu a ṭul ta hle tih a hai lo bawka, khaw mite rawn pung ṭan mek avang chuan an khungna bawm chu thawh san nulh pah chuan, "ral sal mah ni se, pi pu te'n ral man piai chiam chiam chu Sapuiin a ek a theh duh e an tih kha maw. khua te u, ṭha te te khan thlir rih ang u khai" a ti vei roh ṭhin a.
an In a luh thlak thleng chuan khaw mipui an ral sal man en tuma la rawn chhuak mek te chu hnai deuh deuhva an hmai zawna bih chung chuan, a thusawi ngai hlir chu hrilhin kawng a tluan thla ta ṭhak a.

Chumi zana Lal Ina Lal Khawluta leh mualkil te rorel tur chu an phur tlang bawka, Bakchhelen hun a han kai ek ek tihah chuan Lal Khawluta chhuatpuiah an khupa puan suih far chungin an ṭhu kim a ni tawh mai a.
mei an han chhawm enga, a chhuatpui dung tluan hlam sawmhniha sei awh phei put khawpa ṭhu a mualkil te chu Lal Khawluta chuan a han melh kuala, chutah a Vaibel peh kawh lai chu a ha-pui veilam chuan a ṭhial pial deuh rulha a lei ung deuh thul mai chuan a kamsir dinglamah a han hawl pheia a 'aw' a rawn then khurh hnu chuan "khai le! tlangau pa ka rappui chung snga ka thla hnih zupui bel kha han kai chhuak la'ngin titi i han la kai teh ang khai. kan Sialbuan a tlawm lo ve, kan ral hawl a na Chemteii pawh damin kan hmu leh ta a. kan ral sal erawhin a rawn chawr chhuahna tlang a zep atalangin, a rawn zik chhuahna khua kan riamin kan la malman hlei thei lo riau mai a. mah reng reng se, thim han ṭin se kan ral sal hi a lu kan lam ang chu tiin rilru ka lo siam ti tih e ka ti" a rawn ti thum chhuk mai a.

Tlangau pa-in zupui a han kaih ṭheh tak hnu chuan an ṭawng pawh a kai ṭha ṭana, ṭawng hmasa nih an inchuh deuh nak nak hnu ah Lal Khawluta vek chuan "khaw nge, kan ral sal lu chu i han lam lawk te'ng u khai. tlangau pa, Vawklawi veng pathlawi lam thiam Hratchhinga leh Chhuah lawi Nuthlawi 'aw' tliang leh hmai tlang bil Tlangluaii, a nauṭamthlai bu lah a pachal chal la si chhuak zak zak thei khawpa Thloh lu par Thing tuk dira la dir pir lah kha zuk ko la'ngin, veng chhak pathlawi Ngharchuha te hovin a mawng an hnawn zantin atanglangin ani khu 'Tlangsawhkehi' tia an chhal fiam zulin a zui chek nge ni!? Ngharchuha dep tlir vawih tuarh tuarh phei chu a Zawngte Mai thlum pek zawngchhang e an tih awm kha maw! ka chhuatpui a rawn kai loh nachin hi a rei dawn dawn ta e..zanin na na na chu Ngharchuha pawhin a vaibel dawn lo khai hul thek ta mai se a ṭha a nge" tiin tlangau pa chu an zai leh lam hmahruai tu turte ko turin a han tir a.

Tlangau pa lah a lo phur nasa, rui kik deuh haih chung chuan a ke arh zet pharh kak ṭha ṭha khawpa chak chuan an Lal tirh na lamah chuan a liam thuai a, a rawn leh leh meuh chuan pawr phang chungin Thingtalhkhuang a rawn pu lut sawi tlaih tlaih bawka a phur hle tih chu a kik deuh haih reng danah chuan hmuh hmaih rual a ni lo kher mai.     
a hnungah pathlawi Hratchhinga leh Nuthlawi Tlangluaii te'n an rawn zui lut bawk nen, "thimṭin ban zakin i'n intheh ṭhil teh ang hmiang" a rawn ti sin lut rat mai a. 

Tap mei an han chhawm eng leh sauh sauhva, nuthlawi Tlangluaii leh pathlawi Hratchhinga te pahnih pawhin Seki leh tu an ngah ta malh malh bawka, rei lovah an mitmeng a rawn zim set sawta an hawi nalam a piangah an keh haih tawh mai a.
chutih laiin, khuangpu Kapvela'n muang fan kal raih maiin rui meng phelh deuh phang tawh chungin a Khuang te zakkep lai chu a kut khak ang tlek tlawk chuan a rawn tuk ri karh karha, vawisawm vel a han tukna ah chuan ;

'mualah kan Sialbuan aia mual nuam awm nem maw....;

'a laiah Lal dang, ral hrum sawm kuai pa a leng e chhaih raw'

'a hawl e, sa leh ral an ṭin a dal ngai lo ral Hnamin;

'mualah kan theh chhaih khah, a chhaih dur dur e...

tiin an hun kal tawha an ral hneh tawhte riam leh an invauh lenna hla an pathlawi ho te'n an phuaha an sak dual dual ṭhin ngei mai chu a han hril ṭan ta a.

A tlar hnihna aṭangin nuthlawi 'aw' tliang kiu val mai Tlangluii 'aw' in a rawn rawn fawn hlerh hlerha, pathlawi Hratchhinga'n sir lam aṭangin kai ṭha tawh tih hriat zetin ke phah phah phun chat chata rawn pen chhuak kawi chhar chhar chungin a 'aw' puam khal ṭalh mai chuan a rawn zawm bawk, tlar nga na an la kai dawn tihah chuan "khaw nge, Dawhthleng hnuaia Kawlhnam leh Tlahthi hriam fahran te kha bangpui lamah khan thiat kiang tawh u'n. chuti lo zawng ka hrum zial a at anga lu lei filh pialin ka tlu mai dah a nge" tih leh chhuat lai taka awn deuh tleih tlawiha din chu a han rual a.

Chutah, an tlangupa a rawn petek chhuak nalha, an pathlawi Hratzinga duh dan zawm chuan a han che sawk sawka, midangin hla an rawn lak zawm chho ta bawk.
an hla lak inman ṭang chho lai rem zet chuan Hratzinga chuan dir ngar ngar chungin pathlang lam a sawn thla miai miaia a rawn let chhoh leh rual chiah chuan, a ke phah khak khir dum tlak mai lang haih haih khawpa kual nalh zet zet chuan a bawp chu a Vaibel lu rawn lang thim zauh zauh khawpa uar chuan khuang tuk ri rem em em mai chuan a rawn theh chho ta hnah hnah mai a le!
chutah zet zawng Lal leh mualkil te an ṭhu hle hle thei ta lo, pathlawi Hratzinga lam tual tur atan a zim ta lua maw an ti teh chek nge ni! an khupa an puan dur suih chu an pawt phelh sup supa an tawlh zui suau rualin an khek ṭhat ṭhata, innem khalh pan pan chungin an rawn ding bu lak hlawma ring theihtawpin chhuat chu an han per thum ta tlur tlur mai a.

An thawm puk chho zel chu pathlawi Hratzinga lah chuan a rawn uarpui sauh sauhva, a bawp a han theh kual hnah hnah apiang chuan an hla tlar tawpna an sak tawp apiangin hniam zet zeta suk zauh pahin a khel chu Ramar pa-in a nu la tir a awm kual laia a thla a han khawng ngeng vel thawm aia ring mah mahin a beng ri ṭhuai ṭhuai ta fo mai a. chutah zet phei chuan an Lal Khawluta hlimin haihlim a tiat ta tak zet ta, pathlang tap mei engin a en chin leh chin loha tui zeta insawi hnah hnah chunga zai nuthlawi Tlangluaii chu a pan thla chhur chhura a banah chuan hnai fea bih chungin a kai tho ta nge nge a. 

Nuthlawi Tlangluaii a rawn intheh chinah chuan mualkil te chu an inkai tho leh sup supa, chuveleh pathlawi Hratzinga chuan Tlangluaii chu hniam em ema Mute lei hrut chunga rawn phar phei chungin a rawn nger nghal chat mai bawk nen, Hratzinga'n a rawn luh fin rual chiaha Tlangluaii'n a 'Pa-suk rawlh khur' kotlang lu vum tan mai thla lang lek lek khawpa a puan bih insawn liam lek leka uara a mawng bawr vawng taih mai a lo theh phei ve zet phei chu Pa chi thlauh keu thluah tawh te tan pawh tawrh a har ta deuh nge ni!? "a khaih a..! ka chhungpui nu Sazumeidawh sanin Luaii hi ka lawi chilh mai dawn e...a bir lai laiah bung chawt mai dawn e ka ti" ti deuh chhen chungin tlangaupa Ṭialchhuma meuh pawh a dawr dawm ran chungin a meng de deuh kar tawh mai a.

Chutia an ri luih luih thawm hria a lenna tur hre ve lem lo Tlangval Zawlbuka tap te pawh an rawn lawi tak luih luih hnu ah chuan, mualkil Tailera pa chuan a thil tum tih puitlin tumna hun atan chuan chu hun ngei chu a melh fuh ta chat chat hle mai le!
Lal Khawluta chu a bekbawr zuka pum nuam lo ni awm takin a puan ven hma lam sawk khawr ṭat chung chuan Lal In chu a chhuah san ta ṭhal ṭhal a.
Lal mual a pel chhova, a lo ruahmn lawk ang ngeiin hemi zana an ral sal tang veng tute pahnih, a tupa rawlthar leh a fapa Tailera te chu lung muang zeta a biak leh sur sur hnu ah 
Tailera chuan a nau chu Lal mual aṭanga lang thei lo tura a pa chu din hliah tlat tur chuan a han hrilh ru zui sup a.

Chalvunga chuan thim zinga pa pakhat an khungna bawm pana rawn kun chho da da chu a hmel hmu lo mah se, a pian zia aṭang chuan zing lama a veh kawi hrep mualkil pakhat kha a ni tih a hre chiang tawk bawka, a hliam tur rawn na ṭhauh leh ul tawh pawh chu a hre chang leh ta lo hial a.
a thang valhah chu mualkil a awh chian zia a ngaihtuah let zauh lai chuan, chu mualkil pawh chu a rawn thleng chawpchilha, thim zinga chupa hmuh lohva a han ṭhen sak hnu chuan chauh hmel zetin a tanna bang Thingtuai ngheng chuan a han ṭhu thluang nghal vat a.

Chuta an han inveh tawn leh chuan hun an duh rei tawh lo bawka, rei tak inbe tawh lovin Chalvunga chuan a Thang valh chu a pawt per fuh ta chat chat hle tih hriat zetin "nangmah veng tute an inthlak a hun thial a ni tawha, sikawikapin van lai han zawl se, ral veng te chu ka fapa te'n an rawn bitum anga, khua in rawn kai dawna i Ṭhival theh thlakna daitam chu anni hruai chuan zuk bih ta thuai u la. in hmuh veleh dai aṭang chuan nang i put bo nghal anga anni pawh rang takin an rawn let thuai ang, chutiang chuan, nang hi chung ralveng tute kut aṭanga put bo thanin i thang thei mai dawn e" tia an chet dan tur a hrilh leh sup hnu ah thim zinga Chalvunga ṭhen sak chu hmu lo lekin Lal In lam pan chuan a let thla leh ta nul nul a.

     
Laikherha'n Lal Dengphung khua Khanmual dai a luh lai chuan, zanlai kai chho lek lek tawh mah se, a thu ken chu mut bopui lova Lal In thlenpui a duh hle a.
mahse, khaw dai khan a kai chiah tihah chuan 'aw' fiak zawi vin ṭhak maiin "kha bak rawn sawn hlek suh khai, hei i lam hawiin Thal ka rawn thlah mai dawn e" tia a chhak mai aṭanga a mah chu a rawn hmu chiang tih hriat zeta rawn vau tu 'aw' chu a hre fiah bawka a ding chat mai a.
rei fe ral aṭanga a insawi fiah lauh lauh hnu pawh chuan, Khanmual ralveng ho chuan an ring mai tlat lo. "kan Lal leh keini min thlawp a nih hrim chuan, i meichher kha i hmai tlang langin lek kang la, kan ven buk hi rawn kai ta teh reng la kan lo bih fiah teh ang che chu" tia pakhat chuan a rawn tih leh hnu chuan, Laikherha chuan an duh dan chiah chuan a meichher chu a hmai zawnah lek va chungin Khanmual ralveng ho chu a pawh chho ta a.

An han sawi ho hnu chuan, ralveng hotupa Khualchhawna chuan Laikherha hmela thu takna hmel awm tel tlat chu a hmuh hmaih loh avang chuan, amah ngei chuan Laikherha chu khaw lam pan chuan a luhpui ta a.
Lal mual an luh lai chuan, Lal In aṭanga mualkil te rawn ṭin chiah chu Laikherha leh Chhawna te chuan an tawk ta a. a rawn chhuak hmasa pahnih te Chhawna'n a biak zauh hnu chuan an vai chuan Lal Inah chuan lut leh diakin, Laikherha chuan a thu zakkep chu Lal Dengphunga leh a mualkil te bulah chuan hmaih nei lek lovin a sawi fai ta leng a. 

Lal Dengphunga chuan a Pa hun lai ata tawh suaksual bawla mi kam liam put pawr ching, an khawsa ṭha duh lo chung pawha a ke bawha ngaihdam dila a Pa-in a um bona aṭanga rawn let leh Ralkhupa te putu thu thu bawl kual dan leh an bikbo tak dan chu a pai dam lo hle tih hriat zetin "ka thu ṭha lak chu Ralkhupa te putu chuan phiarrukna valhin min rul teh chai maw!?
kan hetih takah chuan, chhim leh hmarah ralin min ruangchaicheh thlak hnan hmain Fanai ho hi Sa-ui tan pui thuai an ngai e. hun nghak khaw tlai lovin Keihawla khua Lungtian zuk bih ruk thuai a ngaih chu achhapah, Khawluta khua Sialbuan pawh kan tlak khalh thuai a ngai e, Chemteii hnu pawh duh angin kan bih zui hman dawn ta lo a nih chu le"! a Vaibel dawn ṭhial keh rawp khawpa khur dur dur chung chuan a ti vin ṭhak mai a.

Mualkil te lah chu an Lalpa an thlawp ṭha ṭham ṭham ṭhin bawka, an vai chuan Kawikawm thin ang ṭhapa inthlawp kuala inthurual zetin an rawn inṭawng chhawk diat diata an ngaihdan an han sawi liam liam hnu chuan, ngaihdan fel tak an keuh thlu chu a ni nghal mai a.
an ruahman ang chuan, a tuk zing varṭianah Tlangval pathum zela inkawp ṭheuhvin a fapa te khua ah chin hrilhah an liam hnu ah ral bawh turin chung an mi tirhte nen chuan a fapa te khua ṭheuh aṭang chuan Keikawla khua Lungtian ep hnai ber Hriangzau ngaw ah an vaia intawk khawm leh vek tura chhuak nghal turin thu an chah vek ang tih leh, chu mi hlan chuan Pasalṭha panga leh Tlangval sawm hruaiin Lal Dengphunga leh mualkil mawng zang deuh panga-in Fanai ho nen Sa-ui an tanna hmun tur Aitam lui an pan ve bawk ang tih chu an ralrel hmanhmawh thlak zet an bilh tawpna chu a ni ta a.